Aso lua, 4 Aperila, 2023
Ou te fa’atulou atu i le pāia mauāluga o si o tatou atunu’u. E afua mai i ona itu tetele ma ona itu taulagi, auā pāia fa’alemālō, o pāia fa’ale-atunu’u, ma pāia fa’ale-talalelei. E fa’apea fo’i i le loaloa o si o tatou atunu’u se’ia o’o atu i nai fanauiti. Tatou te sula fa’atasi, ma momoli lapalapa o mālō i lo tatou Atua, auā o lo’o soifua laulelei, ma folau Samoa i matagofie o lona malamalama ma lona alofa tunoa.
O lea ua o tatou taunu’u manuia i le masina lona fa o lenei tausaga. Mālō āfua ailao ua maua, i lo outou soifua galulue ma le fai tatalo mo si o tatou atunu’u.
O lenei vaiaso i le feagai o le Kapeneta ma ana fa’ai’uga i matā’upu lautetele sa iloiloina, ua manatu e fa’atāua pea le logo puiali’i o le pāia o le atunu’u i nei fa’ai’uga mo le silafia.
I tulaga o tofiga mo Ofisa Sili o Pulega mo Matāgaluega a le tatou Mālō, o se tasi o vaega tāua ona o nei tofiga e fa’amoemoe i ai le unā’ia o le fa’atinoina o galuega a le Mālō i ona itutino ‘ese’ese. O le ala fo’i lea, e mauāluga ai le fa’atāua o le tofi o i latou ua i ai agava’a ma tomai e latou te ta’ita’ia ai Matāgaluega ma Fa’alapotopotoga a le Mālō e tusa ma Tulafono ma Faiga Fa’avae o lo’o fa’atonu folau ai galuega a le Mālō, ma ana auaunaga i le atunu’u.
O lea ua tofia le Ofisa Sili o le Matāgaluega o Tiute ma Tupe Maua. E pei ona mua’i fa’ailoa atu, sa i ai tapenaga na mo’omia mo le toe fa’atulagaina o lenei avanoa e fa’avae i vala tupito mo lenei Matāgaluega a le Mālō. O le afioga iā Fonotī Talaitupu Lia – Taefu ua tofia i lenei avanoa, ua silia i le 20 tausaga o galue i le Matāgaluega o Tiute ma Tupe Maua. O lo’o ia umia fa’ailoga mauāluluga, o agava’a, poto masani, le fa’autaga ma le tomai e mo’omia mo le galuega, ma mautinoa ai le ausia o taunu’uga mo’omia ma matāti’a ua fa’atulaga mo galuega a le Matāgaluega.
Ua tofia fo’i le ulua’i Failautusi o le Komisi o Galuega a le Mālō, po’o le Ofisa Sili mo le Ofisa o le Komisi o Tagata Faigaluega a le Mālō, talu mai le 2015, na soloia ai lenei avanoa. O le naunauta’iga o le tatou Mālō, ina ia lelei ona fa’ata’oto matāfaioi a le Komisi, aemaise i lona tulaga tuto’atasi e pei ona aiaia i le Tulafono. Ma o le toe fa’atūina o lenei avanoa o le a fesoasoani tele i le fa’afoeina o le aufaigaluega, va’ava’aia o tiute ma matāfaioi a le Ofisa o le Komisi, e fa’apea fo’i i le saga matimatiina o matāfaoi fa’aletulafono a le Komisi. E le gata i lea, ae ina ia fa’aauau ona tu’uina mai e le Komisi i le Mālō, fautuaga tau i faiga fa’avae, mo le atina’eina o tagata faigaluega, tapu’eina o agava’a mo’omia mo le fa’aleleia o galuega a le Mālō ma le tu’uina atu o ana auaunaga i le atunu’u. O le susuga iā Kolone Tikerī, sa galue i Fa’alapotopotoga a Mālō Aufa’atasi, Fa’alapotopotoga a le Mālō, ma Matāgaluega a le Mālō e aofia ai ma le P.S.C. O lo’o ia umia fo’i fa’ailoga mauāluluga ma ua lava tapena i le tomai ma le silafia, o le agava’a ma le tōfā mai le Atua, e poupou ai ma fa’ata’oto galuega a le Komisi o Tagata Faigaluega a le Mālō.
