(SO’O’UPU A LE MĀLŌ): Ua si’itia avanoa mo talosaga i sitiseni nofomau i Niu Sila e pei ona i ai le Se’i o le Quota mo Samoa i tausaga ta’itasi, mai le 1,100 sa laugatasia ai tausaga ua mavae, i le 1,650 i lenei tausaga, e pei ona fa’aopoopo ai le 550.
Mo le mamalu lautele o Samoa o lo’o fia talosaga mo ia avanoa, ua fa’amalosia ai le tu’uina atu o so’o se talosaga e fa’aāogaina ai ‘upega tafa’ilagi a le Ofisa o Femalagā’iga a Niu Sila.
O lea Faiga Fa’avae fou e amata fa’amamaluina i le Se’i o le Quota 2023 e pei ona amata tatalaina se’ia tapunia i le Aso 31 o Aokuso 2023.
SI’ITIA O AVANOA O TALOSAGA MO SITISENI NIU SILA
O le si’itia o avanoa talosaga mo sitiseni Niu Sila e tusa o fa’amaumauga a le Ofisa o Femalagā’iga a Niu Sila, e afua mai i avanoa sa le’i mafai ona fa’aāogaina i le Se’i o le Quota i le 2020 ma le 2021 ona o le Koviti – 19.
O lona uiga, o ia avanoa sa le’i mafai ona fa’aāogaina, o le a fa’asoasoa i totonu o tausaga e tolu, e amata atu i le tausaga e 2022 se’ia o’o atu i le 2025, ma ua ta’oto ai le fa’aopoopoga e 550 si’itia ai le aofa’iga atoa o avanoa o talosaga mo sitiseni i Niu Sila i le 1,650 i le tasi tausaga.
TALOSAGA E FA’AĀOGA AI ‘UPEGA TAFA’ILAGI
O le Ta’iala i le resitalaina o talosaga mo le Se’i o le Quota i luga o ‘upega tafa’ilagi, sa amata fa’atino mai le masina o Oketopa 2022, ina ua fa’atoā toe tatala o tatou tuāoi fa’avāomālō ona o le Koviti – 19. O so’o se tasi e talosaga mo ia avanoa, e matuā fa’amalosia lava le fa’aāogaina o ‘upega tafa’ilagi e tu’uina atu ai lau talosaga.
O lea faiga, sa matuā sa’ausi lelei ai le soālaupulega ma le fa’atalanoaga i le va o le Ofisa o Femalagā’iga a Niu Sila ma atunu’u o le Pasefika tauala atu i le Matāgaluega o le Va i Fafo (M.F.A.T.).
O lea faiga, na fa’ailoa e le Ofisa o Femalagā’iga a Niu Sila, ina ia faigofie, vave ma mautū lelei ona tapena vaega uma e mana’omia mo e o le a talosaga.
TAIMI FA’ATULAGAINA:
Mo le se’iina o le Quota o lenei tausaga, o lo’o i ai le fuafuaga ae le’i fa’amautūina, o le Aso 06 Oketopa 2023 e se’i ai numera ua manumālō a’o le Aso 16 Oketopa i le Aso 20 Oketopa 2023, e tu’uina atu ai le Tusi e fa’ailoa ai ua taliaina lau talosaga.
O i latou ua fa’amanuiaina, e tatau ona talosaga mo le nofomau i Niu Sila i totonu o le 8 masina talu ona tu’uina atu le Tusi e fa’ailoa ai ua fa’amanuiaina oe (Invitation to Apply).
Mo nisi fa’amatalaga atili e tusa o lenei fa’amoemoe, fa’amolemole asiasi i le ‘upega tafa’ilagi a le Ofisa o Femalagā’iga a Niu Sila, o lo’o i ai le kopi i le Gagana Samoa ma le Fa’aperetania mo lo outou silafia:
–MAEA—
