TALA LATA MAI O LE PEPESI AI TUA O LE KOVITI – 19 I SAMOA
Ua fa’amaonia mai e le Matāgaluega o le Soifua Mālōlōina le pesia ai oi latou e to’a 263 mai le mamalu lautele o le atunu’u e pei ona fa’amauina mai le Aso 03 Iuni 2022 i le Aso 07 Iuni 2022. E to’a 255 e mai le mamalu lautele o le atunu’u a’o le to’avalu (8) ua a’afia na malaga mai fafo.
Ua si’itia ai nei i le to’a 14,187 le aofa’iga atoa o e ua pesia i Samoa e aofia ai le atunu’u lautele ma e na malaga mai fafo. E to’avalu gasegase o lo’o taofia i nofoaga fa’apitoa i le falema’i ae leai se isi oi le Potu Tigāina (I.C.U.).
TAGATA UA MĀLILIU ONA O ĀUGA O LE KOVITI – 19
Ua fa’amauina fo’i ma le agaga fa’anoanoa, le maliu ai o se tinā e 88 tausaga o le soifua. O lenei tinā, e leai ni ona gasegase tumau ma e leai ni ona tui puipui o le Koviti – 19 na fa’atinoina.
E momoli atu ai fa’amaisega ma fa’amafanafanaga mai lo tatou Mālō, i ‘āiga fa’anoanoa.
E saga fautuaina ai pea le mamalu o le tatou atunu’u ina ia tausisia ma usitā’ia fautuaga fa’alesoifua mālōlōina o lo’o tu’uina atu i taimi uma, e ala i le faia o tali fofoga, tausisia le nofo ma le tutū vāvā mo le lua mita mai le isi tagata, ma ia fa’anofoesea i se nofoaga fa’apitoa o lou fale tau mamao mai lou ‘āiga, pe afai ua masalomia lou a’afia i āuga o le Koviti – 19.
E fautuaina foi le mamalu o le atunu’u, o lo’o fa’aauau pea tuiga i falema’i uma i totonu o Samoa. Manatua o le faia o tui puipui o le Koviti – 19, o le puipuiga sili lea mo Samoa atoa, e tete’e atu ai i le ogaoga o āuga o lenei fa’ama’i faigatā. O la tatou galuega fai fa’atasi le puipuia o Oe, o lou ‘āiga, o Samoa atoa ae silisili ai e pele iā te Oe.
AOTELEGA O LE GALUEGA FA’AAUAU A LE MATĀGALUEGA O LE SOIFUA MĀLŌLŌINA MO LE PUIPUIGA O SAMOA MAI LE KOVITI – 19. O lenei lipoti sa tu’ufa’atasia mai le 2:00 i le aoauli o le Aso 03 Iuni 2022 se’ia aulia le Aso 07 Iuni 2022 i le 2:00 i le aoauli. Fa’amatalaga au’ili’ili o le tulaga o lo’o i ai le fa’ama’i i Samoa fa’apea le tuiga o lo’o tu’uina atu i le kalafi o lo’o i lalo. Ae mo nisi fa’amatalaga fa’aopoopo fa’amolemole asiasi i le ‘upega tafa’ilagi a le Matāgaluega o le Soifua Mālōlōina (http://www.health.gov.ws) po’o le valaau o le telefoni numera 6008440.
