Lau Susuga i le Taitai o le Sauniga, Lau afioga Patele Louis Anthony Mataia Europa,
Lau afioga i le Sui o le Fono a Sui Tofia,
Lau afioga i le Tamaitai Palemia ma le Kapeneta, ma Minisita Lagolago,
Lau afioga i le Fofoga Fetalai ma Sui Mamalu o le Palemene,
Lau afioga i le Faamasino Sili ma Alii ma Tamaitai o le Faamasinoga,
Members of the Diplomatic Corps poo Sui o Malo mai Fafo,
Faauluuluga o Matagaluega ma Faalapotopotoga a le Malo, o Pisinisi ma le Vaega Tumaoti,
Le Paia o le Aufaigaluega Totofi a le Atua,
Le mamalu maualuga ua potopoto i lenei taeao,
Ae tainane le paia o Samoa o loo maimoa ma faafofoga tapuai mai i maota ma laoa, ma soo se tafa o le lalolagi. O le paia auā Aiga ma Tama, o Tama ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.
Ou te faatalofa atu i le tapuaiga a le Faigamalo a Tutuila ma Manu’a, i le afio o le Kovana Sili aemaise le Tafatolu o le Faigamalo. O le paia lava lea auā Sua ma le Vaifanua, Fofo ma Aitulagi, Sa’ole ma le Launiu Saelua, afifio Faatui, ma Tootoo, ma upu i le Manu’atele. Ou te talitonu ua toe faaolatia manuia i fanua le faigamalaga i le maea ai o le fonotaga a le Atoa o Samoa i le vaiaso na te’a nei. Faamalo le Soifua manuia.
Faafetai i le Taitai o le Sauniga, lau Afioga Patele Louis Anthony Mataia Europa, mo le manavaga paia ma au faamanuiaga. Ia faatumuina pea lau utu e le Agaga Paia.
O lea ua mae’a ona mua mea i Matā’utu Sā, ma tapui ai sā o lo tatou Vā Tapuia ma lo tatou Mātai Sili i le lagi. Auā ua sopo-i-malama le soifua o le atunuu ina ua alasea’e le alii o le lanulauava, ae lōfia mauga taliutu. Ua fesilafa’i ai i manū le Maota Fono o le atunuu i lenei taeao fou, ona o le faamoemoe tu maualuga o lau Palemene.
Ua atoa tino o Vaatausili i lo outou tala aao mai ma le faamalo’ulo’u mai e faamamalu ma molimauina lenei sauniga. Ua sufi gatā se lagona o lenei ituaso, auā le mapu’e ma le maualuga o lenei faamoemoe. A o ai ea le tagata faatauva’a ma lona aiga, ua tau falaula ai le paia o le Fono Aoao Faitulafono a Samoa? Ou te talitonu, o le tofa faasau ma le moe na saili i le Atua, ua mafua ai lenei tofiga.
Lau afioga i le Fofoga Fetalai, o le agaga faafetai e momoli atu, aua ua mavae atuvasa souā ma luitau sa o tatou fetaia’i. A o ai ea na apoina le ti-na-toa ma le ti-na-ava, a o folau mai le atunuu i na atuvasa? Ua na o le Atua o loo faavae ai Samoa sa ta’i ma faatonu folau. Le Atua e, ia foi atu le viiga ma le taulaga o faaneetaga i lau afio e faavavau.
E ui lava i so’u vaivai ma se lē atoatoa, ua ou taliaina ma le loto maualalo i luma o le Atua ma lenei potopotoga mamalu le toe tofiaina o a’u ou te tauaveina lenei tofiga maualuga o le Malo ma le atunuu.
O upu masani i faiva o le gataifale, “E poto ā le tautai, ae lē atoa atu i liu o vaa.”
O le mea moni, e tusa ma se tasi o lafoga e uiga i lenei tofi, o le avega ma le faafafa, pe a fua i mea na tutupu i le tatou folauga i le uluai lima tausaga na ou tulai mai ai i le tofi. Ae ua liua ma avega māmā ina ua ou maua le loto tele ma le faatuatua i le faalaeiau mai o Keriso, ua vasaga lelei ai ma le sini autū o lā tatou folauga i lenei vaitau, ma le faamanatuina o le onosefulu tausaga o le Tutoatasi o lo tatou Malo, o le “Folau ma le Faatuatua i le Atua. O le mea lea ou te faatuatua ai pea i le Mana ma le Taitaiga a le Atua, o loo faamalosi’au mai i Ana afioga pa’ia, “O lo’u nei alofa tunoa, e lava lea e fesoasoani ia te oe: auā o le vaivai e faaatoatoaina ai lo’u mana.” O le alofa tunoa lea e avanoa tutusa i ai tatou uma ua fai Iesu Keriso mo tatou Alii ma Faaola.
Samoa e, aumai le Alofa o le Atua tatou te laei ma oofu ai, tatou te fe’oe’oea’i ma fefaamagaloa’i ai, ma tuliloa faatasi se ‘ai mo Samoa, o ō tatou aiga, nuu ma Ekalesia. Auā e leai se filemu moni tatou te maua i le fefulituaa’i ma le fefaamasinoa’i. Ou te faamoemoe foi o le a tatou tau fai tatalo ma anapogi, ma outou aumai le tuualalo, ma le fesoasoani, e lagomalū ai lo’u toe tulai mai i lenei tofiga. Aua nei galo ia te i tatou, o ā ni faigata e tulai mai o le soifuaga, o le Paolo o Lē e ona le malosi uma lava, e malutia ai pea Samoa mai luitau ma puapuaga matuiā o loo matuā lutia ai le tele o atunuu o le lalolagi. E leai lava se mea e faigata i le Alii, auā o Ia o le Punāvai o lo tatou malosi, o lo tatou poto, o le tamaoaiga, ma faamanuiaga uma. Ia faafoi atu ai pea le viiga i Lona Suafa Paia.
