“Faaiuina o Faasalalauga mo Faalavelave Faafuasei”
Ou te faatalofa atu i le faafofoga maimoa mai a si o tatou atunuu. Faamalo le folau manuia, faafetai le pale. E tatou te viia le Atua i lana tausiga ma lana pule aoao ia Samoa, o loo tatou saogalemu ai pea, e ui i le tele o faigata ma luitau e o’o mai i le soifuaga nei.
O lenei ua tatou taunuu mai i le faaiuga o le piliota sa faamaonia mo le iai o le atunuu i faasalalauga mo faalavelave faafuasei lona 81, atoa ai ma poloaiga o vavao sa tuuina atu i le masina na te’a nei.
Pe a toe tepa i tua i le amataga o lenei galuega ina ua poia le lalolagi i le Koviti 19, o se savaliga umi, aemaise le tele o faigata sa o tatou tauasa mai ai. E le faapitoa mo Samoa nei faigata, ae ua aofia atoa le lalolagi. E le gata i tulaga tau femalagaiga faavaomalo, o fefaatauaiga ma pisinisi, galuega ma atinae mo le tamaoaiga o atunuu, o luitau o auaunaga faalesoifua maloloina ma aoaoga, ae faapea i latou ua maliliu ona o le faamai. O vala faagalogata ia, ua aafia ai atunuu uma, e aofia ai ma Samoa.
Peitai, e togo ae pea malama o pupula, ma e le tuulafoaina i tatou e le Atua. O lo tatou talitonuga maumaua’i, o loo tumau pea le tausiga alofa a le Atua ia Samoa ma ona tagata.
O faamaumauga lata mai a le tatou Matagaluega o le Soifua Maloloina, o loo atagia ai le tulaga faaititia o i latou e pesia i le faamai , a ua siitia maualuga pasene o i latou ua fai o latou tui puipui. O le taimi nei ua 93.6% i latou e 18 tausaga ma luga atu le matutua ua maea o latou tui puipui. Ua 92.4% o i latou mai 12 i le 17 tausaga le matutua ua maea o latou tui puipui, ae 91.4% i latou mai i le 5 i le 11 tausaga le matutua ua maea o latou tui puipui. O le maualuga ua iai nei o tatou tui puipui, o se tulaga lelei tele lea mo le puipuiga o le atunuu, e pei ona faailoa mai e a tatou fomai.
Ua maea ona fofoga le atunuu i le tatalaina o tatou tuaoi faavaomalo i le Aso 1 o Aukuso. O lea faamoemoe, e faataunuuina lava e pei ona fuafuaina.
I le lauliliuina o vala uma mo faasalalauga ma poloaiga mo faalavelave faafuasei e le Kapeneta ananafi, ua faaiugafonoina ai le faaiuina o faasalalauga mo faalavelave faafuasei atoa ai ma poloaiga uma sa tuuina atu i lalo o lenei faasalalauga. O lenei faamoemoe, e fa’ata’imua i le agai atu o le atunuu i le tatalaina o ona tuaoi faavaomalo i le Aso 1 o Aukuso.
I le aveesea ai o faasalalauga ma poloaiga mo faalavelave faafuasei, o le a toe se’e atu ai i tulaga masani le faatinoina o galuega a le Malo, i aiaiga o tulafono o loo faafoe ai auaunaga mo le atunuu, e pei o le Tulafono mo le Soifua Maloloina, Aoga ma isi auaunaga a le Malo.
O le tulaga i le ulufale mai o tagata i le atunuu e afua atu i le Aso 1 o Aukuso, o le a faafoe aiaiga e tusa ma Tulafono a Itutino eseese o le Malo o loo feagai ma o tatou tuaoi faavaomalo.
E afua atu i a Aukuso ona siitia malaga a vaalele e taunuu mai i Samoa i vaiaso taitasi, ma faasolosolo atu ai lava i le lumanai. Peitai o le a lē tuua le mataituina ma le tulituliloaina o galuega tau i le puipuiga o tuaoi faavaomalo ma le saogalemu o le atunuu, e aofia ai foi ma galuega faalesoifua maloloina.
Samoa e, e le mavae le agaga faafetai i lo outou sao taua i le puipuiga o le atunuu mai le faamai. O ni taga e fai i vasa, ma ni tonu e le tuā le taumafai atu o le Malo, pe ana leai lo outou finagalo e lagolagosua i lenei galuega. Lea ua taoto ata o matagofie, i le agalelei mai o le Atua. Ua mafai ona tatou soifua i totonu o faigata o le Koviti.
Le tapuaiga a lau afioga i le Ao Mamalu o le Malo, faafetai le faatoatoa a o feagai le tatou Malo ma taumafaiga uma mo le puipuiga o le atunuu mai le faamai.
E le faagaloina le sao a le pulega mamalu a alii ma faipule aua nuu ma afioaga, mai lava i le amataga o lenei faamoemoe seia oo mai i lenei itu aso. Faafetai le soa, faamalo le tofa ma le uta, na malu ai a tatou taumafaiga uma.
Le paia o Taitai o Ekalesia i le atunuu, aemaise le aufaigaluega totofi a le Atua, faafetai le tatalo, faamalo le tu’itu’i pea o le lagi, ia manuia Samoa ma ona tagata, a o tatou i iai i luitau o le faamai.
Le aufaigaluega a le Malo i alii ma tamaitai fomai ma tausi soifua, aemaise le Komiti o Faalavelave Faafuasei, faamalo le galulue, faafetai le fai taulaga mo si o tatou atunuu. Ia faamanuia le Atua i lo outou faiva.
E faafetaia foi le Vaega Tumaoti ma Pisinisi uma i le atunuu i lo latou sao e lalago faatasi ma le taumafai atu o le Malo. Faamalo le galulue, faafetai le onosai ma lo outou finagalo alofa ia Samoa.
E le itiiti le faafetai ia tatou paaga mai fafo, i lo latou sao taua i taumafaiga uma a le tatou Malo mo le puipuia o le atunuu, mai lava i le amataga o lenei galuega e oo mai i le asō, o loo tatou nutimea faatasi pea. Tatou te tatalo, ia saga faamanuia ma taui e le Atua lo latou agalelei mai i a Samoa.
Ia agalelei mai le Atua i lo tatou agai atu i le tatalaina o tatou tuaoi faavaomalo i le aso 1 Aukuso. Ia aualiitia e lona mana, tapenaga uma.
Ia manuia lau tapuaiga Samoa.
SOIFUA.
