MATĀ’UPU MO LE SILAFIA E LE ATUNU’U
Aso Faraile, 20 Ianuari, 2023
O le a to’a pea ia i tumu mauga puao o fa’asuaga, ae oaoa i faleseu ma sa’a i ma’a o mālie le pāia mauāluga o le atunu’u. Tatou te fa’afetai i le agalelei o le Atua i lona fa’amaoni, auā o lo’o ia fola le ma’a ta’anoa i tagutugutu o ala tanu, o lo’o se’e malū ai la tatou folauga ua amataina nei i lenei tausaga fou.
Ou te fa’atalofa atu i le fa’afofoga tapua’i a le Ao Mamalu o le Mālō ma le Masiofo
Le afio o le Sui o le Fono a Sui Tofia
Minisitā o le Kapeneta ma Sui Minisitā;
Le Fofoga Fetalai ma Sui o le Palemene;
Le Fa’amasino Sili ma le vasega o Fa’amasinoga;
Le aufaigaluega totofi a le Atua i fata faitaulaga;
Aemaise le pāia mauāluga o Samoa auā Tama ma ‘Āiga, o ‘Āiga ma Tama,Tumua ma Pule, Ituau ma Ālataua, ‘Āiga i le Tai ma le Va’a o Fonotī.
I le mae’a ai o le Fonotaga a le Kapeneta i lenei fo’i vaiaso, ua manatu ai e fa’ailoa atu mo le silafia e le atunu’u o nisi o matā’upu tupito sa soālaupuleina ma fai i ai i’uga.
1. Galuega Faavaitaimi
O lo’o fa’aauau pea ona fa’apafala mo se taimi lē tumau faigāmalaga mo galuega fa’avaitaimi mo le masina lenei o Ianuari, a’o tau fa’amae’a le galuega a le Komiti tofia a le Kapeneta, o lo’o aofia ai ma nisi o Fa’auluuluga o Matāgaluega a le Mālō, i le toe iloiloina o le faiga fa’avae ma auala o lo’o fa’atino ai lenei polokalame. O le fa’amoemoe, afai e mae’a le galuega ona fa’aofi lea o fautuaga i le Kapeneta mo le iloiloina i le fa’ai’uga o lenei masina ma fai i ai se fa’ai’uga a le Kapeneta.
E lē toe po se lilo i le pāia o le atunu’u le tāua o lenei polokalame mo ō tatou tagata. Ma o le agaga o le Mālō, se’i toe sasa’a le fafao, ma poupou lelei vaega e ao ona fa’aleleia ina ia mautū ma malosi faiga fa’avae, o auala, aiaiga ma tu’utu’uga e puipuia ai o tatou tagata galulue i nei galuega. E fa’apea fo’i i le puipuiga o le atunu’u, ma a tatou fo’i atina’e o lo’o taumafai e fa’atino e fa’amoemoe fo’i i o tatou tagata e fa’atinoina. E fa’atāua fo’i le maua o avanoa tutusa mo tagatānu’u o Samoa, e filifilia mai i nu’u ma afio’aga aemaise le fa’atāuaina o le sao o le pule mamalu a Ali’i ma Faipule e auai ai i lenei polokalame.
Ua si’itia le anoano o le mau fa’afitauli ua aliali mai i tamafanau sa galulue, pe o lo’o fa’aauau pea ona aofia i lenei polokalame, ma ua o’o ai lava ina āfaina ai soifua o nisi. O le tula’i mai o nei tulaga, e lē mafai ona nofoa’i le Mālō, ae ao ona sa’ili se vai fofō ma toe autalu, ma iloilo tupe toa, vala tāua uma o lenei polokalame. Afai e ta’oto lelei, e manuia le aga’i atu i le lumana’i, ae a valetu’ulima, o le a tatou feagai pea ma faigatā e aliali mai, ma o’o ai i se tulaga e sili atu ona ogaoga.
O le mea lea, e talosagaina ai le lava papale o le atunu’u, a’o tau fa’amae’a le galuega o lo’o fa’atino nei.
O lo’o fa’aauau pea feso’otā’iga ma le Mālō Ausetalia ma Niu Sila ina ia o latou nofo silafia i fuafuaga o le iloiloga o le polokalame.
2. Fa’atūina o le Pulega mo Oloa e Auina atu i Fafo (Samoa Export Authority)
Ua fa’amaonia e le Kapeneta le fa’atūina o le Pulega mo a tatou oloa e auina atu i fafo. O le tasi lenei galuega tele ma fa’amoemoega sa fa’ata’oto e le tatou Faigāmālō, ina ia mautinoa le si’itia mauāluga o le aofa’i o ā tatou oloa e auina atu i maketi i fafo.
O le fuafuaga, e amata lenei tapenaga i oloa mai le aufaifa’ato’aga ma le aufaifaiva e ta’imua ai le Esetete Tausi a Samoa (S.T.E.C.). Peita’i o le fuafuaga mamao a le Mālō i le aga’i atu i le lumana’i, e aofia uma oloa a le atunu’u o lo’o auina atu i fafo. O le fa’amoemoe o lenei fuafuaga, ina ia sā’ilia ma fa’amautū maketi o oloa auina atu a Samoa i atunu’u i fafo, ina ia lava oloa e tapena atu i Samoa mo maketi i fafo, ma le atoatoa ona lelei o oloa, ma fa’amausalī fe’utanā’iga ma itutino ma Fa’alapotopotoga, e fitoitonu ma aiaiga ma tu’utu’uga o le auina atu i fafo o oloa a le atunu’u. O le agaga ia fa’afaigofie mo le atunu’u le auina atu i fafo o ana oloa mo le fa’atauina.
E fa’afetai atu Samoa mo talosaga molia ma le manatua pea o le Mālō ma ona Ta’ita’i. O lo’o ua manuia le sā’iliga togafitiga a le Tama’ita’i Palemia ma e i ai le fa’amoemoe pe a pule alofa le Atua, tatou te feiloa’i ma lana afioga, i le fa’ai’uga o lenei masina.
O lo’o o tatou i ai i le vaitau o timuga. O lo’o fa’aauau pea fo’i ona o tatou i ai fa’atasi ma lu’itau o fa’ama’i pipisi ma le Koviti – 19. O le tu’ualalo ia saga fa’atāua pea lo tatou tapenapena ma nofo sauni. E tāua fo’i le tausia lelei o le soifua mālōlōina.
Le atunu’u e, Samoa ou te taofi afai e tumau pea lo tatou fa’amoemoega i le Atua, le fa’avae o lo ta Mālō Tuto’atasi, e tumau fo’i lana puipuiga ma lona alofa tunoa e lē mavae i lo tatou atunu’u.
Ia alofagia e le Atua le pāia o le atunu’u, mai ona Ta’ita’i Fa’alemālō, Ta’ita’i Fa’aleatunu’u, tainane Ao o Fa’alupega o lo’o tala fa’auto i le atunu’u. E fa’apea fo’i i le loaloa o Samoa, ia agalelei le Atua i lo outou pāia.
Ia manuia le fa’ai’uga o lenei vaiaso.
