O lea ua faaifo le tuamafa filimalae i tiaseu o alii, ae mapu i fisaga o tau lelei le sauniga aloaia faalemalo i lenei taeao. O lea foi ua maea ona taoto ma paepae ulufanua paia, o sa ma faiga faale atunuu, faale ekalesia ma paia faalemalo, i le malelega a lana afioga i le Ao Mamalu o le Malo. Ou te taofi, o lea ua to le matū palapala o le tapuaiga mau a le atunuu, aemaise lo tatou patipatia o le 60 tausaga o lo tatou Malo tutoatasi.
I lo’u tulaga o le Taitaifono o le Komiti o Tapenaga o le 60 tausaga o le Tutoatasi, e momoli atu le faafetai i le paia o le valaaulia i lo outou afifio ma tala aao mai. E ui ina faiva ese lenei sauniga mo le faamanatuina o lo tatou Tutoatasi, ae le vaea le fala ooto, pe toesea se iota o la tatou faataua o le faamantuina o lo tatou tutoatasi i tausaga taitasi.
Lau susuga i le Taitai o le Sauniga, e momoli atu le faafetai mo le tatou sauniga i lenei taeao, ua tomatauina ai le faamoemoe o le atunuu, ma le agai atu i le lumanai. Ia saga faatumu e le Atua lau utu, aua lana galuega paia.
Faafetai atu i le tapenaga o lenei faamoemoe, i itutino uma o le Malo sa tuufaatasia ma tapenaina le sauniga. O loo tumau pea le talenia o Alii ma Tamaitai o le Malu o le Malo. E ofo foi le loto, i le mafai ona faatino galuega mo le puipuiga, ma saga faaiila le taleni o le siva, ma le musika. E lelei foi lea, e faalalo ai toto maualuga ma le tino puta.
O le tatou polokalame mo le samiina o le tatou 60 tausaga, e tausaga atoa. Ma o le a maua le avanoa e silasila ai le paia o le atunuu i faafiafiaga o siva ma pese, taaloga ma isi polokalame togia o le a faataoto mo le tausaga atoa.
O le faamoemoe maualuga ia maua le soifua laulelei, ma ia tatou folau pea ma le faatuatua, a o tatou folau atu i le lumanai.
O faiva tapuaia, e a’e ma le manuia. Lea ua si’i i le tai le sa o le atunuu,e folau atu mo le isi 60 tausaga. Tatou folau ma le faatuatua i le Atua, aua ua na o Ia e goga ai tai sousou, ma lagomaluina ai fita o le tatou malaga.
Ia manuia polokalame uma o loo faatino e itumalo, afioaga ma alalafaga i lenei aso, mo lo tatou tutoatasi.
Ia faafualoa e le Atua le soifua o lau afioga i le Ao Mamalu ma le Masiofo, le Sui o le Fono a Sui Tofia, le tafatolu o le tatou Malo, Sui o Malo mai Fafo, le nofo a ekalesia, aemaise le paia o le atunuu o loo tapuai mai.
Ia manuia le faamanatuina o le 60 tausaga o lo tatou Malo Tutoatasi.
SOIFUA
