Le Taitai o le Sauniga, lau Susuga Deacon Tolutasi Paiaaua
Le mamalu o le au vala’aulia / Distinguished Guests
Sui o ‘Au taaalo mai atunuu e mamao / Officials and Team from overseas
Le mamalu ua sasao nei / Ladies and gentlemen
O lea ua mae’a ona molia le taulaga i le Atua e pei ona fitaituga iai lana auauna. Ua logo i tino matagi lelei i le feau matagofie ma e fa’amalo i lau Susuga i le Tiakono mo ou faiva alofilima.
Ou te mua’i faatalofa i le mamalu ua tatou feiloai e molimauina le faalauiloa aloaia o le taamilosaga faavaomalo o le Digicel Teuila International Tag Competition 2023.
Ou te talitonu e le fou lenei faaagatama i tauvaga faavaomalo. Sa faafoe muamua le tauvaga e le Samoa Tag Incorporated i le tausaga 2018. Peitai sa le mafai ona faaauauina ona o tulaga na iai le lalolagi i le koviti ma vavao sa feagai ai.
O le asō, ua maua ai le avanoa e toe faatino lenei taamilosaga faavaomalo, ina ua mavae le lima (5) tausaga o to’a. Ua maua e faapea e to’a 500 i latou o lo’o malaga mai i Samoa mo lenei taamilosaga, lea e fuafua mo le faaiuga o lenei vaiaso.
Ua molimau foi i galuega fa’aauau a le Samoa Tag Incorporated i le latou anava e atia’e lenei ta’aloga i totonu o Samoa. Ua iai nisi o a’oa’oga ma faalauiloa ua mafai ona faatino mo le vaega o a’oga. Ua fuafua foi le Samoa Tag e amata se Homework Centre mo le fanau ma faatotoga i masini ma meafaigaluega aua meaaoga a fanau.
E faamalo i le Taitaifono, le Afioga ia Faleomavaega Titi Tafua ma le Peresitene o le Samoa Tag Incorporated, Faaofonuu JP Leota ma le latou Pulega mo le tapenaina o lenei taamilosaga. O le a fai foi lea ma tulaga e faalauiloa ai e le gata o le ta’aloga o le Tag ae faapea foi Samoa i totonu o le li’o o lenei faaagatama.
E le galo foi le fa’afetai i le Kamupani a le Digicel Samoa Co. Ltd ma le Pulega, ma isi paaga ua mafai ona lagolago e faataunuu lenei taamilosaga.
I ‘au ta’aalo, ia manuia le tausinioga.
I aiga ma uo ua malaga mai ma faaaoga lenei avanoa e asiasi mai i Samoa, ia manuia fuafuaga uma.
Ua tatala aloaia nei le taamilosaga o le Digicel Teuila International Tag Competition 2023.
Soifua ma ia manuia.
