(Aso To’ona’i 14 Ianuari 2022, 2pm – Toamua)
Susu i lau Susuga i le Ta’ita’i o le Sauniga – Reverend Dr Eletise Suluvale, fa’apea le aufaigaluega pa’ia a le Atua o le Itumalo ua tatou mafuta i lenei aso.
E fa’atalofa atu fo’i i le pa’ia maualuga o lenei aso, i Pa’ia fa’alemalo aua le afifio i Minisita o le Kapeneta, o Faipule, afio foi le Tofi o le Itumalo o Faleata Numera 4 – lau Afioga Ale Vena Ale.
E fa’atulou fo’i i pa’ia fa’aleaganu’u aua le alalata’i o Ale ma Ulu ma o la aiga, tainane le Gafa o Seauatoe ma Leitulua o Satunumafono ma Va’aulu. E le fa’agaloina fo’i le pa’ia maualuga o le Itumalo, aua le Afio le Alo o Tuitoga. Alalata’i lo oulua to’alua ma le Fale-Sata’alaua fa’apea Faleata ma Itu’au. O pa’ia ma mamalu maualuga le na aua le Itumalo i ona tulaga fa’alupelupeina.
E tula’i ai ma le ava ma le fa’aaloalo tele, e fai ma sui o le Malo aua le Afio i le tama’ita’i Palemia o Samoa, Afifio I Afioga i Minisita o le Kapeneta ma le Faigamalo, e fa’aleo le agaga fa’afetai aua lenei aso taua o le molimauina o le tatalaina o le ofisa o le Itumalo Faleata Numera 4. O upu a le Tusi, o le fa’amoemoe ua taunuu, o le laau lea o le ola. O lea fo’i ua togi pa tau le ave ma ua sili foe o le fa’atautaiga sa alo i ai le Itumalo ma lenei galuega matagofie.
E le o toe po malae i le Itumalo i lenei poloketi taua a le tatou Malo o lo’o faagasolo nei. O le fa’amatu’uina atu lea o le ta’ita’iga o atina’e mo afio’aga i le fa’amalumaluga a ali’i ma faipule aemaise o le fa’afoeina ma mata’ituina e le Komiti mo le Poloketi a le itumalo. O lea ua fa’atupeina i le tala fa’atatau o tupe a le Malo i tausaga ta’itasi, e tauala atu i le Poloketi mo le Atina’e o Itumalo (District Development Project) o lo’o ta’imua ai le Matagaluega o Tina ma Tamaita’i, Atina’e o Afio’aga ma Agafeso’ota’i. O le fa’amoemoe ia faalelei atili ai atina’e i totou o Itumalo ta’itasi ina ia si’itia le tulaga tau tamaoaiga ma ia gafataulimaina le soifua manuia ma le ola lelei i totonu o Itumalo, nu’u, Ekalesia ma aiga ta’itasi. O le tasi o vaega taua o lenei poloketi, o le fausiaina lea o Ofisa a Itumalo, e tapu vae tasi i ai le mamalu o le Itumalo mo a latou fonotaga, ma soalaupule ai mata’upu taua ma atina’e a le Itumalo. O le a galulue ai fo’i le aufaigaluega filifilia e toa tolu (3) ma le Komiti o le Fono Fa’avae a le Itumalo aua le fa’afoefoeina o lenei poloketi taua, e manuia uma ai le Itumalo o Faleata Numera 4.
O lea ua tatou molimauina le matagofie o lenei galuega ua tatalaina i le aso. E momoli atu ai le agaga fa’afetai tele i le mamalu o le Itumalo i lo outou le fa’alogologo tiga i le sautia ma le laina aemaise le galulue fa’atasi ua tino mai ai lenei galuega matagofie. E fa’afetaia ai fo’i Ie Afioga I le Faipule po’o le tama o le Itumalo, i lou sa’ili malo ma lou galue so’oso’o tauau ma le mamalu o le Itumalo, ua atoa ai tino o Va’atausili i lenei aso. E le fa’agaloina fo’i le fa’afetai i le aufaigaluega totofi a le Atua o lo’o fa’afale le malu i lenei itumalo, i la outou taulaga tatalo i aso uma sa talosia ai lenei galuega ua fa’ataunuuina ma le manuia. O upu a le Tusi, a le atina’e e Ieova le fale, e galulue fua i latou o e atiina’e.
O le tu’ualalo, ia fa’aaoga tatau avanoa ma ia aua nei vale tu’ulima nei avanoa taua ua tu’uina mai e le Malo. E fa’amoemoe le manuia o le itumalo, pe a lelei ona lufilufi lima lelei e le Faipule, le Komiti o le Fono Fa’avae a le itumalo ma le aufaigaluega nei fesoasoani mo le atina’e talafeagai a le itumalo.
E tele lu’itau, ae ia loto tetele ma fa’amoemoe i le Atua, e manuia ai fa’amoemoega uma.
Ia fa’amanuia tele le Atua i lenei galuega. Ia fai ma punavai e puna mai ai manuia ma le sosia o atina’e eseese, ina ia manuia ai aiga, ekalesia, nuu ma le Itumalo.
Manuia tele lau Susuga i le ta’ita’i o le Sauniga, Afioga i Minisita ma Faipule faapea foi le mamalu maualuga o le Itumalo.
Ma ua tatala aloaia ai nei le Ofisa a le Itumalo o Faleata Numera 4 mo lona fa’aaogaina.
Soifua ma ia Manuia!
