AFIOGA ILE SUI MINISITA O LE MATAGALUEGA O TINA MA TAMAITAI: AFIOGA IA FIAME NAOMI MATAAFA
Lau Susuga i le Taitai o le Sauniga, lau Susuga Mariota Sia’ea, O le Faafeagaiga o le Ekalesia Metotisi- Matafele., Afio o le Amepasa o Saina i Samoa nei: Mr Chao Xiaoliang, Afifio o Minisita o le Kapeneta, Afio mai le sui o le Aoga Fa’aauau – Hunan International Business Vocational College: Mr. Shan Feifu, Afifio Sui o le Atunuu ole Komiti Faavae o le Poloketi o Atinae o Itumalo, Ofisa Sili o Pulega ma Faauluuluga o Matagaluega a le Malo ma Vaega Tumaoti, Le paia i sui o itumalo ua filifilia mo le Aoaoga Suisui, le mamalu o le au valaaulia.
Manatu o lea ua a’e i Fagaone le fa’atamasoāli’iga a le tautai matapalapala, sa se’e temeteme ile tai lipilipi o Salemuliaga. O lea foi ua mapu ile ‘ete le ologāsama e ala ile taulaga molia sa fītaituga iai le auauna ale Atua, aua o lō latou nafa tausi lea.
O le ‘a ou le toe inumia la le vaisola ma le vaimōea o le Tagaloalēfolāsa, pe ou te inu malie ile vai fa’anā tama, nei tilofia pei o le vai nai le si’u o Amoa, i sā ma faigā o le aso. O paia ma mamalu, ua malu taue’e ma malu atutia, aua o paia lava mai le vavau e oo ile faavavau.
A o le aso ma le faamoemoe o lea ua tini pao, le uto e pei o le faiva o Tapalega, aua o le faamoemoe ua taunuu, o le laau lea o le soifua. O lea ua tatou fesilafa’i i pu’e o manū ae le o mala, i le Maota o Tooa Salamasina nei ona o le alofa tulituliloa o le tatou Tapaau Sili ile Lagi. Ua tau mai foi i fanua le faigamalaga a Sui o le Malo o Saina, o matuaofaiva o le a faatautaia le Aoaoga Suisui mo Samoa ma e maualuga ai pea le viiga ile Atua.
O le asō, ua tatala aloaia ai le Polokalame Suisui mo Samoa e pei ona iai le faapaaga a le Malo o Samoa ma le Malo o Saina tauala atu i le Matagaluega o Tina ma Tamaitai, Atinae o Afioaga ma Agafesootai. O le lona tolu ai lenei o Aoaoga Suisui ua faatautaia e le Malo o Saina mo Samoa. O manulauti o nei aoaoga
- Ia siitia tomai ma agava’a o tina ma tamaitai, tupulaga talavou, alii (tamā) ma i latou e iai aafiaga tumau o le soifua i le su’iina o soo se ituaiga laei e moomia e le aiga
- la fa’aaoga le tomai ma agavaa ile fausiaina poo le amatalia o pisinisi laiti aua le atinaeina o aiga, nuu, itumalo ma Ekalesia i tulaga tau tamaoaiga.
O lenei aoaoga o le a faatautaia e le Hunan International Business Vocational College. O lenei a’oa’oga sa fuafuaina e faataunuuina I le tausaga e 2019, peitai sa toe faapafala ona o le Koviti19.
O sui ao’oga ua filifilia mai lea i Itumalo e 51 o Samoa e aofia ai 31 sui o Upolu ma le 20 sui o Savaii. O le aoaoga mo Upolu e faia lava i le Maota nei, o le Tooa Salamasina, ma le aoaoga mo Savaii e faia lea ile Ofisa o le Matagaluega o Tina ma Tamaitai i Salelologa. E amata le aoaoga il e Aso 22 Aokuso, 2023 o le aso ā taeao lea, ae fa’amaeaina ile Aso 9 o Oketopa, 2023 mo Upolu ma Savaii.
Mo le paia o sui o itumalo e 51 ua maua lenei avanoa, o outou o auga o aute o lenei polokalame. Ia outou manatua, o le avanoa o le mea e maua gata, ia outou faataua le avanoa ma faaoga tatau. E toatele tagata o le tatou atunuu e agavaa I lenei polokalame ae ua filifilia outou e fai ma sui. Ia outou talia ma le loto faafetai le faamuamua ua tuuina atu ia te outou, ma ia fai I le mea e gata ai lou mafai. Ia e faamaoni I le 7 vaiaso o le aoaoga e ala I lou auai, ma pu’epu’e mau tomai o matuaofaiva mai Saina. O le faamoemoe, ia maea ane lenei 7 vaiaso, ua maua sou tomai fou I lenei faatufugaga, ina ia mafai ona fai sau oe lava pisinisi laititi e fesoasoani I le tamaoaiga o lou aiga, nuu ma lau ekalesia. A manuia oe ma lau atina’e, o le a faapena ona e maua le avanoa e faatele ai lou faleie, ma fai oe ma faamanuiaga I isi.
E fai a’u ma sui o le malo o Samoa, e momoli le agaga faafetai i le Malo o Saina, e tauala atu I le Amepasa o Saina i Samoa nei, mo lenei fesoasoani taua ua tuuina mai. Faafetai I le Hunan International Business Vocational College mo le faavanoaina mai o matuaofaiva o lenei polokalame e faasoa mai le tomai ma le agavaa aua se manuia o tatou tagata.
E faaaogaina foi lenei avanoa e faafetaia ai le Afioga ile Ofisa Sili o Pulega o le Matagaluega o le Va-i-Fafo ma Fefaatauaiga (MFAT) aemaise o le aufaigaluega ona o le fesoasoani mai i fesootaiga ma le Malo o Saina ina ia mafai ona tino mai lenei faamoemoe ma ua taunuu ai i manū ile asō.
Ona afe mai lea o se matou fa’amatalaga, ia manu teleina lenei taeao i le Susu o lau Susuga i le taitai o le sauniga, afifio o sui o le Kapeneta, Sui o le Malo o Saina; Sui o Matagaluega ma Faalapotopotoga a le Malo, aemaise Samoa ua potopoto. Ia manū fa’aifo mai lagī manuia o le Atua i lenei faamoemoe ma le faagasologa o lenei aoaoga i aso o lumanai ai seia oo ia faamaeaina.
O lea ou te fiafia e faasilasila atu, ua tatala aloaia nei le Polokalame o Suisuiga ma Meataulima mo Samoa 2023.
Soifua ma ia Manuia.
