O lenei pepa o fa’amatalaga o lo’o auiliili atu ai le mataupu o lo’o fa’aulutalaina.
- Na tuuina mai le talosagaina a le Kamupani a le Tatiana Investment Limited (Kamupani) mo le toe fa’afouina o ana laisene pisinisi, e aofia ai ma le laisene mo le faleaiga a le Rosa fa’atasi ai ma le Fale Kalapu o le RSA i totonu o le masina o Mati 2023. E tusa ai ma aiaiga fa’aletulafono mo le fa’afouina o pisinisi laisene, e tatau ona tu’uina mai se tusi poo se lisi (valid lease agreement) ua mae’a ona sainia fa’aletulafono e le e ana le fanua/fale, e fa’amaonia ai le lisiina fa’aletulafono o le fanua o lo’o fa’atinoina ai le pisnisi. E le’i mafai ona tu’uina mai e le Kamupani se lisi fa’atasi ma lana talosaga, ae na tu’uina mai le kopi o le tusi mai i le Matagaluega o Punaoa Fa’alenatura ma le Si’osi’omaga o lo’o iai le aso o le masina o Me 2019, e lagolagoina ai le talosagaina mo le fa’afouina o le laisene pisinisi. O se lape i le matāfaioi a le Matagaluega, i lana iloiloga le mata’ituina o le talosaga sa tu’uina mai na afua ai ona fa’amaonia ma tu’uina atu le laisene pisinisi a lenei Kamupani i le amataga o le masina o Me 2023.
- Na toe lāgā lenei mataupu, i se iloiloga na fa’atinoina mo talosaga uma na tu’uina mai lisi ma pepa fa’amaonia fa’aletulafono, na afua ai ona maitauina e le Matagaluega e le’i tu’uina mai e le Kamupani o lo’o taua, se maliega poo se fa’amaoniga faaletulafono o le lisiina o le fanua o lo’o fa’atinoina ai le pisinisi ua taua, e lagolagoina ai le talosaga.
- E tusa o le aso 8 o Iuni 2023, na logoina ai le Kamupani i se tusi mai i le Matagaluega e fa’ailoa ai lenei vaega ma logoina ai le Kamupani i le iai lea o le avanoa e ono fa’alēaogaina ai lana laisene pisinisi ua mae’a ona tu’uina atu, pe a lē mafai ona tu’uina mai fa’amatalaga ma pepa fa’amaonia e mo’omia. Ma sa tu’uina i ai aso e 7 e tu’uina mai ai le maliega fa’aletulafono o le lisiina o le fanua o lo’o fa’atinoina ai le pisinisi. I le mae’a ai o le 7 aso muamua lea, e lei maua mai se tali a le Kamupani i lenei mataupu..
- E tusa o le aso 21 o Iuni 2023, na tu’uina atu ai loa le fautuaga a le Matagaluea o Tiute ma Tupe Maua i le Minisita o Tupe, e fa’atatau i lenei mataupu ma fa’ailoa ai le tulaga o lē usitaia e lenei Kamupani o faiga fa’avae ma le tulafono ma ua alaga tatau ona faalēaogaina loa lana laisene pisinisi. I le aso 4 o Iulai 2023, na sainia ai e le Minisita o Tupe le poloaiga (Notice) mo le fa’alēaogaina o le pisinisi laisene ma tu’uina atu loa i le Kamupani i lea lava aso mo le umi e 7 aso faigaluega, e tali mai ai i lenei poloaiga.
- Na tu’uina atu le poloaiga lona lua e fa’alēaogaina le laisene pisinisi i le Fa’atonu o le Kamupani, le susuga ia Afoa Amituana’i Faleulu Mauli e tusa o le aso 19 o Iulai 2023. Sa fa’atinoina ai loa galuega a le Matagaluega e tusa ai ma le tapuniaina o le fale kalapu ona ua fa’aleaogaina le laisene pisinisi. Sa logoina e le Kamupani e le Matagaluega o Tiute ma Tupe Maua i le aso 27 o Iulai 2023, o lo’o ua galulue ma le Matagaluega o Punaoa Fa’alenatura ma le Siosiomaga e fa’amae’a le fa’atinoina o le lisi faaletulafono, ma talosagaina ai le taimi e 30 aso e fa’atino ma faamae’a ai lenei fa’atalatalanoaga. Na saili fesoasoani le Matagaluega i le Ofisa o le Loai Sili e tusa ai ma le talosaga a le Kamupani. E le’i taliaina e le Matagaluega le talosaga, ma sa fa’ailoa uma foi i ai mafuaaga ua lē taliaina ai le talosaga i le tusi na ave i le Kamupani i le aso 3 o Aukuso 2023, e aofia ai ma isi pisinisi (Rosa Café & Faleaiga) o lo’o fa’atinoina uma i totonu o le fale.
- E lē gata i lea, na fautuaina foi e le Matagaluega o Tiute ma Tupe Maua, le Pulega Fa’atonu e Fua Tatau ai Ava Malosi i lana fonotaga sa fa’atinoina ia Iuni 2023, le taofia o le talosaga mo le fa’afouina o le laisene o le ava malosi a le Kamupani o lo’o taua, ona o atugaluga e fa’atatau i le fa’afouina o le pisinisi laisene e pei ona taua muamua.
Fonoti Talaitupu Lia
Ofisa Sili o Pulega
Matagaluega o Tiute ma Tupe Maua
