AFIOGA OLO FITI AFOA VAA’I
MINISITA O GALUEGA, FELAUAIGA MA ATINAE TETELE
ASO LUA 09 AUKUSO, 04:00 PM
______________________________________________________________________
Lau Susuga i le Taitai o le Sauniga, Lau Afioga I le Tiakono Etilasi Eti
Afio lau Afioga I le Tamaitai Palemia o le Malo Tutoatasi o Samoa; lau Afioga Fiame Naomi Mataafa
Afifio Minisita o le Kapeneta
Afio Lau Afioga I le Fofoga Fetalai ma Sui Mamalu o le Palemene
Afio Lau Afioga I le Faamasino Sili ma le mamalu I le Faamasinoga
Afifio outou Afioga I Faauluuluga o le Faletupe o le Atinae o Asia
Afifio Sui o Malo mai Fafo
Afio lau Afioga i le Taitaifono ma le Komiti Faatonu o le Pulega o Uafu ma Taulaga
Faauluuluga o Matagaluega ma Faalapotopotoga Tumaoti a le Malo, Fauluuluga o Pisinisi Tumaoti
Le paia ma le mamalu o le Auvalaaulia, Alii ma Tamaitai
______________________________________________________________________
O le a ou le toe seutafilia le na’a, pe ou te toe tailia tulafagā i paia sausaugatā o lenei aso. Auā o lea ua a’e i le ti ae ifo i le nonu ma fetaiaiga i le ala i Fuiono, ina ua taitai manuia mai lo outou soifua ma so matou ola i le alofa ma le agalelei o le Atua. O paia o Matautu nei, paia tauave o Sinave ma Ulu-o-motootua, afioaga o Tama Alo o Sina, Fuaifale o Salevalasi, afifio i laua Matua ma Aiga, le Faletolu ma le Vainalepa ma upu ia Tuisamau. O paia o le tafatolu fefaatauagai ole faigamalo i le Afifio o Minisita o le Kapeneta, Afio Lau Afioga i le Fofoga Fetalai ma sui mamalu o le Palemene, afio lau Afioga i le Faamasino Sili ma le mamalu o le Faamasinoga. O paia o Samoa mai le papa nai taū seia paia le papa na susu, o paia lava lea i Aiga ma Tama, o Tama ma Aiga, le usoga a Pule ma Tumua, Ituau ma Alataua, Aiga i le Tai ma le Vaa o Fonoti.
Ua malama ulugalu ai le tatou fesilafaiga, auā ua mae’a tu’ulaupua Paia o le Atua, pei ona sa fitaituga i ai le Susuga i le Faafeagaiga, o le latou fatuaiga tausi lea, auā se manuia o Samoa. Faafetai le fai tatalo, faafetai mo le manavaga paia ma talosaga e tomatauina ai lenei faamoemoe.
Ae o le agaga o le meemee ma le fiafia, ina ua mafai ona tatou tapuvae e tasi mai i Matautu-tai nei, mo le faapaiaina ma tatala aloaia le Vaa Tosovaa fou a le Pulega o Uafu ma Taulaga ua faaigoaina o le SA’ULA-60 lea sa faatupeina e se tasi o paaga faavaomalo a Samoa, le Faletupe o le Atinae o Asia.
O lenei Vaa Tosovaa o se vaega o le Atinae mo le Siitia o le Saogalemu, le Puipuiga malu ma le Gafataulimaina ona tali atu I aafiaga o suiga o le tau o le Uafu faavaomalo I Apia, lea o loo faagasolo nei ma o loo faatupeina I se fesoasoani na agalelei mai ai le Faletupe o le Atinae o Asia.
O se tasi nei o mea faigaluega e moomia tele e le Pulega o Uafu ma Taulaga mo le faatinoina o le faapipiiina ma le toe aveeseina o vaa. O le maea ai ona fausiaina lenei vaa fou o le a siitia maualuga ai le gafatia e le Pulega o Uafu ma Taulaga ona taulimaina vaa tetele e iai vaa lau oloa, vaa suauu, o vaa laupasese ma meli e moomia ona afea le tatou uafu I Apia.
O le upu a le atunuu, a fesoota’i le lau ma le lavelau, ua o’o i le āuāu, ona faatoa mafai lea ona ta’ua ua au le inailau. E faapena lenei miti, o se faamoemoe sa taumate pe tua mani a, ae faafetai o lenei aso ua tepa I ula tagai I ula ma ua maualuga ai lava le viiga o le Atua.
