01 Novema, 2022
O le a tapa’au pea ia le matagi le momo’o nai le faga. Fai mai na utu le tofi o le ta’isi ‘ele’ele
O lea ua fa’alepa le aleiga nai ‘ā’au mamao. Ae a ta’aseuga o le vaosā o Tupu ma le matāvai failelea o aloali’i.
Ua lalafo ai nei i le malu ma malae le ataata o le titi lava toa, ina ua ta’oto le lafoia o le tama ma le titiogoa na fai ma agai o le Tama’ita’i.
Lau Susuga i le Ta’ita’i o le Sauniga. Ua fa’amālō fa’afetai mo le taulaga si’itia i lenei taeao na liugalua
Sa e fa’alatalata i lona nofoali’i e fai ma o tatou sui, se’i momoli le taulaga o le Fa’amanū ma le Fa’afetai i lo tatou Atua.
Fa’afetai mo le manavaga pāia. Fa’afetai mo fa’alumaga fa’a-le Agaga ua laulauina mo tatou. E le gata e Fa’afetai ai le Atua ma lona agalelei. A’o sa tatou fa’anōnōgāmanū mo lo tatou fa’amoemoe sa lupe.
Ia, Papale ia ni fala Uea
Lalafo ia ni lā’ei alo. Auā ua agatonu le fausaga o le lautifa. E memelo i ai figota o le moana uli.
O le agaga Fa’afetai lea i le Atua. Ae a le aso ma le fa’amoemoe, lele ua tauavaoto ma ua fa’afotu’ula le la. O lea ua tu manu i Ululau. A’o le ma’umau i Vanelau.
Aua o le a se tōfā moeafusia na tafili ma fa’amoemoega. E taupale i va’a lelea, pe a leai lo tatou Matai. Ae uā le Asō? O lea ua papala ma’a o le ologāma’a ma paegalei
Ina ua asa malie le maimoaga a le Sa’opāpā.
O le tatalo fa’aauau ia saga fa’atumu mai le lagi lau utu. Ma ia fa’aaupegaina e lana fa’au’uga mana lou valā’auina, e ala i lana galuega. Mālō Fa’afetai.
E ia te a’u le ava tele ou te fa’atulou ai i le pāia ‘apo’apogatā o sasao nei.
I le afio o lau afioga i le Palemia, Fiame Naomi Mataafa Mulinuu II
Afio lau afioga i le Sui Palemia
Le pāia o atisā o le Kapeneta
Afio lau afioga i le Fofoga o le Maota Fono Fai Tulafono a Samoa
Afioga lau afioga i le Sui Ta’ita’i o le Itu Agai fa’apea le Mamalu Sui Faipule o le Palemene
Afio lau afioga i le Amapasa o le Mālō o Iapani i Samoa
Afifio Sui o Mālō mai Fafo
Afio lau afioga i le Ta’ita’ifono fa’apea Sui Mamalu o le Komiti Fa’atonu a le Fa’alapotopotoga o Va’a a Samoa
Afifio a outou afioga i Fa’auluuluga o Matāgaluega ma Fa’alapotopotoga Tumā’oti a lo tatou Mālō
Le mamalu o le auvalā’ulia fa’apea Samoa ua potopoto
O pāia lava ia o Samoa i le afua mai le Oneone le Utufia
Se’ia pāia le Oneone sinasina i le Fale Tapa’au
E leai se isi na te toe seu fogā’afaina le malu tau’aso o le tafatafafuga o mamalu o Samoa.
Nu’unu’u atu ia.
O le fa’amoemoe ua fa’ataunu’uina i lenei afiafi, o le tatalaina aloāia lea o le Va’a fou e fa’aopoopo i le fuāva’a a le Fa’alapotopotoga o Va’a Samoa, e sui tulaga i le Sā o le “MV Lady Naomi” ua loa lana tautua i le atunu’u aemaise le va o Samoa na lua e pei ona outou silasila atu ai.
