Fa’amanuiaga a le Malō mo le Toa Samoa mo le Suegā Siamupini o le Ipu a le Lalolagi mo le Lakapi Liki: Manchester, England 20 Novema, 2022
Ou te faatalofa atu i le faafofoga tapua’i mai a le paia o le atunuu. O ou paia faale atunuu, paia faalemalo, ma paia faale talalelei, ua taoto i matagofie, o le taafi faumau e tiu ai si o tatou atunuu, ma e tumau pea. Tatou te faafetaia le alofa ma le tausiga mamana a le Atua, aua o lea ua tatou taunuu mai i le faaiuga o lenei vaiaso i le manuia ma le filemu. Faamalo le folau manuia, ma le lagi matafi.
Ua logo le nai atea, logo foi le nai ama, ae tali mauli o toa nai le toe aso nai Moamoa, i taumafaiga a le tatou Toa Samoa i le taamilosaga a le Ipu o le Lalolagi i le lakapi Liki o loo faagasolo nei i Egelani. O lea ua ofi atu le tatou au i le sailiga siamupini ma Ausetalia i le Aso Sa nei. O se matatia iloga ma tulaga ese i lo tatou tala faasolopito, ma le taamilosaga o le lakapi liki i le lalolagi atoa, talu mai ona faavae lenei taamilosaga. Ua tu maualuga ai si o tatou atunuu.
E avea ai au nei e fai ma Sui o le tatou Malō, vaeatu le tapuaiga a le Afioga i le Ao Mamalu o le Malo, le Afioga i le Tama’ita’i Palemia, faapea le afioga i le Sui Palemia, o loo toesea i fonotaga faava-o-malo i atunuu fafo. E faapea foi i le tapuaiga a le afioga i le Sui o le Fono a Sui Tofia, ma le tafatolu o le tatou Malo, le paia maualuga o le atunuu i ona tulaga faalupe, ae a le tapuaiga a Samoa uma o loo e’e ma papa aao i soo se tafa o le kelope, e momoli atu moomooga alofa ma faamanuiaga, ma le faamalosiau mo le tatou Toa Samoa.
Lau Susuga i le Faiaoga – Matt Parish ma le Mamalu i le Pulega o le tatou Au, lau susuga i le Kapeteni Junior Paulo ma tama taaalo uma a le tatou Au a le Toa Samoa, matou faamanuia atu i lo outou alofaiva i le taaloga. O la outou toe taaloga, o le toe ta, ma le toe aso o le tausinioga. O le matou faamanuiaga, ia faatupu e le Atua lo outou malosi, le lototele, le toa, ma le mataalia e faatino ai le taaloga i le maualuga e gata ai. O le tatalo a lo outou atunuu, tatou valaaulia le Atua tatou te au faatasi, tatou te manumalo ai.
Ia pouliuli outou tino, ia malamalama outou mata, ma ia tafetoto outou ala”. O manū na, o outou mama na.
I le maea ai o fonotaga faava-o-malo a le afioga i le Tamaitai Palemia ma le Sui Palemia, o lea ua mafai ai ona o la auai atu e tapuaia le taaloga a le tatou au i Egelani. O loo aufaatasi uma ai ma o matou mauli i le tapuaiga, aua le alofaiva o nai a tatou tama fanau.
O lea ua faaiugafonoina e le Kapeneta i le asō, le faatino o le tatou big screen i le Apia Park mo le maimoaina o le taaloga, ma o le a faatino ai le polokalame e valaaulia ai le atunuu mo le tapuaiga o le tatou Toa Samoa i le vaveao o le Aso Sa nei. E amata i le sauniga lotu i le itula e 1.00am i le vaveao o le Aso Sa nei, ona amata ai lea o le maimoaga ma le tapuaiga o le taaloga. O lea foi ua mautinoa, o le taeao lava lea e taaalo ai le tatou Manu Samoa i le lana taaloga faavaomalo ma Romania. O le a faailoa atu e le Komiti o tapenaga o lenei polokalame e aofia ai le Komesina o Leoleo, ma Faauluuluga o le Pulega o Tagata Tafafao Maimoa Mai, Matagaluega o Fesootaiga ma Faamatalaga Tekonolosi, Matagaluega o Tupe ma le Pulega o Fale ma Malaetaalo, le auiliiliga o le polokalame mo lenei faamoemoe.
O se tasi lenei o polokalame ua faataoto e saga matimati ai le faamanatuina o le 60 tausaga o lo tatou Malo Tutoatasi. O le tatou malaga, e ‘folau ma le faatuatua’.
Samoa e le atunuu pele, o la tatou mau i soo se faiva e si’i ‘o le tapuaiga mau, tatou te matamata nonofo, ma ula le i’u la ma po le fala, ma tuitui mālie le lagi ina ia manuia le taaloga a le tatou Toa Samoa. O le a feagai le Alii Komesina ma le Malu o le Malo, ma le puipuiga o le saogalemu o si o tatou atunuu. O le tatalo ma le tuualalo, le atunuu pele, ia fai mālū lo tatou faiva, ina ia mapo pea le saogalemu o le atunuu lautele, aemaise luga o ala tetele o le Malo. E faaauau pea aiaiga faaletulafono mo le ava malosi i le Aso Sa.
Ia manuia le taaloga a le Toa Samoa, Ia manuia le tapuaiga mau a si o tatou atunuu aemaise Samoa uma i le lalolagi atoa. GO THE TOA SAMOA.
Soifua ma ia manuia.
