FOLASAGA MUA & PAIA
Ua mae’a ona topule le inati mo Manuvao auā le Atua ma lona finagalo e pei ona saunoa iai le Sa Levī, le Susuga Faafeagaiga ia Simalu Kovati. O lea ua togi le pa tau i le ave le ‘ulu nai atuā, i le fa’amoemoe na lupe lea ua vaelupe maua i le alofa ma le agalelei o le Atua. Fa’amanuia le Atua i lau Susuga ile Ta’ita’i, fa’afualoa le soifua ma ia maua pea le mau e tele ile tofā mai le Atua auā le fagaina ole lafumamoe.
E talitonu foi o lea ua ma’ea ona paepae ulufanua i pa’ia ma sā o lenei aso ma le fa’amoemoe. O le a lē toe o’o iai se upu auā e lē toe aloina fa’alua se ogasami e tasi ae tau ina matou fa’atulou i sā lē avea o Nu’uuli ma Vaipaepae, e Afifio ai le Aiga Salevalasi. E puipui e le Tautalaga a Faiumu ma le mamalu ia Salemuliaga. Ao malae foi o loo afio ma faamaepaepa ai le Afioga i le Tamaitai Minisita, poo le tofi mamalu o le Itumalo.
TALA O LE GALUEGA.
O lenei galuega na amataina i le aso 17 o Ianuari ae faamae’aina ia 16 Iuni I le tausaga lava lenei 2023. Sa faatauofoina ma manumalo ai le konekarate a le Apia Lua Ltd i le tau e $443,335.06
O le umi o le auala lenei e 1km ma lona lautele e 5 mita faatasi ai ma ona alavai.
Vaega faataina o le auala e 1km ae 4mita lona lautele. Ma o se galuega e manaomia ona tatou lagolagoina e ala lea I le tausia lelei ina ia faatumauina pea le matagofie ma aoga foi mo turisi asiasi mai.
FOLASAGA LAUTELE
O auala ua tatalaina i Salafai nei, o le isi lea o pine faamau o Faiga faavae o lo tatou Malo mo ni alamanuia tutusa mo tagata uma i afioaga uma o si o tatou atunuu. O isi ia o atinae a le Malo ua aoga tele mo le soifua maloloina o tagata, soifua fiafia, e toleni ai ma faapa’ū ai le suka ma le totomaualuga, ma vave ai ona si’itia a tatou atinae tau tamaoaiga.
E le gata i lea, e le ta’u fa’atauva’aina e le Malo le sao taua o Taitai o Afio’aga ma le pule faamalumalu a Alii ma Faipule I taumafaiga mo le atina’e ina o si o tatou Atunuu mo nei ma a taeao.
E momoli atu le faafetai i le Kamupani a le Apia Lua Ltd mo lenei galuega lelei ona faatinoina, aemaise le Pulega o Fela’uaiga i le Lau’eleele mo le fuafuaina ma le va’aia faalelei o le faatinoina o lenei galuega.
SIGN STA
Avea foi lenei avanoa, e momoli atu ai le faamalo ma le faafetai I le Pulega o Tagata Tafafao Maimoa mai Fafo (STA) mo le fesoasoani tauala I le Tofi o le Itumalo (tamaita’i Minisita), lea sa fa’atupeina ai le fausiaina o fa’ailoilo poo fa’asinoala , e pei ona outou molimauina, e fa’afaigofie ai le ala atu aga’I i le mata’aga o le Taga Blowholes.
UPU FAAIU.
Alofa mai le Atua I fuafuaga uma ma lavasiga o lenei aso, ina ia malutia pea
I tatou I ona aao I lena itu I le paia I Aiga ae tainane le mamalu ua potopoto mai.
Alofagia foi fuafuaga a lo tatou Malo aua se manuia o si o tatou atunuu.
Soifua ma ia Manuia.
