(Aso Faraile 10 Fepuari 2023 – Fale Samoa, Pulega Tagata Tafafao Maimoa Mai Fafo
Mapu ane ia i le Afeafe o Ali’i o le fono, pa’ia ‘apo’apogatā, ua e’e ma pāpā a’ao i lo tatou malu. E le toe ‘aufagaina pa’ia le vāea, o le fa’alepa o le va’atele, auā
- pa’ia Fa’aletalalelei, i le afio a lau Afioga i le taitai o le sauniga Latu Lafai
- Paia Faalemalo i le afio lau Afioga i le Minisita o Faatoaga ma Faigafaiva, afifio Minisita o le Kapeneta, ma Faipule o le Palemene,
- Afifio sui o Malo Mai Fafo ma Paaga mamae a Samoa
- E’etai foi Faauluuluga o Matagaluega ma Faalapotopotoga a le Malo
- Le vaofilifili i le mamalu o pisinisi eseese o loo feagai ma le atinae o tagata tafafao mai fafo
- ae tainane sa le ‘avea o le Atunu’u.
E talitonu le taofi, e lē tapu’eina fa’ala’au gase, auā olea ua mae’a ona totō le usi ma le mamae, e lē sa to’otaumua i lo tatou taeao.
E le o lilo i le atuvai o Alo, le tofa taulagalaga pea, i lo tatou Malo, aua lava le tautua fai, ma le tapu’eina pea o le atina’e o tagata tafafao, e tusa o faiga fa’avae ma fuafuaga alualu mamao.
E fegalua’i fa’afitauli ogaoga, sa matagi taumuaina ai, ae fa’afetai ile Atua, i lona ‘a’ao fa’amalumalu ia Samoa, o lo’o maua ai pea le malosi e fa’agalutau ai, matagivale o lenei vaitau.
O le fuafuaga alualu mamao o le tusi taiala 2022-2027 mo le Vaega Maoti o Tagata Tafafao Mai Fafo, e tapuvaetasi uma i le siitia lea ile 250,000 tagata asiasi mai i Samoa i tausaga taitasi.
O le faatotogaina o lenei faamoamoe, e veloaso uma iai Vaega eseese
- mai le faaleleia ma le faalauiloa o mataaga ma vavau o lo’o fausia ai le aganuu ma le agaifanua a Samoa
- i le faasaoina ma le faamatagofieina o lo tatou siosiomaga lanulauava
- faapea le toe timataina o le upega fagota e ala i auaunaga a faletalimalo ma fale apitaga,
- aemaise o le toe matimati ma faateleina vaalele ma vaa meli e afea si o tatou atunuu.
- A o se tulitulimatagalu mo le tapu’eina o le tomai o aufaigaluega o lo’o tu i matagiolo e feagai ma malo asiasi mai
O le talitonuga maumaututu o le Pulega, a o tatou galulue soosootauau e faatino lenei faamoemoe, o le a le pine le maua o galuega ma siitia le tamaoaiga mo aiga, ma afioaga, faapea tupe faasili e faasoa mo le atinae lautele o Samoa.
O le tu’ualalo fa’amanatu a le ‘Aumatapō o le Atunu’u, pe’ā to fa’ata’uta’u le matagi. Se fa’atutū mai foe, ina ia faiaina le savili. A’o tala fo’i i le malae o le taua. Se! e leo malie lava le tao, o le tātā i le uatogi.
O le mea moni, e le ‘asa le tigā, ma lona aogā. A lē tafe tino i vai, faigatā o la tatou galuega fai, auā le atiina’eina o lo tatou Atunu’u. Talofae, e a’e fua.
Ia ua ua fa’atasi la tatou tautua fai i le Malo, e ala i le Pulega ma le Vaega Maoti, e māmā ‘avegasi’i ai mea uma, va atu lo outou tautigā.
Ia fa’afo’i ai pea le vi’iga i le Atua.
Soifua ma ia manuia ona o Iesu
