Aso Sa, 4 Setema, 2022
Maota o Tupulaga Talavou EFKS, Sogi
Lau Susuga i le Taitai o le Sauniga – Lau Susuga Dr Mosese
Lau Afioga i le Ao Mamalu o le Malo ma le Masiofo
Lau Afioga i le Sui o le Fono a Sui Tofia
Lau afioga i le Sui Palemia ma Minisita o le Kapeneta
Faapea Minisita Lagolago
Lau afioga i le Fofoga Fetalai ma Sui Mamalu o le Palemene
Lau afioga i le Sui Faamasino Sili ma Alii ma Tamaitai o le Faamasinoga
Faauluuluga o Matagaluega ma Faalapotopotoga Tumaoti
Your Excellency – The Rt Honourable Dame Cindy Kiro – Governor General of New Zealand.
Members of the Diplomatic Corps
Le paia o le aufaigaluega totofi a le Atua ua tatou faatasi
Le paia o Samoa ua potopoto i ona tulaga faalupe
Malo le soifua laulelei, faafetai le folau manuia.
O lea ua to’a i tumu-o-malama le tatou taulaga osi e pei ona saunoa iai le Taitai o le sauniga. O lenei aso, sa tapuai si o tatou atunuu i fata e fia, e faafetaia le pule alofa a le Atua i la tatou savaliga, lea ua o tatou taunuu manuia mai ai i le masina lona iva o lenei tausaga.
O le afiafi nei, o le amataga o le isi vaega taua o la tatou polokalame o loo faasolo mo le faamanatuina o le 60 tausaga o lo tatou Malo Tutoatasi, o loo faaauau mo le tausaga atoa. E pei ona masani ai i tausaga taitasi, o le vaiaso muamua o Setema e tatala ai le polokalame mo le faamanatuina o le Teuila. Peitai, o lea ua sooula faatasi i lenei tausaga le fuafuaga, ma avea ai ma polokalame mo le Tutoatasi.
O pese ma viiga o le Atua, o le taulaga e nanamu i luma o le Nofoalii o le alofa tunoa. O la Tavita, lo’u agaga e, faamanu atu ia Ieova, o mea uma foi o i totonu ia te au, ia faamanu atu i lona suafa paia. O viiga o le Atua, e momoli e le faauuga a lona Agaga Paia. O le ala lea e lauga ai le pese, e faamafanafana, e faamalosiau, ma faalototele.
E tele aufaipese iloga i le atunuu aua e siufofoga lelei ma talenia o tatou tagata. Ae tulaga ese fatuga ma viiga o le Atua, aua e o’oo’o le feau ma le agaga o upu ma fati, e sufi ai o tatou mauli e tapuai i le Atua ma le faamaoni, e faamalosiau mai i o tatou tigā ma fitā o le savaliga, ma fa’autu ai le loifofoga maligi ona o le faanoanoa.
O nai upu o nisi viiga o le Atua e faapea ‘Ave lo’u ola ia aoga, le Alii e, mo au feau’. O oe o lo’u malamalama, Iesu e, Iesu e; ua soona olioli lou loto ia Iesu; pe solo mai mauga ma luluina mea uma, ou te le fefe, aua o loo tautai oe le Atua. O nei upu e faatupu ai lo tatou faamalosi ma le lototele, tatou te folau pea ma le faatuatua.
O le afiafi nei, ua maua le avanoa e mafai ai ona o tatou molimauina faatasi pesepesega a aufaipese mai le Kolisi Faafaifeau i Malua, Piula, ma Moamoa, faapea le Ekalesia Mamona ma le Ekalesia Nasareta. Ou te manatu, o se laasaga taua tele lenei mo i latou o loo aotauina mo le galuega a le Atua, e saga faaiila taleni mo ona viiga. E faapea foi i tatou uma.
Ou te faafetai atu i le paia o Ekalesia ma le nofo-a-pule o Kolisi o le a faisao i lenei afiafi, i lo outou talia o le faatalauula atu a le Komiti o le Tutoatasi, tou te lagiina viiga o le Atua i lenei afiafi. Faafetai tele le lagolagosua i le faamoemoe o si o tatou atunuu.
Ia manuia le faamoemoe, ma ia au aliitia e le Agaga o le Atua tapenaga uma a aufaipese, ina ia o’o i le Nofoalii la tatou viiga ma le faaneetaga i lenei afiafi.
Le faafofoga maimoa mai a si o tatou atunuu, ia mālie i la outou faafofoga pesepesega o lenei afiafi, a ia sili ona lagi mālie i le Atua.
Ou te faasilasila atu ai, ua tatala aloaia le polokalame o pese faaleagaga mo le faamanatuina o le 60 tausaga o lo tatou Malo Tutoatasi, i lenei afiafi.
SOIFUA.