I le tapunia ai o tauofoga, e lima kamupani fauvaa mai Europa, Saina ma Hong Kong na tuuina mai tauofoga, ae i le maea ai o iloiloga a le Komiti o Iloiloga, na tuuina atu ai le fautuaga I le Komiti o Tauofoga ma le Kapeneta mo le tuuina atu o le konekarate mo le fausiaina o le vaa tosovaa fou I le kamupani o le Cheoy Lee Shipyards I Hong Kong I le tau e USD$5,150,000.00 tupe Amerika e aofia ai le fausiaina o le vaa, o le momoliina mai o le vaa I Samoa faatasi ma le faatinoina o aoaoga mo le aufaigaluega a le Pulega o Uafu ma Taulaga.
Na maea le fausiaina o le vaa I le Faaiuga o le masina o Iuni 2022 ma faatinoina ai faataitaiga I lalo o le vaavaaiga a le kamupani o le Lloyds. O le Aso 2 o Iulai 2022, na tuua ai e le vaa Vietnam mo lana malaga faataupou mai I Samoa. Na faa-auvaaina mai le malaga e le auvaa e toafa mai le kamupani o le Redwise mai Holani, faatasi ma le kapeteni ma le inisinia mai le Pulega o Uafu ma Taulaga mo aoaoga ma faamasani mai ai I vaega uma o le vaa. O le Aso Sa 31 Iulai 2022 I le itula e 4:00 I le afiafi na taunuu manuia mai ai le faigamalaga a le Sa’ula-60 I laufanua o Samoa.
O le igoa o le vaa o le SA’ULA-60 na faamaonia e le Kapeneta I le aso 23 Mati 2022 FK(22)10 I luga o le fautuaga a le Pulega o Uafu ma Taulaga. O le Sa’ula o se tasi o ia e maua I gataifale o Samoa ma o se ia foi e saili e le au faifaiva I a latou faatamasoaliiga. O le faaopopoina iai o le fuainumera 60, o se faaaloalo lea mo lenei tausaga o loo faamanatuina ai le atoaga o le 60 tausaga o le Malo Tutoatasi o Samoa.
O lenei atinae o le a faamanuiaina ai tagata nuu o si o tatou atunuu aemaise lava i latou o loo faaaogaina le uafu ma e o loo fai paaga ma le Pulega o Uafu ma Taulaga. O le a gafatia ona taulimaina soo se vaa e fia afea le tatou uafu I Apia ma e gafatia foi ona tali atu mo se faalavelave I luga o ogasami o Samoa. O le a saogalemu le faatinoina o lenei auaunaga o le faapipiiina mai ma le aveeseina o vaa ma o le a siitia foi le silafia ma le iloa o le aufaigaluega ona o tekonolosi fou o loo faaaogaina I luga o lenei vaa.
O se tasi foi lenei o vaega o le vaai mamao a le tatou Malo, ae le gata i lea, o se sini autu e tatau ona ausia a le Pulega o Uafu ma Taulaga, o le faaleleia lea o auaunaga tau uafu ma le gataifale aua le siitia o le tamaoaiga.
E faafetaia le Faletupe o le Atinae o Asia e tauala atu I lona ofisa I Samoa nei aemaise ua talafeauga lenei faamoemoe ma le malaga mai o Faauluuluga o le Faletupe mo le Itulagi o le Pasefika mai i lona ofisa autu I Manilla aemaise o Suva I Fiti.
Faafetai I le kamupani fauvaa o le Cheoy Lee I Hong Kong sa nafa ma le fausiaina o le vaa. Faafetai foi I kamupani faufautua faapitoa o le Haskoning mai Vietnam sa fesoasoani I le tusiaina o ata ma le faamautuina o vaega moomia mo le vaa.
Faafetaia foi le Afioga I le Taitaifono; lau Afioga Tuiloma Neroni Slade ma le Komiti Faatonu, le Pulega ma le Aufaigaluega mo le taulagalaga ma le lagolagosua ua faataunuuina ai I le manuia lenei atinae tele a lo tatou Malo. E le faagaloina foi le sao taua o le Matagaluega o le Va I Fafo ma Fefaatauaiga faapea ma le Matagaluega o Tupe mo le latou pitolaau I faatalanoaga faavaomalo ma isi vaega e tele sa faatinoina e nei Matagaluega a le Malo. Malo Galulue.
Ia faamanuia mai le Atua I lenei atinae ina ia fesoasoani tele mo le atinae manuia o Samoa I le lumanai.
Soifua.
