O tina Samoa ua fa’atusaina “O le Matofi o Fausaga Mau” ma o le sini autu fo’i lea o le Aso Fa’apitoa mo Tina o Samoa I lenei tausaga.
O tina ua iloga a latou tautua i vaega ese’ese o le atunu’u e pei o totonu o Ekalesia, o Aiga ma Nu’u aemaise o le tatou Malo.
O lo’o fa’amanatuina i le tausaga nei le atoa ai o le 60 tausaga talu ona tutoatasi le Malo o Samoa mai i pulega fa’a-kolone. O se tasi o fu’a taualuga o lenei fa’amanuiaga ua aeae ai le atunu’u, o le sao taua o tina ma tamaitai ua auomanū ai le sailigamalo a Samoa i lana tautua i so’o se tafa o le soifua manuia o tagata uma. O le pine fa’amau o le avea ai o le tama’ita’i ma ulua’i Palemia o Samoa Afioga ia Fiame Naomi Mata’afa.
E le gata i fa’amanuiaga gafataulimaina ona o le sailimalo o tina ma tama’ita’i, ae ua fa’amanatu ai foi le alagatatau ma amanaia le malu o tina ma tamaitai i totonu o le atunu’u. O lo’o fa’amauina pea le si’itia o sauaga fa’asaga I tama’ita’I i le maualuga e 60 pasene i le Su’su’ega o le Saogalemu o Aiga (2017). Ae le gata i lea, o lo’o fa’amauina fo’i i lea lava su’esu’ega le maualuga o sauaga e fa’atino e tina i a latou fanau i le 31 pasene.
E le fa’aitiitia le sao o tina i totonu o atina’e a Ekalesia ese’ese o Samoa. O lo’o fa’amauina le la’iititi atu o le numera o tama’ita’i i le 3 pasene pe a fa’atusatusa I ali’i i le tu’ufa’atasiga o Ekalesia uma (SBS, 2021). Ae peita’i, o lo’o fa’amauina le maualuga o le numera o tina i le 65 pasene e auai i mafutaga e pei o le Mafutaga a Tina ma le Aufaipese (MWCSD, 2017).
E taua ai ona fofola lo tatou fala, ae sei ato fevailiai le tofa ma le fa’autaga i le atunu’u aemaise tina ia malu laotaoa i pulega fa’apea ma fa’ata’ita’iga lelei.
O le tausaga lenei ua atoa iai le 20 tausaga o fa’amanatu e Samoa le Aso Fa’apitoa o Tinā, e amanaia ai lo latou sao taua i le taitai’ina ma le tautuaina o Aiga, Nu’u, Ekalesia ma le Malo. O se tofa fetala’i a le malo e fa’ataua ai le atina’e fa’aauau o lo’o fa’atinoina e tinā, ina ia aofia tagata uma aua se manuia o Samoa.
O le polokalame mo le fa’amanatuina o le Aso Fa’apitoa o Tina i Samoa, o lo’o ta’imua ai le Matagaluega o Tina ma Tamaita’i Atina’e o Afioaga ma Agafeso’ota’ma ana pa’aga. E amata le polokalame mo tinā o Savai’i i le Aso Gafua 8 Me, 10:00 i le taeao i le Ofisa o Tina ma Tamaitai i Salelologa. E fa’ai’u ai le polokalame i Upolu i le Aso Tofi 11 Me, i le 9 i le taeao i le To’oa Salamasina i Sogi.
Press Release End
