O le a taoto ia i le vaomalu le tao lē apoa aua ua lalafo ata i vanu. Ua lologo foi le fua ma le pao e pei o le fetalaiga i le taeao nai le Alataua. E leai sē toe faamamali i lenei taimi aua ua tau fai sunu’i ao o le lagi i le e’e pāpāa’ao o le paia ma le mamalu o lo tatou atunuu o Samoa.
Faatulou atu i le Paia o le Itupa o Sa Levi o loo tala faauto i soo se fata faitaulaga auā se manuia mo Samoa, Tulou le afioga i le Ao mamalu o le Malo ma lau masiofo, Afioa lau Afioga i le Sui o le Fono a Sui Tofia ma lou Faletua, Afio lau afioga i le Faamasino Sili ma le Vasega o Faamasino, Afio lau afioga i le Fofoga Fetalai ma sui mamalu o le Maota Fono o Samoa, Tulouna foi lau afioga i le Palemia ma lau Kapeneta. Tulouna le afifio o Tama ma Aiga, o Aiga foi ma latou Tama. Le usoga a Tumua ma Pule, Ituau ma Alataua, Aiga i le Tai ma le Vaa o Fonoti.
Tulou, Tulouna lava.
Ae ia te au le ava tele e momoli atu ai se upu e tusa ma le alofaiva o alo ma fanau aoga i lenei tausaga. O lea ua api le uli, ma ua lata foi le taimi e iloilo ai taumafaiga a le fanau i soo se itu faaleaoaoga mo lenei tausaga.
Sa o tatou fetaiai ma souā o le vasa, ma faigata o le faamai o le Koviti e pei ona sa aafia ai a tatou taumafaiga i le amataga mai o lenei tausaga. Ae ui i lea, sa outou lē faavaivai ai. Malo le finau ma le onosai.
Faamalo atu foi i pule aoga ma le vasega o faiaoga mo la outou pitolaau e lē faigofie. Faafetai le tautua malo, faafetai le tautua atunuu.
Ae o le tuualalo ma le faaoloolomaau lava a le Matagaluega ma le tatou Malo, matua e, o lo outou taimi tāua lenei. Tautuana ane le fanau ia lava tapena o latou mafaufau ma agaga auā faigasuega o le a alo atu ai. Tautuana a latou ofu aoga, o peni ma api, ma ia fesoasoani i a latou tapenaga. E iloa gofie le matua alofa moni i itu aso faapenei.
E lē aoaia e le matapia le Manaia, ae o se taulogologo ina ia lava saunia o outou alo ma fanau, ae o alo atu mo suega faaiu o lenei tausaga.
Toe avatu foi se talosaga I le mamalu o komiti o aoga taitasi ina ia taulai lava la outou silasila ina ia aua nei faalavelaveina nai alo ma fanau o le a feagai ma suega, auā o le upu moni e iai le aafiaga i tapenaga a fanau pe afai o le a muamua ona popona i le taumafaiga a matua mo sailiga i ni taumafa e sasao atu. O tu ma agaifanua ua masani ai Samoa i lana talimalo, ae o le fesili, pe faamata e lapelapea ai tapenaga a le fanau? O le muagagana a le tatou atunuu, aua nei popona I le atu o le tuā’au ae faagalo ai figota o le aloalo.
Faatai so matou leo o le a foi mai. Afai ua pa’opapa se upu i lau fafofoga, ia alofagaia ia lafo i Fogavaatele. Ae talosia ia uluulumatafolau le faamoemoe ina ia faataunuuina ma le manuia taumafaiga uma mo alo ma fanau lalovaoa mo Samoa ma so tatou lumanai manuia.
Ia faamamalu mai aao o lo tatou Matai Sili i le lagi i luga o Samoa atoa. Soifua, ma ia manuia.
