Media Announcement by the Hon. Prime Minister Fiame Naomi Mataafa
Aso Tofi, 04 May 2023 @ 3:00pm
Ou te fa’atalofa atu i le paia maualuga o si tatou atunu’u i ona tulaga fa’alupe. Ou te talitonu o loo maualuga pea le alofa ma le tausiga a le Atua i lo outou soifua laulelei. Fa’amalo le folau manuia i lenei vaiaso o le a mae’a, e ui ina o tatou vaaia le fesuisuia’i o le tau, ma le pepesi o le fulū i nei vaitau. Ae le mavae le tu’uina atu o le viiga i le Atua, ona o lana tausiga alofa mo Samoa.
O le fa’aauauina o galuega ma fa’ai’uga a le Kapeneta i lena vaiaso ua tuanai ma lenei vaiaso, o le ala lea o le feiloaiga ma tusitala e fa’ailoa atu i le atunu’u.
I tulaga tau i le soifua maloloina, ua silafia e le mamalu o le atunu’u, le agaga o le Fa’aiuga a le Kapeneta ina ia malolo aoga amata, aoga tulagalua ma Kolisi i lenei vaiaso. E pei foi ona tatou iai i le lua tausaga taluai i puipuiga o le Koviti, o le ituaiga fa’amai nei e fa’aeteete gata, ona o vairusi e le vaaia e o tatou mata, ae fe’āvea’i e le matagi. Lea e iai nei le fulū (Influenza B) ua pepesi i le atunu’u, ae tele ina a’afia ai a tatou fanau iti. E pei la ona ta’imua ai le Matagaluega o le Soifua Maloloina ma le Matagaluega o Aoga i lenei fuafuaga, o le agaga ina ia fesoasoani le mālōlō o aoga a le fanau i lenei vaiaso, e tau fa’aitiitia ai le pepesi o le fulū, aemaise le fa’atupulaia o fanau iti e taofia i o tatou falemai.
O loo unaia foi galuega e le tatou Matagaluega o le Soifua Maloloina i le fa’aauauina o le faia o tui puipui mo le misela mo le fanau, e pei ona toe aliae mai ai le pepesi i o tatou atumotu tuaoi. E fa’apea foi i isi a tatou tui puipui mo le fatafata vaivai, o le ate fefete, gasegase o le pipili, manava tata, o le ‘ona o le tino, o le lipi, tale vivini, nimonia ma le fiva faiai, atoa ma le puipuiga o le kanesa o le toala fanau i tina ma tamaitai. O loo tulaga lelei le fa’asologa o a tatou tui puipui. O le tui puipui muamua o le misela mo fanau ua atoa le 9 masina le matutua ua tatou ausia le 82%, ae o loo mo’omia ona tulituliloa pea le si’itia o a tatou pasene. E fa’apea foi i le tui puipui lona 2 o le misela mo fanau iti ua atoa le 15 masina le matutua, o loo mo’omia ona si’itia le pasene. Ma e talosagaina pea matua aemaise lava i tina, ma le fesoasoani mai a Komiti a Tina, Sui o Nuu ma Sui Tamaitai ina ia unaia fa’atasi le faia o tui puipui o le fanau.
O lo’o mātauina pea le fa’atupulaia o gasegase e talosaga mai i le Malo mo le auina i fafo mo togafitiga. O le vaiaso na te’a e 13 gasegase na fa’amaonia e le Kapeneta le auina atu i Niusila mo togafitiga. A o gasegase lava e pito sili ona tugā, e mafua mai i ituaiga soifuaga ua soifua ai lo tatou atunuu, ua tauau ai ina lē mafai ona tāofiofi le a’afia o o tatou tagata i fa’amai lē pipisi, po o non communicable diseases. O le a se fofō, e mafai ona tatou fa’atino faatasi? Ou te talitonu, o loo i a tatou lava le tali, aua o ituaiga taumafa o loo tatou taumamafa ai o loo tu’usaunoa pea. O le lē faia o siaki fa’afomai i taimi e tatau ai, atoa ai ma le lē fausia o fautuaga e tu’uina atu pea e le tatou Soifua Maloloina, o mafuaaga ia o le faatupulaia pea o gasegase lē pipisi.
Le atunuu e, o le tatalo lava a le tatou Malo, ia tautuana lo tatou soifua maloloina. O le tala fa’amomoi loto, o le toatele o i latou ua aafia i gasegase nei e auina i fafo, e talavou. O lona uiga, afai e faaauau pea lenei tulaga, e faigata le lumanai, ma le fa’aauauina o auaunaga mo le atunu’u. Aemaise le fa’asolo atu ina taugatā tele mo tatou uma le auina atu pea o gasegase e le Malo mo togafitiga i fafo.
