O lea ua maea ona molia laau I Foga’a, aua le sau o le ola na manavaina e le taitai o le sauniga I lenei taeao. Ua lagona ai I tino matagi lelei ma atili latalata ai lo tatou nofoaga nei, I tulupae o le nofoalii. Malo le tapena! Malo le folafola I lau Susuga I le taitai o le sauniga.
Ua fetausunu’I ao o le lagi ma ua mamalu lenei taeao manino ma le taeao toto’a. Ua mane’e foi faavae o Matagaialalua nei aua o lea ua susu le taitai o le sauniga, Afio le Afioga I le tamaitai Palemia ma le kapeneta, afifio faipule o le Palemene, tainane sui o malo ma faalapotopotoga oloo galulue fa’apaaga ma Samoa, I lenei taumafaiga tele. Ua poto foi moli futiafu e tasi Samoa I ona ponaoo ma ona tulatoa, tainane ona muliauma eseese, e molimauina lenei faamoemoe taua.
Oute ta ai le tavai ma sulua le too ma tula, e pei o le fetalaiga I le seuga ifoifo nai le tuavao, ma faatulou I le paia ma le maualuga o lenei taeao. O outou paia ma sa lē avea o le a mapu I lagoee le taputoa o alii, ona e lē popo I sa’u tala ma o Samoa foi o le vaa e faaufigata, e leai se tasi na te mafai ona talamatasooina ona tu’itu’i fafau. Ae tau ina ou faa’ete fimalie ma seu malu lupe o le taeao ma faatulou. Tulou! Tulou lava.
Ua malama I ulugalu le Tapuitea I le anoliu o lenei aso ma le faamoemoe. Ua le masino foi faalauiloa a le Matagaluega I soo se ala faasalalau e taumomoli atu ai le feau ma ute o taumafaiga ua tatala aloaia I le aso, mo aso e 16. Olo’o fa’aautu ai le manulauti o lenei polokalame e faapea “Malu I fale”
O le anofale atoa o lenei faamoemoe, o le taumafai lea e avea Samoa ma se atunuu e saoloto mai sauaga o tina ma tamaitai faapea fanau I totonu o aiga. E lē na ma le laina le sasao faafi ma le sosolo faafa’amai o lenei faafitauli I totonu o lo tatou atunuu ma ua tonu ai le tofa I le malo e tauala atu I le Matagaluega o Tina ma Tamaitai, Atina’e o Nuu ma Agafessotai, e amatamea i le faamaite taua lenei ina ia fesoasoani ai ile itupa o alii, e foia lenei faafitauli mataga.
O le suesuega o le “Soagalemu o Aiga” 2000 sa faamauina ai 46% le aofai o tina na sauaina e o latou taitoalua I le taimi atoa o le mafutaga faaleulugalii. Na toe faia lenei suesuega ile 2017 ma faamauina ai ua 60% le aofai o tina na sauaina e o latou taitoalua I le taimi atoa o le mafutaga faaleulugalii. O lona uiga, e 14% na siitia ai lea fainumela I totonu ole 17 tausaga ma ose siitaga ua maoa’e. Sa faamauina ai foi ile suesuega lea ile 2017 le tusa male 90% ole fanau na sauaina. O lona uiga afai e to’a 3 pe to’a 5 se fanau iti ile aiga e aafia uma lava latou I taimi uma e faatino ai lenei aga le alofa I totonu o lea aiga. E foliga mai a toe fai se isi suesuega e ono toe faailoa mai ai e faaauau pea le alu I luga o nei fainumela.
