Lau Susuga i le Taitai o le Sauniga, Mariota Siaea;
Afioga i le Palemia
Afioga i le Sui Palemia
Afioga i Minisita o le Kapeneta,
Sui o Malo ma Paaga mai Fafo;
Malo Fa’aaloalogia, faapea le loaloa ma le mamalu o sui auai uma;
E ia te au le ava tele ma le fa’aaloalo e tuuina atu ai le Lauga Aloaia e tatala ai le Vaiaso Fa’alauiloa mo Malosiga i Samoa mo le tausaga 2022.
Ou te fa’afeiloai aloaia atu i a tatou Malo Fa’aaloalogia ma sui uma ua auai mai i lenei fa’amoemoe.
O le taimi nei, o le vaega o malosiaga o se tasi o manaoga taua i le soifuaga o le tagata. Pe a tatou mafaufau i lenei olaga ma ituaiga o atina’e eseese, e lē mafai ona gaioi e aunoa ma se malosiaga. O Malosiaga Gafataulimaina ma Mausali, e mo tagata uma o Samoa ma lona tamaoaiga ma e ao ona tatou galulue fa’atasi ina ia mautinoa le manuia o Samoa.
O fuafuaga fa’ata’atitia a le Malo mo atina’e tau Malosiaga Gafataulimaina o lo’o fa’aalia manino lava i totonu o le “Taiala mo le Lumana’i Manuia o Samoa TF2021/22 – TF2025/26” fa’apea ai ma le “Fuafuaga Alualu Mamao mo le Vaega Maoti o Malosiaga 2017-2022”. Ina ia o gatasi ma ta’utinoga a le Malo mo le fa’aititia o kaponi, ma se siosiomaga manuia i le lumanai, o le ala lea ua galulue ai le Malo i se taumafaiga tu’ufa’atasi ina ia si’itia le fa’aaogaina o malosiaga fa’afouina ma fa’aleleia le fa’agaioiga o atina’e tetele ina ia uuna’ia ai se siosiomaga gafataulimaina.
O le fa’amoemoega autu o lenei vaiaso, o le fa’aauau pea ona fa’alauiloa fa’amatalaga i le mamalu lautele o le atunuu, i le taua o ituaiga o malosiaga eseese ma fesoasoani tau tupe mo atina’e tau malosiaga, e aofia ai ma malosiaga fa’afouina eseese, o a latou a’afiaga, o lona tau ma tulaga e lelei ai lea malosiaga fa’afouina, fa’aaogaina tatau po o le fa’asaoina o malosiaga ma le fa’alauiloaina o oloa e itiiti le eletise e fa’aaogaina ai, faapea ma le tuuina atu o fa’amatalaga tau malosiaga i tagata uma, ina ia mafai ona faia a latou filifiliga talafeagai, mo le lumanai. Ma o le ala lea ua fa’aautuina ai lenei vaiaso fa’alauiloa, o le “Si’itia le U’unaia o Malosiaga Gafataulimaina”.
O vaega autu o lenei vaiaso o lo’o aofia ai le Iloiloina o le Fuafuaga Alualu Mamao mo le Vaega Maoti o Malosiaga 2017-2022. O se avanoa o le a mafai ona iloiloina ai ni vaega taua ua misi i le fuafuaga, aemaise o luitau i lona fa’atinoga e mafai ona fa’aaogaina i le atina’eina o le isi Fuafuaga Fou. O le isivaega o lenei vaiaso, o le a faia ai le “Fonotaga i Fesoasoani mo Atina’e Tau Malosiaga Gafataulimaina” ma o se avanoa e fa’alogologo ma silafia ai nisi o poloketi. o lo’o fa’atinoina i totonu o Samoa, aemaise o fa’amanuiaga tau tupe ma fesoasoani tau atina’e e avagaa mo Samoa.
O lo’o ia i tatou se tiute taua i le u’unaia o le fa’aaogaina o malosiaga i so’o se vaega. E manino lava e lē mafai ona fa’ataunuuina toatasi e le Malo, ma e moomia ai ona tatou galulue fa’atasi, mo taumafaiga uma ina ia tatou fa’atinoina tulaga e fa’aaogaina tatau ma fa’asaoina ai malosiaga aemaise o le fa’aaogaina o oloa e itiiti le eletise e manaomia ai.
E telē le sao o a tatou pa’aga, ma ou te fia fa’ailoa atu le lagolagosua mai ole Ofisa Tutotonu o le Pasefika mo Malosiaga Faafouina (PCREEE) –SPC, ma Poloketi uma o lo’o fa’atupeina mai i le Polokalame o Atinae o Malo Aufa’atasi (UNDP), Failautusi o Polokalame tau le Siosiomaga Fa’aitulagi i le Pasefika (SPREP), poloketi o le IMPRESS, ma le Montreal Protocol mo le Osone lea ua mafai ai ona fa’ataunuuina ai lenei polokalame.
E fa’amauina foi le fa’afetai i a matou pa’aga o le Matagaluega o le Punaoa Fa’alenatura ma le Siosiomaga; Fa’alapotopotoga o Suesuega Fa’asaeinisi a Samoa, Matagaluega o Leoleo ma Falepuipui, Pulega o Galuega Tineimu ma Fa’alavelave Tutupu Fa’afuasei i Samoa, ma isi sui uma o le vaega maoti o malosiaga mo so’o se ituaiga o fesoasoani na tau’aao mai mo le tapenaina o lenei fa’amoemoe, fa’atasi ma le Matagaluega o Tupe. E fa’amauina foi le agaga fa’afetai mo le lagolagosua faifai pea mai o isi Matagaluega ma Fa’alapotopotoga a le Malo, Fa’alapotopotoga ma Pisinisini Tuma’oti, o Nu’u ma Alalafaga ma outou uma ua aofia mai e lagolagoina lenei fa’amoemoe i le Asō.
Matou te fa’amoemoe ia tele ni finagalo ma manatu o le a fa’aalia i le polokalame i lenei vaiaso ina ia fa’amalosia atili ai le si’itia o le u’unaia o Malosiaga Gafataulimaina mo Samoa.
E ia te au le agaga fa’aaloalo, e avea ai au ma sui o le Malo e Tatala Aloaia ai lenei Vaiaso Fa’alauiloa mo Malosiaga 2022.
SOIFUA
