O lea ua māe’a āmia le tautasi nai le putē, i le osigātaulaga auā le fa’amua ma le fa’asagi, e momoli ai lapalapa o mālō i le Atua e ou lenei aso ma lenei taeao matagofie.
Lau Susuga i le Taitai o le Sauniga, faafetai mo le feau fa’ala’ei’au mo i tatou i lenei taeao aemaise lenei faamoemoe. Matou te tatalo atu ia agalelei pea Le Atua faatumu lau utu aua le galuega o feagai ai.
Ou te manatu o lea ua tu toa ma ua tu maualuga lenei taeao, aua ua taufai pu’ea le matila ma le ofeloa. I le susu o lau Susuga i le Taitai o le Sauniga, Susuga i le ta’ita’I o le Itu Agai, Afifio o Amepasa o Amerika, Niu Sila ma Ausetaia ma Iapani. Tainane Fa’auluuluga o Matagaluega a le Malo, Faalapotopotoga Tu Maoti, le mamalu o le valaaulia i uo ma pa’aga, sui tofia ma sui lautele o lenei Faalapotopotoga. Faamalo le soifua manuia, faamalo le folau;
O le faamai lenei o le AIDS ma lona vairasi o le HIV sa fememea’I ai le lalolagi I le vaitaimi o le 1970 – 1980. I le pepesi ai la o lenei fa’ama’i i le vaitaimi o le 1980, sa mausali ma mata’itu pea tapenaga a le matagaluega o Soifua Maloloina i ana galuega fa’atino. Vaega muamua, sa amata loa ona tapisa auala e taofia ai le sosolo fa’aafi mai o lenei fa’ama’i i Samoa nei.
O se luitau mo le Matagaluega, ona e fai sina ma’ale’ale tele o lona talanoaina aua o se fa’amai e pipisi i feusuaiga e le puipuia.
O le fa’apotopotoga po o le community la lenei o fa’afafine i lena vaitaimi i le 1980 na tele ina fa’aogaina e le Matagaluega o Soifua Maloloina e fa’aogaina a latou agamalie o feso’otaigae tapisa fa’alauiloa e puipuia ai Samoa mai lona a’afiaga ma le HIV/AIDS.
O iina, na amata fa’apunafanau mai ai le taulamua loa e fa’afafine ma le latou galuega fai fa’atasi ma le Matagaluega o le Soifua Maloloina, le tapisaina o fautuaga ma lapataiga lau tele mo puipuiga mai lenei fa’amai pipisi e fa’aogaina ai fa’afafine ma latou aga malie.
E maitauina, sa fa’asolosolo mai ai lava faapena seia o’o ina amata faailoaina i a latou taleni, fa’afiafiaga eseese mo le maimoa a le atunuu, lea e iai a latou tauvaga tausala fa’afafine ua iloga ai lenei po o le Miss Samoa Fa’afafine Pageants. Ao nei fa’afiafiaga, o se auala ua fa’aoga e momoli mai le tele o feau taua eseese ina ia siitia ai le malamalama o tagata lautele i manaoga aemaise o mataupu i fa’ama’i e pipisi e maua mai feusuaiga e lē puipuia.
O le tausaga lenei 2022 e pei ona iai lenei taeao, e atoa iai le sefulu fitu (17) tausaga talu ona faavaeina lenei Faalapotopotoga lea ua taua nei o le Samoa Fa’afafine Association. Sa resitala fa’aletulafono ai mai le 2005. Ua maitauina ai le siitia pea i luga o le tofamamao a le Faalapotopotoga e ala lea i le galuega taulogologo e galulue faipa’aga ai ma nisi o Matagaluega a lo tatou Malo, o feso’otaiga fai fa’apaaga ma nisi Faalapotopotoga Tumaoti, ma Faalapotopotoga o Malo Aufaatasi, ina ia unaia ai pea le faamalamalamaina pea o mataupu e faasino ma aafia Samoa atoa aemaise lava le latou ituvai o Faafafine ma Faafatama. E le i faigofie lona tauasaina mai. Aua oni tagata e inosia, e amusia ma faasinosinolima iai le tele o tagata, ae le i faaititia ai le malosi o le latou una’i pea i mataupu lautele aemaise lava le faama’i lenei o le HIV/AIDS.
O se tasi la o matati’a mo lenei Faalapotopotoga, o le faamanatuina o se vaiaso i tausaga uma, ua ta’ua o le FA’AFAFINE AND FA’ATAMA WEEK po o le VAIASO O FA’AFAFINE MA FAATAMA. E maitau atu, ua savali nei i le 7 tausaga o faia pea le faamanatuina e le Faalapotopotoga o lenei vaiaso. O se vaiaso taua, e fa’alauiloa ma mausali ai mataupu e faasino ia te ilatou lava. O se vaiaso ua saofagā iai le latou piiama atu ai foi i le faamanatuina o le 16 Aso o feso’otaiga faalauiloa a le lalolagi (16 Days of Activism) lea o lo o taimua ai le tatou Malo, i le sini autu o le Ending All Forms of Violence against Women and Girls (Faamutaina o soo se sauaga e faasaga i tina ma tamaitai).
E pei ona faailoa mai, o le sini autu o lenei tausaga mo lenei VAIASO O FAAFAFINE MA FAATAMA 2022, “O LE LALAGAINA O SE SAMOA E LE FIU GOFIE MA E ANAGATA” (WEAVING A RESILIENT SAMOA) ua o gatasi foi ma le faamamafa a le Malo i le taimi nei, i tapenaga anagata mai le fememea’i ona o le fa’amai o le Koviti 19.
O le anavatau a lenei Faalapotopotoga talu ona Faavae mai le tausaga e 2005, o le mautinoa e puipuia, amanaia ma faataua aia tatau o soo se tagata soifua e aofia ai ma faafafine ma faatama. O le ala foi lea ua faaauau ai pea galuega faatino a lenei Faalapotopotoga i lenei tausaga aua o lana lea pito laau, o le tapisaina o aga o fesootaiga mo le soifua manuia, puipuia ma le saogalemu o ona sui, aiga ma uo aemaise le atunuu pele o Samoa.
O lea ua maitau atu o le Aso lenei, Aso 1 o Tesema ua fa’amanatuina e le Lalolagi mo le Aso o le Faama’i o le AIDS ae ua tatalaina ai foi ma le Aso muamua o le Vaiaso o Fa’afafine ma Fa’atama o Samoa 2022. Ia fa’amanuia mai pea Le Atua.
Soifua ma ia Manuia le Faamoemoe.