I le mae’a ai ona fa’atino o vaega mo’omia uma mo tauofoga a le Mālō, ua fa’amaonia nei e le Kapeneta le fautuaga a le Komiti o Tauofoga, mo le fa’aleleia o le auala lea e amata atu i Tanugāmanono se’ia pāia Siumu. O le tasi lenei atina’e tele a le Mālō o le a fa’agasolo ma e mautinoa o le a si’itia ai le fa’aleleia o femalagā’iga a le atunu’u i le aga atu i Siumu, Falealili ma Safata.
O le vaiaso nei fo’i na fa’amaonia ai e le Kapeneta se fetu’unā’iga fa’apitoa, mo na’o ta’avale e fa’aāogaina e le aufaifa’ato’aga. E luasefulu tausaga talu ona fa’aāoga se ta’avale, o le ā fa’atagaina ona toe aumai i Samoa. Ia silafia lelei, e na’o taavale four (4) wheel drives ma piki apu māmā, mo fa’ato’aga e fa’atagaina mai. E tumau pea le Faiga Fa’avae a le Mālō e 10 tausaga mo isi ta’avale uma e aumai i le atunu’u. E tumau pea fo’i Faiga Fa’avae e tatau ai ona fa’amalieina vaega uma o le tulafono e talia ai se talosaga, mo se ta’avale e fa’aulufale mai i le atunu’u. E na’o ta’avale lava e lelei atoatoa e fa’atagaina i lenei fetu’unā’iga fa’apitoa.
O le vaiaso fo’i na se’i mavae nei, na fa’amaonia ai e le Kapeneta le amatalia aloāia loa o le tatou maliega ma le Mālō o Isaraelu. O lenei fa’amaoniga o le a mafai ona o tatou malaga i Isaraelu e aunoa ma le tāpā o se Visa, ma e fa’apea fo’i mo tagata Isaraelu pe a asiasi mai i Samoa. Ua fai si leva ona tapena le fa’amaoniga o lea maliega, peita’i, e i ai vaega sa mo’omia ona fa’amanino ma fa’atino i Tulafono, e le gata mo i tatou ae o Isaraelu fo’i, na afua ai le tuai ona fa’amaonia aloāia lenei feagaiga i femalagā’iga.
O lea fo’i ua fa’amaonia e le Kapeneta le toe fa’aleleia o malae ta’alo i le malae fa’avāomālō i le Apia Park. E i ai a tatou taligāmālō o lo’o aga’i mai e aofia ai ma ta’aloga a le Manu Samoa, ta’aloga a le Moana Pasefika, ma isi i lenei tausaga ma ua matuā mo’omia ai le toe fa’aleleia o le tatou malae ta’alo. O lo’o fa’aauau pea le atina’e o ta’aloga ‘ese’ese i Samoa ma o lo’o ua ta’oto atu i le Matāgaluega o ‘Āoga, Ta’aloga ma Aganu’u ma Fa’alapotopotoga o Ta’aloga a Samoa, tapenaga masani ma le fa’atautaiga o nei ta’aloga uma.
Samoa e, e lē mafai ona tu’uina le agaga fa’afetai atu o le tatou Mālō ona o itu uma ma vaega ‘ese’ese o lo’o fa’atino ai le tatou auaunaga mo le atunu’u, tumau ai lo tatou fealofani ma le feavata’i, ma fa’aauau ai lo tatou atina’e lautele. O le tatalo ia fa’asoa tutusa mai pea i lagī manuia mo i tatou uma, e aumai lava i ona ao se’ia o’o i se toe tagata.
O lenei fo’i vaiaso, o se vaiaso tāua i le kalena a Ekalesia Kerisiano uma i le Lalolagi ona o le fa’amanatuina o le maliu tīgā o lo tatou Ali’i o Iesu Keriso i le satauro, ma lona tanumia, atoa ai ma lona toetu manumālō mai le tu’ugāmau. E tumau pea le fa’atāua a le tatou Mālō i le tapu’eina o le soifua auauna i le Atua, o lo’o fa’avae ai lo tatou Mālō tuto’atasi.
E avea ai a’u nei, e fai ma sui o le tatou Mālō e momoli atu ai fa’amanuiaga o le Eseta i le atunu’u atoa. Ma le tatalo ina ia o tatou maua fa’atasi le agaga o le Maliu ma le Toetu manumālō o lo tatou Ali’i Fa’aola, e ala i lo tatou fefa’amagaloa’i ma le alofa e lautua i mea uma.
Ia manuia le Eseta.
