TALA LATA MAI O LE PEPESI AI TUA O LE KOVITI – 19
I le lipoti a le Matāgaluega o le Soifua Mālōlōina mo lenei fitu aso (tasi le vaiaso) ua fa’amauina ai e 129 i latou ua pesia i le siama o le Koviti – 19 i totonu o Samoa mai le 2:00 i le aoauli o le Aso 19 o Iuni e agai atu i le 2:00 i le aoauli o le Aso 26 o Iuni, 2022. Ma ua si’itia ai le aofa’i o e ua a’afia i le fa’ama’i i le 14,901. Ua lipotia mai e le Matāgaluega, e leai se tasi o fa’anofoesea i nofoaga fa’apitoa i le Falema’i i Moto’otua fa’apea fo’i le Potu Tigāina (I.C.U.).
LATOU UA MĀLILIU I LE KOVITI – 19
E pei ona lipotia atu i le vaiaso ua mavae, i totonu o lenei fitu aso ua fa’amauina ai e to’atasi (1) le maliu fou ona o āuga o le Koviti – 19. O le ua maliu o se ‘alu’alutoto e tasi (1) le tausaga le matua, e leai ni ona ma’i tumau ma e le’i agava’a e fa’atinoina tui puipui o le Koviti – 19. Ma ua si’itia ai i le 29 e ua māliliu ona o le fa’ama’i.
I le fa’aaloalogia ma le amanaia o ‘āiga o e ua māliliu, o le a leai ai se isi fa’amatalaga fa’aopoopo e tu’uina atu mai le tatou Mālō.
E toe tu’ualalo atu pea i le mamalu o Samoa ina ia tausisia pea le faia o tali fofoga, tutū ma le nofo vāvā mo le lua mita mai le isi tagata, fufulu mamā lima pe a mae’a ona tagofia ni meafaitino ina ia fa’aitiitia ai le so’ona pepesi o le siama.
E tumau pea fautuaga mo le atunu’u atoa ina ia aga’i i se falema’i lata ane mo le faia o tui puipui o le Koviti – 19, auā o le puipuiga sili lea mo i tatou e tete’e atu ai i le ma’ema’eā o lenei vairasi.
AOTELEGA O LE GALUEGA FA’AAUAU A LE MATĀGALUEGA O LE SOIFUA MĀLŌLŌINA MO LE PUIPUIGA O SAMOA MAI LE KOVITI – 19. O lenei lipoti sa tu’ufa’atasia mai le 2:00 i le aoauli o le Aso 19 Iuni 2022 se’ia aulia le Aso 26 Iuni 2022 i le 2:00 i le aoauli. Fa’amatalaga au’ili’ili o le tulaga o lo’o i ai le fa’ama’i i Samoa fa’apea le tuiga o lo’o tu’uina atu i le kalafi o lo’o i lalo. Ae mo nisi fa’amatalaga fa’aopoopo fa’amolemole asiasi i le ‘upega tafa’ilagi a le Matāgaluega o le Soifua Mālōlōina (http://www.health.gov.ws) po’o le valaau o le telefoni numera 6008440.
O lenei lipoti o loo tu’ufa’atasia ma au’ili’ili ai fa’amaumauga o le fa’amai mai lava i le aso na fa’amaonia ai le pepesi atu ai i tua ile mamalu lautele o le atunu’u. Ua fa’amauina fo’i fa’amaumauga mo tui puipui ua mae’a fa’atinoina mo le mamalu o le atunuu. Silasila i le lipoti ua saunia e le Matagaluega ua tu’uina atu mo nisi fa’amatalaga.
—-MA’EA—
