I. FAATOMUAGA:
E talitonu ua maea ona momoli la tatou faapolo male faasagi, e sulaina ai le alofa ma le agalelei o le tatou Tapaau Sili ile Lagi, ua mafai ai ona faatinoina male manuia lenei galuega sa fauao ma faupo.
Faafetai tele i lau Susuga ile Tausi Matagaluega, po’o lau Afioga foi ile Sea, Rev Falefia Tupu, Ekalesia Metotisi Fogasavaii, mo le tatou sauniga lotu e tomua ma faamanuia ai ele Atua mamana lenei Ofisa fou. Faafetai tele mo upu faa-laeia’u ua tomatauina ai le faamoemoe ole tatou Matagaluega i lenei aso. Malo sauni, Malo Tapena. Ia faamanuia pea le Atua i lau Susuga aua le feagai ai ma le tala’iina o lona finagalo i totonu o le Ekalesia ma le Matagaluega.
Ae O le a taoto ia fa’amaene o tai loloto paia sausau gatā o Samoa i le amata mai Saua i le tai samasama o le Tuimanu’a, se’ia pa’ia le lualoto o Nafanua na tauilo ai Malo.
O paia lava ia e fa’asino aua Aiga ma a latou Tama, o Tama ma o latou Aiga, le usoga a Tumua ma Pule, Itu’au ma Alataua, Aiga i le Tai ma le Va’a o Fonoti.
2. AUGA OLE ASO:
Ua o tatou ofaga potopoto mai i lenei taeao liugalua, tatou te molimauina le tatala aloaia o le Ofisa ale Matagaluega o Galuega, Fela’uaiga ma Atinae Tetele i luga o le Maketi nei i Salelologa. I le tau amata mai o lenei galuega, sa valaau ni tauofoga e saili ai se konekarate fau fale latou te faia lenei Ofisa ia Me 2022, ma na’o I latou lava e alala ma papaa’ao i Salafai nei, e agavaa e tuuina mai tusi tauofo. E tusa ai ma aiaiga ma taiala ale tatou Malo, o lea na tuuina atu ai i le Afioga ia Fonoia Siaosi Fonoia na te faatinoina lenei galuega ile tau aofai e SAT $22,249.90 e aofia ai le lafoga VAGST.
E le’o po se lilo, o lo’o iai le Ofisa a le Matagaluega ile taimi nei ile lotoā le Pulega o le Laueleele (LTA) i le isi pito o Salelologa lava. Ua iai le fuafuaga ina ia faasee mai le Ofisa i luga nei ole maketi, ona ua fai si va apiapi ole nofoaga o lo’o iai le Ofisa ile taimi nei. Ae le gata i lea, ua iai le manatu o le a faigofie ele mamalu o si o tatou motu nei, ona afea lenei nofoaga mo mataupu e patino tonu ile Matagaluega o Galuega, Fela’uaiga ma Atinae Tetele. E avea foi lenei laolao e faaleo atu ai auaunaga a le Matagaluega o le a faatinoina I totonu o lenei Ofisa. O le a aofia ai le Vaega ale PUMA i Talosaga mo Maliega Tau Atinae (Development Consent Applications) faatasi ai ma le Vaega o Fale i Talosaga mo Pemita o Fale (Building Permit).
Ua iai le foi le fuafuaga, o le a siitia le auaunaga ale Matagaluega I le tatou motu nei, aua e iai le talitonuga, o mea e lelei mo Upolu, e lelei foi mo Savaii. Mo le ausia o lea tulaga, o le a iai se au faigaluega tumau e alala ma pāpāa’ao i Salafai nei, ma o le a lē tau toe omai nisi mai i Tumuā e faigaluega i inei. O nisi o mafuaaga sa faigata ai ona atoa le auaunaga, o le faigata ole femalagaa’i ma le lē avanoa o le au faigaluega ona o nisi o tiute faa le aiga. O lenei faiga o le a mafai ai ona tatala le tatou ofisa mai le Aso Gafua ile Aso Faraile mai le 9 ile taeao se’i pā’ia le 5 ile afiafi. O le naunauta’iga lava, ia maua se faamāmā avega mo le mamalu o le atunuu e ala lea ile lē tau afifio atu i Apia Avea foi lenei taimi e faafetaia ai lau Afioga ile Alii Minisita ole Faalapopotoga o Eleele Samoa po’o le Samoa Land Coporation, le Pule Sili ma le Pulega, ona ole faa avanoa mai o se vaega o le maketi nei i Salelologa, mo le faia ai ole matou Ofisa.
3. UPU FAAIU
Ia alofagia e le Atua lenei faamoemoe ma ia iai pea ona faamanuiaga ile aufaigaluega ma i latou uma o le a faaaogaina lenei Ofisa. Sau foi se taimi, tatala le fili Alii, ia puipui ma ia malutia ala uma o le a tatou uia. Manuia tele lenei faamoemoe
SOIFUA MA IA MANUIA
