O lo ua mapu nei i falematū le ali’i seu sa polo fa’asoa auā le Upu folafola a le Atua, talosia o se fatu e paū i le eleele lelei ina ia tupu ma ola talaulau ma fua tele mai auā le malō o le Atua.
Fa’afetai tele i lau Susuga i le Fa’afeagaiga Taulagi mo le tapenaga e tusa o le Taulaga osia. Ia fa’amanuia pea le Atua i le feagai ai ma le galuega.
O lo ua motu nei i le vasa le su’igaula nai le papa. O lo ua musa foi i Foga’a le Sagalala. O Talaleomalie le alo o le Tuia’ana, ae taoto ile vai le ataata o le tama o Samoanagalo. Soliga’a pea ia la le seuga ile ti’asā ae lepa ile foe ma mapu ile to’o le va’a o le tautai alii.
Ua ou manatua ai nei le fetalaiga i le malae o le vavau ma malaetele. Ua paia le sami ua paia le laueleele. E pei o le fetalaiga ia Po ma Ao ma lo la fale tulutuluitao. Ua atoa tupe ile fala ua atoa foi tino o Va’atausili i lo tatou taeao fesilafa’i. Ona ou tatāliu ai lea ma le popo’e nei sala le gagana ona fai lea ma lape o upu.
Oute fa’atalofa atu i le pa’ia ua aofia mai i lenei taeao. le susū mai o le aufaigaluega paia a le Atua, le pa’ia i Fa’auluuluga o A’oga a Ekalesia, A’oga Tumaoti ma A’oga a le Malo, le mamalu i Asiasia’oga, Pulea’oga ma Faia’oga i ona tulaga fa’alupe. Fa’amalo le pale, malo le folau, malo le galulue.
E iai le talitonuga o paia ia ma mamalu o Samoa i Aiga ma a latou Tama, o Tama foi ma Aiga, le Usoga a Tumua ma Pule Ituau ma Alataua, Aiga i le Tai ma le Vaa o Fonoti. O lea ua poto moli i le futiafu e tasi, ma ua malutaue’e i Taumeasina i Falefatu, e Afio ai Tofaeono ma Tama, alalata’i i laua na Ta’i ma le Nofoituaiga ia Fuata. Tulou, tulou, tulouna lava!
O le autū o le aso o Faiaoga i le lalolagi i lenei tausaga 2022 e faapea;
“The transformation of education begins with teachers” (UNESCO theme)
o lona uiga “O suiga i a’oa’oga e amata e faiaoga”
O le agaga faafetai i le Atua, aua ua o gatasi le futia ma le umele i le fa’amoemoe o le asō ma le fa’amanatuina o le 60 tausaga o le malo tutoatasi o Samoa, e ala i le “Folau ma le faatuatua”.
E fa’ataua ai le folauga amata ma le sao o Faia’oga, Pulea’oga, Asiasia’oga, Minisita o A’oga, o Pule Sili o A’oga ua lagomau mai tiasā, ma i latou o soifua ma galulue pea, sa gapatia ile asaina o le gasū, o suiga lelei mo a’oa’oga.
O upu a le atunuu e manatua Pule ae le manatua Fa’alaeō. E manatua pea le faia’oga lelei, na ia faia suiga lelei i lou soifua ma lo’u ola. Aisea? Aua sa taulamua e ta’ita’i ma a’oa’o oe ma a’u ina ia i’u manuia.
O le asō ua fa’atauaina ai le sao o faiaoga na soifua mai i le tausaga 1962, o asiasia’oga o lo’o galulue pea, ma i latou ua maoa’e lo latou sao i suiga lelei mo a’oa’oga i lo tatou atunuu.
E le vaea le falao’oto i le fa’atauaina o nisi o i latou sa galulue i Vaega tau a’oa’oga i aso ua mavae, talu ona tutoatasi Samoa. O lea ua tu’ufa’atasia ai ni polokalame i luga o televise ma upega tafa’ilagi e fa’ataua ai le sao o faia’oga.
Ua fa’afetai, ua fa’afetai, ua malie mata e va’ai
Faia’oga e, ia tumau ile folau ma le fa’atuatua, ina ia tini le uto ma ia ausia atili ai nisi o suiga lelei, mo le lumana’i manuia o Samoa. Ia manuia tele le Aso o Faiaoga.
Soifua ma ia manuia !!