O lenei va’a o se fuafuaga alualu mamao a le Mālō ina ia laugatasia ma ana anavatau e unā’ia ai le saogālēmū o femalagā’iga i luga o le vasa, aemaise le si’itia o le auaunaga. Na fausia lenei va’a i lalo o tulafono fa’avāomālō mo va’a la’upasese, ma ua fa’atotogaina fo’i i masini fa’aneionapo e folau saogālēmū ai ma mafai ona tulimata’i le ogāsami o lo’o i ai le va’a i so’o se taimi e tu’ua ai lo tatou atunu’u. E tolu fogāfale ua i ai potu ea mālūlū mo le pasese fa’atasi ai ma le vaega e tapena ai taumafa māmā i taimi o le faigāmalaga. Ua i ai fo’i se potu fa’apitoa mo ni pasese aloā’ia e malaga i le va’a. Ua fausia fo’i ni pusa ‘aisa fa’apitoa auā le fela’u’āiga saogālēmū o taumafa tu’u ‘aisa aemaise le vaega e teu malu ai uta.
O lenei polōketi tele sa fa’atupeina i lalo o le faigāpa’aga a le Mālō Iapani ma le Mālō Samoa i lona tau aofa’i e $1.94 piliona ieni ($37.64 miliona Samoa). E avea ai a’u e fai ma sui o le Mālō Samoa e momoli atu ai le agaga o le fa’afetai i le Mālō o Iapani tauala atu i le Amapasa o Iapani i Samoa mo lenei aseta tāua mo Samoa. Fa’afetai, fa’afetai tele lava.
O lenei Va’a na amata fausiaina i le tausaga 2021 e le Kamupanī Fau Va’a o le Naikai Zosen Corporation, i Setoda, Hiroshima, Iapani.
Fa’amatalaga o le Va’a;
- Umi – 48.0 mita
- Lautele – 12.0 mita
- Fua magoto i le sami – 2.45 mita
- Mamafa o le Uta – 180 tone
- Pasese – 280 tagata
- Saoasaoa – 12 note
O le Va’a o le MV Lady Samoa IV na tu’ua Hiroshima i Iapani i le Aso To’ana’i, 08 Oketopa 2022 ma amatalia mai ai lana faigāmalaga se’ia taunu’u saogālēmū mai i Apia i le Aso Faraile, 28 Oketopa 2022. Sa fa’aauva’aina mai le malaga e ni ali’iva’a Filipino e to’avalu (8), fa’atasi ai ma Kapeteni, Inisinia ma le Faimolī a le Fa’alapotopotoga o Va’a a Samoa e to’aono (6). O le auva’a a le Fa’alapotopotoga, sa auai atu i Iapani mo masina e lua (2) auā le fa’atautaia o ni a’oa’oga ma fa’amasaniga i le fa’afoeina o le va’a.
E momoli atu le fa’amālō ma le fa’afetai i le Kapeteni, Sifi Inisinia ma le auva’a mai Filipino, ae tainane fo’i le mamalu o tamāli’i na avea ma auva’a mai le Fa’alapotopotoga i le fa’atautaia saogālēmū mai o le Sa o Samoa e pei ona molimauina nei. E mautinoa e le’o se folauga faigofie, sa folau mai ma faigatā ma fītā, ae si’i le fa’afetai i le Ali’i ona ua ulimasao la outou fa’ata’ita’iga. Fa’afetai i le Ta’ita’ifono, Komiti Fa’atonu, Pulega ma le Aufaigaluega a le Fa’alapotopotoga o Va’a Samoa ona o lenei atina’e ua tino mai. Fa’amālō le loto tele. O le fa’amoemoe mauāluga o le si’itia lea o le auaunaga aemaise o le tulaga lelei ma le saogālēmū o Va’a e fa’atino ai le tatou tautua. E fautuaina ai fo’i le Fa’alapotopotoga ina ia tausia lelei ma fa’atino aiaiga uma i le fa’aāogaina o nei aseta tāua a le Mālō, ina ia tumau pea lona lelei ma le matagofie e tautua ai le atunu’u femalagāa’i.
Ia fa’amanuia tele mai le Atua i le Ta’ita’i o le Sauniga ae tainane le mamalu o le Au Valā’aulia.
Soifua ma ia Manuia.
