Tulouna ia oe Saleupolu! Tulouna le afio o le fofoga o le Alataua ma le Usoalii. Susu oulua o Matua ma le Alo o Malietoa,Alalata’i Mauletauā ma le nofo ituaiga ia Tuisamau.Fai mai ao tofa Tagaloalagi, ae taufagu e lona faletua. Tagaloalagi e, Tagaloalagi e, se’i e maleifua maia. Se ua fa’ali’ali’a le asō. Pe o le ā tua ea i ni ā le leo nei e taufōnō.
Fa’auta i lou lumafale ua o se ta’otogai’asa, ma ou tuafale ua o se faasausauga a manumā!Ae ou te le’i so’aina la le loto nai i le itutolu o Sagaga, le Faleono o Leatigaga, Faleata ma le Gafa, ou te mua’i afe atu i lau Susuga i le Ta’ita’i o le Sauniga.Tau lava ina fono fa’apipii atu ma le agaga faafetai tele e tusa ma le tapenaga faaleagaga. Faafetai mo upu faalaeiau e matimati ai pea le soifua galulue o ē uma sa lafo ma’a, ma galulue punoua’i i le tapenaina o nei matati’a tetele ua faapaiaina ma molimauina i le asō. O le tasi lenei o vaega aupito i sili ona taua i vaega autu e tolu o le ola a’oa’oina o le fanau aoga.
The three basic domains of a child’s educational development.
i.) O le itu i le Tino, Physical Domain, ii.) O lona mafaufau, Cognitive Domain, iii.) O le itu faaleagaga, Spiritual or Psychosocial Domain
Malo i lau faatofalaiga faalefaatuatua. O la matou tatalo, ia alofagia pea e le Atua lou faapunapa’ulia ai i le afioaga nei aua lana feau ma lana galuega. Faatumu mai lagi lau utu, aua lo oulua valaauina ma le Susuga i le Faletua.Tulou sei fai lava si au tala faasavai’i lea. O si a’u ā mau faasavaii.Faimai na malaga mai Ulualofaiga ma Sula mai Toga, ma lo la auvaa e to’a 8 ma taunuu i Fagaloa. Ona faapea atu lea o Ulualofaiga ia Sula, sau ia ina o ma le isi to’afa lea o le tā aumalaga, tou te nonofo mai luga o le mauga o Fao, ae o le a matou nonofo atu ma le isi to’afa lea i lalo nei. Na iloa mamao atu e Sula mai Fao le lalelei o le alo tama’ita’i o Auva’a i Falealupo, e afua ai le fuaitau, “Ou te tu i Fao ae ou sopo i Malata, ma ou saposapo ūa.”
Ua ola Lapaili le Faletua, o se ali’i aulelei ma manaia. Ona fai atu lea o Sula, o le a faaigoa lo’u atalii i lo’u igoa o Sula, ae fa’aumi ia manaia. Ona maua ai lea o le igoa o le Alii o Sula-Manaia! O Sula-Manaia la lea na usu mai i le alo o Tuliaupupu.
O le asō, ua o tatou omai faatasi, se’i sulamanaia le alofa ma le agalelei o le Atua, sei sulamanaia le tofā fa’amatua moepō, sei o tatou sulamanaiaina le fa’atofalaiga a le tatou afioaga ma le Itumalo, e tauala i lana Fonofaavae, ina ua mafai ona faasafua se vaega o lana poloketi tasi le miliona tala, mo nei atina’e mo alo ma fanau a le afioaga.
Lau Afioga i le Tofi, Lau Afioga i le Matua o le Savaiinaea, se uma molimau lou suafa ma lou faalagina i le asō.Ua ēa le pologa sa amo e nai matua, faapea le Komiti. Le Susuga i le Tama’itai Puleaoga ma Faiaoga, aemaise lava i nai o outou alo ma nai fanau aoga. Ēa faapefea? Ēa mai le feinu i vai palapala, ēa mai le saofafa’i i luga o le sima palapala ma le vevela o le potutusi. Ēa mai le saofafa’i i fafo i le lā ma le timuga. Ae ua ā nei?
A lele ua sula le manaia o le vai mama, ua sula manaia le nofo i luga o tiles ma le faamālūlū i totonu o le potu tusi. Ua sula manaia le nonofo i totonu o le fale mo faatasiga tetele. Ua moni le sa’afi a le fatupese Eperu, “Lo’u agaga e, faamanu atu ia iā Ieova, o mea uma fo’i oi totonu ia te a’u, ia faamanuina lona Suafa Paia!Lau Susuga i le tama’ita’i Puleaoga ma le aufaigaluega. O upu e masani ai faifeau pe a tatalo fa’aiu ina ua mae’a le lauga, “Ua uma nei le galuega a le tagata ae lalafo atu i le galuega lilo a lou Agaga Paia”.
Ua faapena se tu’ualalo a le tatou Matagaluega. Ua maea le pito laau a le Komiti, Matua ma le afioaga, ae ua tu’uaao atu i lau Susuga ma le Aiga Faiaoga mo le vaai ma le tausia lelei oa outou aseta ma mea totino. E le o se potu malulu e su’e atu o tofafā ai, ae o lo’o faatali tamaiti.
Pe taumamafa ma ulaula ai. E mafai ona mapu iai, ae lē o le eva ai. O tatou o tausimea, a va’ai ma tausi lelei, e umi ona aoga ma lelei. Ae a tatou faatamala, tou te toe fesili atu i le Komiti ma le Afioaga, ae tou fetoai ma le tala a le faafafine, Sorry a Tonati!
SOIFUA MA IA MANUIA!
