TALA LATA MAI O LE PEPESI AI TUA O LE KOVITI – 19
Ua lipotia mai e le Matāgaluega o le Soifua Mālōlōina le pesia ai o i latou e to’a 275 i le siama o le KOVITI-19 i totonu o Samoa, e tusa ai ma ana faamaumauga mai le 2:00 i le aoauli o le Aso 13 Iuni i le 2:00 i le aoauli o le Aso 19 Iuni 2022. E to’a 273 i latou fou ua a’afia mai i le mamalu lautele o le atunu’u ma le to’alua (2) na fa’amauina na faimalaga mai i totonu o Samoa (border). Ua si’itia ai le aofaiga oi latou (community & border cases) ua a’afia i le siama o le Koviti – 19 i le 14,772. E to’atolu (3) i latou o lo’o taofia i le taimi nei i nofoaga fa’apitoa ae leai se tasi o i le Potu Tigaina (ICU) i le Falema’i i Moto’otua.
E toe tu’ualalo atu pea i le mamalu o Samoa ina ia tausisia pea le faia o tali fofoga, tutū ma le nofo vāvā mo le lua mita mai le isi tagata, fufulu mamā lima pe a mae’a ona tagofia ni meafaitino ina ia fa’aitiitia ai le so’ona pepesi o le siama.
E tumau pea fautuaga mo le atunu’u atoa ina ia aga’i i se falema’i lata ane mo le faia o lou tui puipui o le Koviti – 19, auā o le puipuiga sili lea mo i tatou e tete’e atu ai i le ma’ema’eā o lenei vairasi.
AOTELEGA O LE GALUEGA FA’AAUAU A LE MATĀGALUEGA O LE SOIFUA MĀLŌLŌINA MO LE PUIPUIGA O SAMOA MAI LE KOVITI – 19. O lenei lipoti sa tu’ufa’atasia mai le 2:00 i le aoauli o le Aso 13 Iuni 2022 se’ia aulia le Aso 19 Iuni 2022 i le 2:00 i le aoauli. Fa’amatalaga au’ili’ili o le tulaga o lo’o i ai le fa’ama’i i Samoa fa’apea le tuiga o lo’o tu’uina atu i le kalafi o lo’o i lalo. Ae mo nisi fa’amatalaga fa’aopoopo fa’amolemole asiasi i le ‘upega tafa’ilagi a le Matāgaluega o le Soifua Mālōlōina (http://www.health.gov.ws) po’o le valaau o le telefoni numera 6008440.
Ua tapenaina foi e le Matagaluega o le Soifua Maloloina se lipoti mai i aso e fitu (7), e auiliili ai le tulaga o le KOVITI-19 ua iai nei Samoa ile Aso 12 o Iuni mai i le itula e 2:00 ile afiafi, e oo ile Aso 19 o Iuni i le 2:00 i le afiafi, 2022. O lenei lipoti o loo tu’ufa’atasia ma auiliili ai fa’amaumauga o le fa’amai talu mai le Aso 17 o Mati ina ua fa’amaonia le pepesi ai o le fa’amai i tua ile mamalu lautele o le atunu’u. Ua fa’amauina foi fa’amaumauga mo tui puipui ua maea fa’atinoina mo Samoa. Ua tuuina atu lenei lipoti ua saunia e le Matagaluega o le Soifua Maloloina mo le silafia e le mamalu lautele ole atunuu.
—MAE’A—
