(19Ianuari 2023)
Lau Susuga Moeaiseu Raymond Betham, Ekalesia Egelani i Samoa nei,
Afioga i Minisita o le Kapeneta ma Minisita Lagolago,
Sui mamalu o a tatou pa’aga mai fafo,
Aemaise o le mamalu o le au vala’aulia o lenei aso,
I le ava ma le fa’aaloalo, oute tula’i atu ai, e tu’uina le fa’amatalaga autu, e tusa o le ‘āuga ma le fa’amoemoe o lenei aso. O le asō ua fa’alauiloa aloa’ia ai la tatou Fuafuaga Autasi a le Vaega Maoti o Fa’atoaga ma Faigafaiva mo le tausaga fa’aletupe 2022/2023 – 2026/2027.
Ua mautinoa ma talitonu lo tatou Malo, i le taua tele o le tatou Vaega Maoti o fa’atoaga ma faigafaiva i le toe fa’aleleia o la tatou tamaoaiga mo le lumanai manuia o tagata lautele o si o tatou atunu’u. Ua fa’amautuina le taua tele o faifa’atoaga ma faifaiva i le mau taumafa pea o Samoa i taimi o le KOVITI-19.
O le taua tele o le sao o le vaega tumā’oti o Fa’atoaga ma Faigafaiva e tatau ona tatou toe tō mānatu pea ini auala e toe fa’aolaola ma toe timata le upega aua sa lelei o a tatou faifa’atoaga ma le faigafaiva ma si o tatou atunu’u. O le Fuafuaga Autasi a le Vaega Maoti o Fa’atoaga ma Faigafaiva o lo’o fa’ata’atitia mai ai galuega fa’atino e tatau ona ausia e le Vaega Maoti i le isi 5 tausaga fa’aletupe 2022/2023 – 2026/2027. O lenei fuafuaga o lo’o māioio lava le matāfaioi fa’afaiga fa’avae lautele ina ia manino le fa’atinoina o galuega a le Vaega Maoti ma ana pa’aga aemaise o nu’u ma afio’aga aua le atina’e o lenei Vaega Maoti taua mo Samoa.
O lo’o sosolo lenei Fuafuaga Autasi ma le Va’aiga Mamao a le Malo o lo’o iai nei ina ia, “Fa’aauauina pea le mau taumafa o Samoa, ma ia malu puipuia tupe maua o le tamāoaiga mo se lumana’i manuia o Samoa”. O lo’o iai le fa’amoemoe o le a ausia lenei vā’aiga mamao e ala lea i le, “Unaia ma fa’amalosia o le sao o le Vaega Maoti o Fa’atoaga ma Faigafaiva ina ia mau taumafa pea Samoa, fa’amalosia le taumafa tatau, si’itia tupe maua ma le fa’atuputupulaia o le tamāoaiga”.
E lima (5) ni Sini Autu o lo’o ave iai le fa’amuamua ina ia ausia e lenei Fuafuaga Autasi;
- Malu puipuia ma mau taumafa pea Samoa mai atina’e tau fa’atoaga ma faigafaiva ma si’itia le tulaga o atina’e tau fa’atoaga i’a (aquaculture).
- Si’itia le saogalemu o meataumafa ma le taumafa tatau
- Si’itia atina’e i nu’u i tua
- Fa’aleleia atili o auaunaga tumā’oti ma le auina atu o oloa ma fefa’atauaiga
- Ia mautinoa le maua pea o avanoa talafeagai mo le fa’amālosia o le atina’eina o le Vaega Maoti.
‘Ā outou Afioga i fa’auluuluga mai Vaega Eseese o Mālō Aufa’atasi fa’apea a tatou pa’aga fa’avaomalo, ma le mamalu o le au valaaulia o lenei aso, oute fiafia tele e fa’ailoa atu, ua fa’alauiloa aloaia nei la tatou Fuafuaga Autasi a le Vaega Maoti o Fa’atoaga ma Faigafaiva mo le tausaga fa’aletupe 2022/2023 – 2026/2027.
E talitonu o le a tatou galulue fa’atasi ina ia mautinoa le lelei o le fa’atinoga o la tatou fuafuaga autasi aua le lumana’I manuia o le tatou vaega maoti ma ia mautinoa le si’itia ai o le tamaoaiga o Samoa mo nei ma aso a sau.
Soifua ma ia manuia!
