TALA LATA MAI O LE PEPESI AI TUA O LE KOVITI – 19
Ua lipotia mai e le Matāgaluega o le Soifua Mālōlōina e to’a 40 i latou ua pesia i le siama o le KOVITI-19 e tusa ai ma fa’amaumauga mai le 2:00 i le aoauli o le Aso 19 Iuni i le 2:00 i le aoauli o le Aso 21 Iuni 2022. Ua si’itia ai le aofaiga oi latou (community & border cases) ua a’afia i le siama o le Koviti – 19 i le 14,812. E to’atasi (1) o lo’o taofia i le taimi nei i nofoaga fa’apitoa ae leai se tasi o i le Potu Tigaina (ICU) i le Falema’i i Moto’otua.
TAGATA UA MĀLILIU ONA O LE KOVITI – 19
Ua fa’amauina fo’i e le Matāgaluega o le Soifua Mālōlōina se maliu faaopoopo ona o āuga o le Koviti – 19, ma ua si’itia ai i le to’a 29 e ua māliliu i le fa’ama’i i totonu o Samoa. O le ua maliu o se ‘alu’alutoto e tasi (1) le tausaga le matua, e leai ni ona ma’i tumau ma e le’i agava’a e fa’atinoina tui puipui o le Koviti – 19.
I le fa’aaloalogia ma le amanaia o ‘āiga o e ua māliliu, o le a leai ai se isi fa’amatalaga fa’aopoopo e tu’uina atu mai lo tatou Mālō.
E toe tu’ualalo atu pea i le mamalu o Samoa ina ia tausisia pea le faia o tali fofoga, tutū ma le nofo vāvā mo le lua mita mai le isi tagata, fufulu mamā lima pe a mae’a ona tagofia ni meafaitino ina ia fa’aitiitia ai le so’ona pepesi o le siama.
E tumau pea fautuaga mo le atunu’u atoa ina ia aga’i i se falema’i lata ane mo le faia o lou tui puipui o le Koviti – 19, auā o le puipuiga sili lea mo i tatou e tete’e atu ai i le ma’ema’eā o lenei vairasi.
AOTELEGA O LE GALUEGA FA’AAUAU A LE MATĀGALUEGA O LE SOIFUA MĀLŌLŌINA MO LE PUIPUIGA O SAMOA MAI LE KOVITI – 19. O lenei lipoti sa tu’ufa’atasia mai le 2:00 i le aoauli o le Aso 19 Iuni 2022 se’ia aulia le Aso 21 Iuni 2022 i le 2:00 i le aoauli. Fa’amatalaga au’ili’ili o le tulaga o lo’o i ai le fa’ama’i i Samoa fa’apea le tuiga o lo’o tu’uina atu i le kalafi o lo’o i lalo. Ae mo nisi fa’amatalaga fa’aopoopo fa’amolemole asiasi i le ‘upega tafa’ilagi a le Matāgaluega o le Soifua Mālōlōina (http://www.health.gov.ws) po’o le valaau o le telefoni numera 6008440.
