TALA LATA MAI O LE PEPESI AI TUA O LE KOVITI-19 (Aso 30 Me 2022 – Aso 01 Iuni 2022)
Ua fa’amaonia mai e le Matāgaluega o le Soifua Mālōlōina le a’afia ai oi latou fou e to’a 149 mai le mamalu lautele o le atunu’u i āuga o le Koviti-19, ae to’a fitu (7) gasegase o lo’o taofia i nofoaga fa’apitoa i le Falema’i i Moto’otua.
I totonu lava ia o Samoa, talu ona mama i tua le fa’ama’i i le Aso 17 Mati 2022, e 13,796 le aofa’i atoa o tagata ua pesia i le siama o le fa’ama’i e aofia ai e sa malaga mai fafo ma le mamalu lautele o le atunu’u.
TAGATA MĀLILIU I LE KOVITI-19
Ua lipotia mai fo’i e le Matāgaluega o le Soifua Mālōlōina e to’atasi (1) le maliu fou ona o āuga o le fa’ama’i, ma ua si’itia ai i le to’a 27 e ua māliliu ona o āuga ogaoga o le Koviti-19.
O le ua maliu o se tinā 88 tausaga o le soifua, e leai ni ona gasegase tumau ae ua mae’a uma ona tui puipui e lua. I le fa’aaloalogia ma le amana’ia o ‘āiga ma fanau pele o e ua māliliu o le a leai ai se isi fa’amatalaga fa’aopoopo mai lo tatou Mālō.
E tumau pea fautuaga fa’alesoifua mālōlōina mo le atunu’u atoa, ina ia faia tali fofoga i taimi uma, tausisi le tutū ma le nofo vāvā mai le isi tagata, fufulu mamā lima i taimi uma e puipuia ai oe mai le a’afia i ni siama.
Fa’amolemole aga’i e fai lou tui puipui, auā o le puipuiga sili lea mo Samoa atoa e tete’e atu ai i lenei fa’ama’i mata’utia. O lo’o fa’aauau pea tuiga mo le tui muamua, tui lua ma le tui fa’aopoopo.
Tatou galulue fa’atasi e puipuia tatou, o Samoa atoa ma e pele iā te i tatou mai lenei fa’ama’i.
O le Aotelega lea o le tulaga o lo’o i ai le pepesi o le Koviti – 19 i totonu o Samoa, ua fa’amauina mai i totonu o le 48 itula mai le 2:00 i le aoauli o le Aso 30 Me 2022 se’ia o’o mai i le Aso 01 Iuni 2022. Mo nisi fa’amatalaga e fia malamalama atili ai, fa’amolemole asiasi i le ‘upega tafa’ilagi a le Matāgaluega o le Soifua Mālōlōina: https://www.health.gov.ws/
Ua tapenaina foi e le Matagaluega o le Soifua Maloloina le lipoti i totonu o le fitu (7) aso, e auiliili ai le tulaga o le KOVITI-19 ua iai nei Samoa ile Aso 22 o Me e oo ile Aso 29 o Me, 2022. O lenei lipoti o loo tu’ufa’atasia ma auiliili ai fa’amaumauga o le fa’amai talu mai le Aso 17 o Mati ina ua fa’amaonia le pepesi ai o le fa’amai i tua ile mamalu lautele o le atunu’u. Ua fa’amauina foi fa’amaumauga mo tui puipui ua maea fa’atinoina mo le mamalu o le atunuu. Silasila i le lipoti ua saunia e le Matagaluega o le Soifua Maloloina ua tu’uina atu mo nisi fa’amatalaga.
—MAE’A—
