O le fa’amai o le mūmū tutupa e le o se fa’amai e fou ma ua tausagā le iai pea o lea fa’amai i totonu o Samoa. O le mūmū tutupa o se faama’i e feaveaia e namu. E aafia le tagata pe afai e ū e se namu, ua aafia i anufe o le mūmū tutupa. E ulufia e anufe itu tino o tagata ona sosolo lea i ala toto ma nonofo ma fanafanau ai. O le mafua’aga lena e poloka ai alatoto, ma afua ai āuga o le mūmū tutupa e pei o le fiva ma le fūlafūla o itu tino.
“O le lu’itau o lenei fa’amai, e faigata lava ona iloa ni āuga sei vagana lava ua o’o ini o’oo’oga tūgā”, e tusa ai ma le saunoaga a le Fa’atonu Sili Aoao o le Soifua Maloloina, Prof. Dr. Aiono Ekeroma. O le naunautaiga a le Matagaluega o le Soifua Maloloina ma ana paaga galulue ina ia unaia uma ē agava’a e inu fualaau o le mūmū tutupa ina ia fa’aitiitia anufe o le mūmū tutupa (intestinal parasites) mo i latou ua a’afia ma fa’atamaia ai anufe pepe o le mūmū tutupa o lo’o ola ma fanafanau i ala toto o tagata soifua. Afai ae fa’atamaia anufe o le mūmū tutupa, o le a fesoasoani fo’i e fa’aititia le pipisi o lenei fa’ama’i o lo’o feave’aia e namu.
O le lua (2) ai nei o fa’ainuga fualaau, ua fa’aogaina ai ituaiga Fualaau e tolu (3) o le fa’amai o le mūmū tutupa e pei ona iai ta’iala aloa’ia a le Fa’alapotopotoga o le Soifua Maloloina o le Lalolagi (Triple Drug regimen recommended by WHO for the treatment of Lymphatic Filarisis). O le naunautaiga o le faauluuluga o le Ofisa o le Fa’alapotopotoga o le Soifua Maloloina i Samoa, Dr Kim Dickson, ina ia lagolago ma una’ia le fa’atinoga o fa’ainuga fuālā’au o le mūmū tutupa ina ia mafai e Samoa ona ausia le tulaga e tafiesea ai le mūmū tutupa e pei ona iai isi atunuu o le Pasefika.
Na taua e le Sui Fa’atonu Sili o le Matagaluega o le Soifua Maloloina, Tagaloa Dr Robert Thomsen, o le Fa’ainuga Fualaau o le mūmū tutupa e agava’a ai i latou uma e amata atu i le 2 tausaga aga’i luga le mātutua. E lē mafai ona inuina e fanau fa’atoā fananau mai se’ia o’o i le 23 masina le matua, o tinā to, o tinā failele e le’i atoa le 7 aso o lana pepe fa’apea ai ma gasegase tigāina i falema’i po’o totonu fo’i o ‘āiga.
O le fa’atinoga o le Fa’ainuga Fualaau o le mūmū tutupa o lo’o ta’imua ai tausi soifua i lea galuega tele, ma fesoasoani ai Sui o Nu’u ma Sui Tama’ita’i o Nu’u uma faapea ma le lagolago a paaga galulue a le Matagaluega, auā le savalia o ‘āiga mo le fa’ainuina o fuālā’au o le mūmū tutupa. O sui filifilia o nu’u ma afioaga faapea ma le aufaigaluega galulue, ua mae’a ona faia a’oa’oga mo le fa’ainuina o fuālā’au o le mūmū, ma e fua lava le to’atele o le aufaigaluega galulue i le aofa’iga o nu’u ta’itasi. O le faatupeina ma le fa’atotogaina o lenei faamoemoe tele, o lo’o lagolagoina e le Malo o Samoa fa’atasi ma paaga.
O le tauvala’au fa’a-le-soifua maloloina mo le mamalu o le atunu’u e agavaa le fa’ainuga fualaau, e fa’amolemole e inu fuālā’au o le mūmū tutupa ina ia puipuia mai ai i aafiaga ogaoga o le fa’amai o le mūmū tutupa.
Mo nisi fa’amatalaga, fa’afeso’otai mai le 66600, 21212 ma le 800-6440.