E talitonu sa tele taumafaiga e auala i polokalame eseese na faatinoina e le tatou malo ma ana paaga, e taumafai e foia ai lenei to’atuga ae paga lea e le o faaitiitia lava le faatupulaia. Ua fia foi tausaga o fai lenei polokalame 16 aso e saga faamalosia ai lava auala e taofia ai lenei faama’I ae leai lava. E lata ile miliona tala ile tausaga tupe faaalu a paaga ma le tatou malo e alu ai I nei taumafaiga ae le o fua mai ise tulaga e tatau ona iai. Oute manatu ua tatau ona fai se isi faiga e ese mai ile lagiina o pese, tauvaga tauloto, tala tusitusia, ata tifaga, faiga lotu, mea taumafa, semina, fonotaga, soalaupule, taavale teuteu, ia ma lanu o laei sa faaaoga le lanu piniki, ia o lea ua laei uliuli,
Samoa, O fea ea lau aganuu oloo tatou alalaga ai nei e ola ma oti le tama e puipui lana feagaiga? O fea ea lou faavae Samoa e faavae I le Atua? O le Samoa ea lea na mamanu mai e o tatou matua ua lagomau mai atutia e tatou te soifua ma ola ai? Ae o ai le tagata e fiamalosi ma fiasili ma faaoo sauaga ae oo I le Atua e ana le tagata na te le mafai ona faia lea mea? Aisea ua manatu ai oe le tama ma le tane poo ai lava, o lou faatinoga o nei amioga ma nei sauaga e te tauleleia ma e toa ai? O le a ea le aoga e na’o na o ai I le lotu ma alalaga I viiga o le Atua ae amio pa’aa ma amio mataga faapea?
O le taumafaiga ma le faamaite lenei e faataua ai le amata mai I totonu o tatou lotoifale. Malu I fale, oloo iai le tama agamalu, alofa, onosai, faapalepale ma loloto lana tofa e foe ai lona auaiga. Malu I fale, oloo iai tane e iai le alofa faaKeriso, ma le loto maualalo e vaai ai I lona toalua e aulelei, o se pa’aga tutusa ma lana fanau o ni oloa taua e fai ma tamai olive I lona laoai I aso oi luma. Malu I fale, oloo teu I le feavata’I ma ta’ui I le fetausi’ai ma le TALANOA faaleaiga I taimi ma aso uma. O le upu a le pese faapea; A iai I le aiga o le alofa, matagofie mea uma fiafia leo uma. Maua ai le filemu, leai se fa’auu, solo lelei mea uma pe a iai le alofa I le aiga. Tamae o Samoa, e le’o le saua le tali o faafitauli. Tautuana lou fale nei tutulu ona le malu lea o lou aiga.
Ao tatou tatala aloaia lenei polokalama faatino mo le 16 aso e uunaia ai le tetee atu I sauaga o soo se aga, oute tuualalo atu i tama tane uma o Samoa oloo toilalo popo I lenei uiga maualalo ina ia o tatou tulai mai ma fai se suiga. Ia manatua o tatou o le mailei a le tiapolo ae o le mau a le poto; A ita ia e nofo I lalo ma mafaufau. O le uta a le vale e ta mau I le mea ua ia manatu iai ae o le uta a le atamai e fetuunai ma toe mafaufau lelei pe oa taunuuga o lau sauaga lea o le a fai.
O le toa moni lena oloo faamatala mai e le Tusi Paia; o le toa e na te iloa pulea ma faafoe lona loto ae le’o le fetau’ailoto. Fai sou sao ma so’u sao I le fofoina o lenei gasegase ua sasao fa’aafi. Tama e o Samoa Ia malu I fale tamaitai ia outou ia malu I fale tatou fanau ia outou, ia malu I fale lou aiga ia te oe. Ia alofa mai le Atua silisili ese ia te oe ma a’u ia malu le tatou lotoifale ina ia maua ai e samoa se atunuu toafilemu ao tatou folau ma le faatuatua.
Ile ava ma le faaaloalo oute faailoa atu ai ua tatala aloia nei le tatou polokalame mo le taofia o sauaga I tamaitai ma le fanau iti ua faaigoaina ole Malu I Fale mo le 16 aso.
Soifua ma ia manuia