I tulaga tau i a tatou atinae tetele, o loo fa’aauau pea le fa’aleleia o le auala tele o le Malo i le agai atu i le malae vaalele i Faleolo. O le vaiaso nei sa fa’amatuu atu ai konekarate mo le fa’atāina i le ta molemole (asphalt) vaega o le auala i le fa’asolo atu i Malua, Tufulele ma Faleasiu, ma fa’asolo atu ai i le vaega o le auala ua maea mai Faleasiu e tau atu i Leulumoega. Ua maea foi ona tu’uina atu konekarate mo le fa’aauauina o vaega o le auala e agai i le malae va’alele i Faleolo.
I tulaga i le atinae tau fa’amaumauga ma tekonolosi. O le vaiaso nei na folasia ai i le laulauāfono a le Kapeneta le Tulafono Taufaaofi mo le Faia o le tatou National ID, po o le card e tuuina atu i tagataanuu o Samoa, e faigofie ai ona iloa fa’amaumauga o lona aso soifua, ma isi tulaga taua. O lenei galuega ua 5 tausaga o taumafai mai, ma o le fa’amoemoe, o lenei Tulafono Taufa’aofi e fa’atulaga lelei ai aiaiga fa’aletulafono e limataitaina ai vaega uma o le a fa’atino mo lenei ID. Ma e manatu, o se tulaga lelei lea mo le agai atu i le lumanai, e mafai ai ona maua fa’amaumauga o tagata uma mai lava i le taimi fa’atoā soifua mai ai, ma fa’afaigofie ai ona tapa auaunaga tau falemai, aoaoga, pisinisi ma fefa’atauaiga, atoa ai ma ni fa’amaoniaga e mo’omia mo isi auaunaga e masani ai le atunu’u. O le fa’amoemoe la, o le a fa’ase’e atu mo le tagofia e le Palemene lenei Tulafono Taufaaofi, tusa ma tulaga o loo fa’atino ai galuega a le Maota.
O le vaiaso nei foi na folasia ai le lipoti a le Komisi Suesue na fa’atuina e suesue mataupu tau palota i le maea ai o le Faiga Palota tele a le atunu’u i a Aperila, 2021. O tulaga masani ia e fa’atino pe a maea faiga filifiliga a le atunuu. O se galuega na maitauina e le Kapeneta le mae’ae’a ona fa’atino e tamalii ma faletua na tofia i lenei Komisi, fa’atasi ai ma le fa’asopolia o a latou feiloaiga ma soalaupulega ma le atunu’u i Nu’u ma Afioaga, aemaise Itumalo Fa’apalota. O loo taoto i lenei lipoti fautuaga mo le agai atu i le lumanai i vaega eseese o faiga palota i le atunuu. E tusa ai ma ala ma faava’a e fa’atino galuega fa’apenei, o le a tu’uina atu i le Palemene mo le lauliliuina o lenei lipoti.
O lea ua fa’amautu polokalame faai’u mo le fa’amanatuina o lo tatou 60 tausaga atoa ai ma le agai atu i le fa’amanatuina o lo tatou 61 tausaga. Ua fa’amoemoe e faatino fāagatama i le tai i le Aso 26 o le Masina nei o Me, ona agai lea o le tatou Malo e auai i le Sauniga mo le fa’amanatuina o le taeao o le taunuu mai le Ekalesia Katoliko i Samoa nai Malaeola ma Gafoaga i Lealatele i Savaii, i le Aso 27 o Me.
O le aso 31 Me, ua atofaina e faia ai le sauniga aloaia e faaiuina ai le fa’amanatuina o le 60 tausaga o lo tatou tutoatasi i le afiafi i le Malae i Tiafau i Mulinuu. O le a faia ai le sauniga fa’afetai ma talosia ai le agai atu o le atunuu i le fa’amantuina o lona 61 tausaga.
O le a fa’atino ai foi ma le tauaaoina atu pine ma faailoga taualoa a Samoa i ai latou ua filifilia e fa’ae’eina atu i ai nei fa’ailoga, e amanaia ai la latou tautua mo Samoa. A maea le sauniga mo le tuuina i lalo o le tagavai e faatino e le Malu o le Malo, ona fa’aiu loa lea i le koneseti tele ua tapenaina, ona po ai lea o le po.
O le taeao o le Aso Tofi, 1 o Iuni, o le a faatino ai le sauniga aloaia mo le fa’amanatuina o lo tatou 61 tausaga i le Malae o Tiafau. E pei ona i ai i tausaga ua mavae, e amata i le tatou faafetai i le Atua, ona sosoo ai lea ma le sisiina ae o le tagavai o le Malo Tutoatasi o Samoa, ma faasolo ai solo fa’aaloalo a le fanau aoga ma fa’alapotopotoga eseese i le atunuu.
