O lea ua i liu o lou sa Samoa le atu sa tulituliaupu e tautai o le loloto, e tusa ma la tatou taulaga molia i le Atua. O lea foi ua maea ona taoto ma paepae ulufanua paia ma mamalu fa’a-le-atunuu, fa’a-le-ekalesia ma paia fa’a-le-malo. O paia lava e le avea, e tumau mai lava i le vavau e o’o i le fa’avavau.
O lea ua mapu i le sasaga le utuga vai nai Ma’auga ma Nu’uausala, e ala i le taulaga o le fa’afetai ua saunia e lana auauna, le susuga i le alii Faifeau Foma’i, lau susuga Vaitusi Nofoaiga, lea na fai ma o tatou ositaulaga i lenei afiafi. Fa’amalo faafetai.
Fa’afetai foi i le laumua i Malua mo le lagiina o viiga o le tatou sauniga amata.
Ae ua tepa nei i ula ae tago i ula ua futifuti fa’amanuula lenei aso taupoina, o le lona 33 o tausaga o Fa’aaliga o le Teuila i Samoa. Ua togo ai nei le malama i Saua, ae ua fotu pule le faiva o tama, aua o lea ua tatou aulia ma le manuia le fa’amoemoe o lou atunu’u ma ona tagata, e ala i le toe tapu’eina o au tu ma au aganu’u Samoa, o ou faiva alofilima ma lau anava, ina ia aua nei mavae pe see ese faai’a o le gataifale au measina e te fa’amemelo i ai. Aemaise o le toe tatalaina ai o femalagaiga fa’a-va-o-malo talu le fa’ama’i sa pagatia ai le lalolagi atoa e aofia ai ma Samoa.
O le Atinae poo le Alamanuia o Tagata Tafafao Maimoa mai Fafo, o se matafaioi e tausoa ma tauave e tagata uma o lo tatou atunu’u. O ou talaave Samoa ua lelea i le lalolagi, e ala i taleni pese ma siva, tama ma teine i ata tifaga faapea ta’aloga fa’a-va-o-Malo ua fa’amanuiaina ai o tatou tagatanu’u. Ma o se tasi lenei o fa’alauiloa aupito sili ona aoga ma vave e fa’alauiloa ai lo tatou atunu’u.
O lenei Atina’e o se tasi lea o punãvai o tupe maua a lo tatou Malo. Talu ona toe tatala tatou femagalaiga ua vaaia ma le fiafia le toe sologa lelei o le alamanuia o Tagata Tafafao Maimoa Mai. I le 12 masina talu ona toe tatalaina femalagaiga mai ia Aukuso i le tausaga ua mavae, seia oo mai ia Iulai i le tausaga lenei, ma ua lipotia ai le recovery (le toe faafoi o le tulaga lelei) i le 77.15% (141,925: Jul 2023) o le aofaiga o tagata tafafao maimoa mai ae lei tapunia tuaoi fa’avaomalo ona o le koviti i le 2019 (183,970: 2019). Ua faapea foi i tupe maua mai le alamanuia pe a fa’atusa i le taimi ae lei tapunia femalagaiga. O se tulaga lelei tele lenei pe a fa’atusa i fuafuaga ma matematega na iai ao tatou iai i le taimi o le koviti, sa fa’apea e fa’atoa o’o i le tulaga lenei ua tatou iai pe a maea le 5 i le-7 tausaga.
O galuega fa’alauiloa o loo tatou galulue iai, o taumafaiga uma e fa’amalosia ma fa’atosina mai tagata tafafao e maimoa i si o tatou atunu’u ma sasa’a mai lo latou tamaoaiga e atinae ai Samoa.
O lea e taua tele lo tatou sao ma galuega fa’atino, e ala i le fa’amama ma le fa’amatagofie o tatou laufanua ma aai, o le puipuia lea o le saogalemu o tagata tafafao mai, aemaise lo tatou agaga fia talimalo lelei.
Ia tatou galulue fa’atasi ina ia fa’atumauina lo tatou ta’uleleia ma tumau ai la tatou anavatau tauave – SAMOA LALELEI – BEAUTIFUL SAMOA – ae ia laualuga ai pea le Alofa ma le Fa’amaoni e faatino ai la tatou pito laau.
Ia fa’amanuia mai le Atua o Samoa i lenei vaiaso atoa, aua le feagai ai o lo tatou atunu’u ma fa’aaliga eseese, o pesepesega faaleagaga ma tauvaga, o ta’aloga o le a feagai ai, faapea le taualuga o le sailia lea o se lalelei o Samoa mo lenei tausaga.
Ou te fa’asilasila atu ua tatala aloaia nei le Fa’aaliga lona 33 o le Teuila mo lenei tausaga 2023.
SOIFUA MA IA MANUIA