Lau Afioga i le Tamaitai Palemia lau Afioga Fiame Naomi Mataafa ma le mamalu o le Kapeneta, lau Afioga i le Fofoga Fetalai lau Susuga Papalii Taeu Masepa’u ma Sui mamalu uma o le Palemene, faapea le Vaega Faaupufai o le Faatuatua i le Atua Samoa Ua Tasi, i le agaga maulalo ou te momoli atu la’u faafetai. O lā outou tofa faatupu, ma lō outou faatuatuaga, o lea ua toe filifilia ai lo’u tagata faatauvaa, ou te tauaveina le tofiga o le Ao o le Malo Tutoatasi o Samoa mo le isi lima tausaga. O le upu moni, o ai ea le tagata ua outou manatu ane ai? O lenei ua ou pale, ua ou ula, ua ou titi foi, ona o lā outou faaeaea ma lā outou faaaloalo. O lau tou pule lea.
Ou te faamalo atu foi i lau Afioga i le Tamaitai Palemia ma le faigamalo, faapea lau Afioga i le Fofoga Fetalai ma le Fono Faitulafono, i lō outou fitaituga i le taitaiga ma le faafoeina o lo tatou Malo, auā se manuia o le atunuu. Faafetai le faatoatoa, malo le tauivi.
Ou te faafetai atu i lau Afioga i le Faamasino Sili, lau Afioga Satiu Simativa Perese mo le faataunuuina o le sauniga o le faatautoga i le aso. Ou te faamalo atu foi i lau Afioga ma le Vasega o le Faamasinoga, i lō outou gapatia i le sailiga ma le faamautuina o le mea moni ma le amiotonu e tusa ai ma le Tulafono. Faafetai le galulue ma le onosai.
Ou te faafetai atu foi i lau Afioga i le Sui o le Fono a Sui Tofia, lau Afioga Le Mamea Ropati Mualia i le galuega lagolagosua i le tofiga o le Ao o le Malo. Faamalo le tapuai ma le tatalo.
Ou te faafetai atu foi i le Aufaigaluega totofi a le Atua i fata faitaulaga e fia. O loo outou toele i le Atua ina ia tumau Ona aao alofa ma Lona filemu i luga o Samoa, faapea le Malo. Faamalo le nono manu ma le tauasuina o le ipu vai o le ola.
E faafetai atu foi i Faauluuluga ma le Aufaigaluega o Matagaluega ma Faalapotopotoga a le Malo, o Pisinisi ma le Vaega Tumaoti, ona o la outou auaunaga ma le lagolagosua i soo se auala mo le manuia ma le puipuiga o le atunuu, aemaise lo outou fesoasoani mai, ina ia mafai ona faataunuu tiute ma matafaioi o le tofiga o le Ao o le Malo. Faamalo le onosai. Faafetai le tautua.
E faapea foi ona ou faafetai atu i lō tatou atunuu atoa, i le āfua mai i mauga tetele, seia paia mauga iti, i Samoa nei ma atunuu e mamao. O loo sisila mai fofoga o le Atua i la outou tapuaiga, aemaise ō outou sao eseese mo le manuia o aiga, o nuu, o ekalesia, o le Malo, ma le atunuu. Ua faamalo le tautua, faafetai foi le tatalo.
E lē faaitiitia foi le agaga faafetai i ō ma’ua aiga, o uo, aemaise o ō ma nuu, ma ō ma itumalo. E le o lilo outou uma i le silafaga a le Atua. Ua outou faia lava le tapuaiga a le Feepo; ua outou tu’i le mulipapaga, ma po le fala, ma feula le mulilā, e oo mai lava i lenei taeao. Ua ma talitonu foi, o loo outou manatua i ma’ua i au tou tatalo ma anapogi o loo faia pea. Faafetai tele le alofa ma le faamaoni.
Le Atua Mamana e, liligi mai au faamanuiaga i luga o le Malo o Samoa, ma lenei faapotopotoga mamalu. Ia tōtō ifo fa’aua Lou alofa tunoa i luga o lo matou atunuu pele ma ona tagata uma. Matou te tatalo atu foi, e tusa ma Lou Finagalo, ia e faamanuia i lou nuu filifilia o Isaraelu, ma le lalolagi atoa; ina ia tasi matou uma i le filemū moni ma le manuia mai ia te Oe, e ala ia Iesu Keriso lo matou Alii ma le Faaola.
Le mamalu tele o lenei aofia, afai o le a tuuama le fua ma tala le fili alii i lenei taeao, ia mūa’au ma muli’au le Atua i ō outou ala ma faamoemoega uma. Ia manuia foi le alofaiva o le Palemene i lana fonotaga i le asō, faapea le tapuaiga a le atunuu.
O lā le Fai Salamo, “ O oe le Alii e, ua fai oe mo’u talitā, o lo’u mamalu fo’i, ma Lē faaeaina lo’u ulu”.
Ia tau ia ina ia faaogaina i ma’ua e le Atua, o ni meafaigalueaga ma ni auauna, e auala mai ai Lona alofa ma Lona filemu ia Samoa.
SOIFUA MA IA MANUIA.