E iai fa’afiafiaga ua fa’atulaga mo le aoauli o le aso lava lea, ona fa’aiu ai lea i le sauniga mo le tuuina i lalo o le tagavai e taualuga ai polokalame mo le fa’amanatuina o le 61 tausaga o lo tatou tutoatasi. O se taimi ona fa’amautu lea o a tatou Malo fa’aaloalogia. O isi tulaga uma, o le a fa’ailoa atu e le tatou Komiti o le Tutoatasi mo le saga fa’alauiloaina i le atunuu.
O loo fa’agasolo pea usugafono a Samoa i tulaga fa’aminisita, ma nisi o le aufaigaluega a le Malo i atunuu i fafo. O vaega lava o loo laualuga i fonotaga o tulaga tau i le soifua maloloina, aoaoga, siosiomaga ma punaoa fa’anatura, atinae tau fa’atoaga ma faiga faiva, atoa ai ma tulaga tau i le puipuiga o le saogalemu.
O loo toesea le Afioga i le Ao Mamalu o le Malo ma le Masiofo e auai i le fa’auuga o lana Maiesetete le Tupu o Peretania – Salesa le III i lenei vaiaso. O loo fa’atalia mai e le tatou Amapasa i Peleseuma mo le fa’amoemoe, ma toe taliu mai ai i le vaiaso fou.
O vaega tetele ia sa tagofia e le Kapeneta ma fai i ai iuga i lenei vaiaso. O le tatalo lava a le tatou Malo, ia o tatou galulue faatasi pea, mo le atinaeina o si o tatou atunuu. O galuega uma o loo taumafai e le tatou Malo, e mafua ona tino ma lelei, ona o lo tatou nutimea faatasi, e alo i luma le sa o Samoa.
Ia manuia lau tapuaiga Samoa. Ia malutia pea si o tatou atunu’u e aao fa’aola o Iesu Keriso.
Soifua ma ia manuia
***************************
Good afternoon! The focus of today’s press conference is to provide a summary of Cabinet outcomes in the last seven days.
Schools closure for all Early childhood centres, primary schools and colleges are a part of nationwide preventative measures to curb the spread of the ‘Flu strain’ now prevalent in Samoa particularly among the schools population with resultant growing admissions to hospitals. This has come as a recommendation to Cabinet from both the Ministries of Health and Education,
The Ministry of Health continues to drive the Extended Program of Immunisation and encouraging the public especially parents to update and maintain the vaccination statuses of all children given the re-emergence of diseases such as measles as apparent in neighbouring American Samoa
We are also seeing a consistent increase in the number of patients requesting treament overseas mainly for non communicable diseases and complications. We can only advise for all of us to look at changing lifestyles including dietary changes and find alternatives if we are to see a downward trajectory in the prevalence of NCDs in Samoa and move towards a healthier pathway particularly for our youth
Work is continuing on the completion of the remaining segments of the West Coast Road towards the airport with the last of the contracts being let.
Cabinet had the opportunity to discuss the National ID Bill which will now be presented for Parliament’s consideration. Although it has taken 5 years of planning and consultations, implementation is within sight once the legislative processes are completed.
A report was tabled in Cabinet on the outcomes of trhe Electoral review following the last general election. Parliament will now consider this report at its next sitting.
The plan for the final events of the commemoration of 60 years of independence will include the Fautasi regatta on the 26th May to be followed by the commemoration of the arrival of the Catholic church in Lealatele Savaii on May 27. A thanksgiving service will be held at Tiafau on the evening of May 31 to conclude the 60 year commemoration program. Service medal awards will be conferred that same evening before the flag is lowered to close the 60th year anniversary program.
On Thursday morning June 1, the formal ceremony for the 61st anniversary celebrations will begin with the church service followed by the raising of the flag and the march past. Cultural entertainment will be held in the afternoon followed by the ceremonial lowering of the flag to conclude the 61st anniversiary celebrations.
A special variety concert will be held at Mulinuu to conclude the formal program.
We continue to have ministerial representation at the various international meetings and conferences overseas. The focus of these meetings are on the issues of education, health, agriculture and fisheries cooperation, security and climate change and natural resource management and conservation.
The Head of State and Masiofo are attending the coronation of their majesties King Charles III and Queen Camilla on the 6th of May. HE High Commissioner Francella Strickland and HE Ambasador Fatumanava Dr Pao Luteru are part of the delegation. The Head of State will be delivering the keynote address at a Commonwealth – Coronation special event on Small Islands States with Samoa as the Chair of the Alliance of Small Islands States (AOSIS). King Charles is now the head of the Commonwealth and CHOGM24 hosted by Samoa will be his first leaders meeting.
Soifua ma ia manuia.
