ASO TOFI 3 AOKUSO 2023.
FOLASAGA MUA MA PA’IA
O lea ua ma’ea ona fana le ū o le vateatea i lo tatou va tapuia ma lo tatou Tapa’ausili i le lagi, e pei ona saunoa iai le ta’ita’i o le sauniga. Toe faaopoopo le faafetai i le Susuga i le Faafeagaiga ia Enele Auvaa. Maualuga le viiga o le Atua i lenei taeao, ae tō faaifo mai lagi manū, auā lou lua faafale-lē-malu ona o le tausiga o le lafu mamoe. Faatumu e le Atua le utu ma fai mālolōina le galuega a le Atua.
E iai le manatu o le a ta’oto ia faatuāi’a lē ūia pa’ia ma sa lē avea o Vailoa nei, e Afifio ai le Faasisina ma le Aloalii. Susū le Fofoga o Lilomaiava. E puipui e le Faleao ma Saletaulua ma upu ia te oe Palauli. A o se Malaefono auā le Afifio o Faasisina ma Sa Lilomaiava ma Aloalii. Afifio Tapa’au o le Itu. E puipui e Safaleoletauā ma To’oto’o o Vailoa ma Oe le Pule.
TALA O LE GALUEGA
Talitonu o lenei auala fa’atoa fai ai lea talu ona outou soifua mai ma O se uluai taimi foi lenei ua fausia ai lenei auala. E momoli atu ai le faafetai tele I le tofi o le itumalo le Tofa ia Lagaaia mo le faama’ite i mea lelei aua le itumalo.
O le auala fou lenei e pei ona silafia, ua ma’ea lona fausiaina i sona tulaga mautū e pei ona iai nei.
O lenei galuega sa fausia ma mulimulita’i i luga o aiaiga ma faiga faavae o galuega faatino o auala tetele a le tatou Malo.
Sa faatauofoina faalauaitele e le Malo lenei galuega i le masina o Ianuari 2023 mo le sailia ai o se kamupani e faatinoina.
I le maea ai o le iloiloga a le Komiti, sa tuuina mai ai le fautuaga e tuuina atu lenei galuega i le kamupani a le Apia Lua Ltd i le tau e $567,036.25 SAT ina ua faamalieina uma vaega sa tuuina mai i le tauofoga.
O le aso 20 Ianuari 2023 agai le aso 20 Aokuso, O taimi faatulagaina ia o le fausiaina o lenei auala, peita’I o lea ua tou silasila atu ua maea le galuega I totonu o le taimi faatulagaina. O nisi na o aiaiga mo le faatinoina o galuega a lo tatou malo.
O le auala ua mae’a fausia e:-
- 1.7 kilomita le umi sa fausia ae 1 kilomita sa vali taina I le lautele 4mita
- 700 mita le vaega e le’o faataina o le auala.
Sa faatupeina atoa lenei galuega i lalo o vaega tupe ua faaagaga mo galuega tetele a le tatou Malo.
UPU FAAMALO
Momoli atu le faafetai tele a le Malo i le pulega faamalumalu a Alii ma Faipule o lo tatou Afioaga. Faamalo i lo outou onosai i tulaga uma sa faalavelaveina ai lo outou mamalu, i taimi sa faatinoina ai lenei galuega.
E momoli atu foi le faafetai i le mamalu o le atunuu, i lo outou onosaia o nisi o faafitauli sa tula’i mai a o faagasolo ai lenei galuega tele ua mae’a nei.
Faafetaia foi le Kamupani a le Apia Lua ltd mo le faatinoina o le galuega I luga o ala fua faainisinia e pei ona aiaia.
Faafetaia foi le Pulega o Felauaiga i le Lauelelee mo le vaaia lelei ma mataitū le faatinoina o lenei galuega.
UPU FAAI’U
Tautai mai le Atua e ou mea uma ina ia to i tua ni ao valevale ma ni ao gasolo, ni to’oto’o taia ma le fue ne’i lafo, i Paia eseese o lenei aso.
Ma ia o tatou folau pea i le vaa o Pualele na tutupu matagi i liu.
Soifua ma ia manuia.
