ASO FARAILE 4 AOKUSO 2023.
FOLASAGA MUA MA PAIA
Lea ua mua mea i Matāutusā ua te’a foi lo tatou sao mo Manuvao, ile vi’iga ma le faafetai ile Atua ona ua tō i tua Apolima, ua sao le soifua. E toe pi’iama ile fofoga o le aso ile faafetai ile Susuga ile Tamā Toeaina ile Faafeagaiga Faasavalu Leilua. Malō tapena, faafetai le faasoa, ua sa’a faaoti le utu a le faimea e tōmatauina ai lene faamoemoe. Faatumu le utu mai le Atua ma faapa’iaina ma faagaganaina ia tele ni agaga e faasaoina
E talitonu ua pa’ia le Maleolemā, o le Tupua a o le Malaefono na taunuu ai le Mavaega ile tai, e Afio ai Fualau ma le Aiga Alii. Afio Fepuleai, Tilafono ma Faavaoga ma Usoalii. E puipui e lau fetalaiga Tuisalega na ali’ita’i iai le itu, o oe na pule i lou itu ma le mamalu i le Alataua. Talitonu foi o malae lava lenei o loo AFioga ai le Afioga ile Sui Minisita, poo le Tofi mamalu o le Itumalo o Salega #1.
TALA O LE GALUEGA
O le auala fou lenei ua ma’ea ona fausia i sona tulaga moomia ma mautū lelei e aofia ai ma alavai ina ia puipui ma faatumauina ai pea le lelei ma le fa’aleagaina ai o nisi o isi meatotino. Ma o le silasila foi lea a lo tatou malo i atina’e o auala, e ave le fa’amuamua i vaega o loo afifio ma papa ‘aao ai le mamalu o lo tatou atunuu. O le ala foi lea, na filifilia ai lenei auala i le asiasiga a le tatou malo ona o loo toatele e o loo afifio ai. O le tatalo a le tatou Malo, ia avea lenei atinae ma meatotino a lo tatou nu’u, ina ia tausi lelei ina ia umi lona fa’aaogaina.
O lenei galuega sa fausia ma mulimulita’i i luga o aiaiga ma faiga faavae o galuega faatino o auala tetele a le tatou Malo.
Sa faatauofoina faalauaitele e le Malo lenei galuega mo le sailia ai o se kamupani e faatinoina.
I le maea ai o le iloiloga a le Komiti, ma tuuina mai ai le fautuaga e tuuina atu lenei galuega i le kamupani a le FICO CONSTRUCTION i le tau e $595,340.63SAT ina ua faamalieina uma vaega sa tuuina mai i le tauofoga.
O le auala ua mae’a fausia e:-
- 1.5 kilomita le umi o lenei auala.
- 500 m ua faataina ma lona lautele 4m
- 1 km e lei faataina o lenei galuega.
Sa faatupeina atoa lenei galuega i lalo o vaega tupe ua faaagaga mo galuega tetele a le tatou Malo.
UPU FA’AMALO
Momoli atu le faafetai tele a le Malo i le pulega faamalumalu a Alii ma Faipule o lo tou Afioaga. Faamalo i lo outou onosai i tulaga uma sa faalavelaveina ai lo outou mamalu, i taimi sa faatinoina ai lenei galuega.
E momoli atu foi le faafetai i le mamalu o le atunuu i lo outou onosaia o nisi o faafitauli sa tula’i mai a o faagasolo ai lenei galuega tele ua mae’a nei.
Faafetaia foi le Kamupani a le FICO construction mo le faatinoina o le galuega i fua faainisinia e pei ona aiaia.
Faafetaia foi le Pulega o Felauaiga i le Lauelelee mo le vaaia lelei mo le faatinoina o lenei galuega.
UPU FAAI’U
Se itula silimea le seuga a alii i le faamoemoe. Ia mamao ni aolealea i le paia ua sasao nei ma ia aomanū lenei aso i le agalelei o le Atua soifua.
Soifua ma ia manuia.
