Susu Lau susuga i le Ta’ita’i o le Sauniga
Afifio Sui o Malo mai Fafo
Afifio a Tatou Pa’aga mo le Atina’e o Samoa
Afifio le mamalu o Samoa ua aofia potopoto e molimauina le fa’amoemoe i le asō.
O lea ua ma’ea ona te’a sa ma faiga, aua lo tatou va tapuia ma lo tatou Atua. O le mata’isau o le foafoaga, o le Silisili ese e mai lava i le vavau se’ia o’o i le fa’avavau. E pei ona molia ai e lana auauna i lenei taeao, le susuga i le Fa’afeagaiga ia Reverend Letupu Fa’au’uga Mata’utia.
Ae ou te fa’atulou i lenei taeao i le malu taue’e ua sasao ma aofia potopoto mai, i o outou tofē ma itu taulagi, o itu fa’aleaganu’u ma paia-fa’alemalo. O pai’a aua Pule ma Tumua, Ituau ma le Alataua, Aiga i le tai ma le Va’a-o-Fonoti.
Ae teinane fo’i le fa’afogafoga taputapua’i mai ai o le motu i sasa’e. I le pa’ia aua Sua ma le Vaifanua, Saole ma Saleaumua, Fofo ma Aitulagi ma le Launia na saelua. Fa’atuiolemotu, Tamaolemanu’a tele ma le auva’a o to’oto’o.
O paia sausau gata o Samoa e le taitai ona popo pe a’o fo’i i se fa’amatalaga. Aua o paia e tumau e leai se tautai e fia fagota sagolegole i ai. Ae o le a lu’ulu’u atu ia i tulatoa ma le au fueloloa o le atunu’u aua o le latou galuega tausi ma le faivaalofilima lea.
Ae ua tatou potopoto mai, ona o le fa’amoemoe sa lupe, e pei o le fa’atalau’ula atu o le tatou Fa’alapotopotoga o Su’esu’ega Fa’asaienisi o Samoa (SROS). Ua lagona ai le agaga fa’agae’etia aua, o le asō, o le aso mo le maketiina o le koko Samoa (Samoa Koko Market Day).
E maotua lava ma a’anoa le tala’aga o le koko i Samoa ma e o’o a i le tausaga 1800, ina ua fa’atoa taunu’u le koko i lau’ele’ele matagofie o si o tatou atunu’u. Mai na tausaga e tele ua mavae, ua avea ai le koko Samoa o se vaega taua o le tatou aganu’u, e le gata o se mataiai taua e fia taumamafa i ai lo tatou atunu’u, ae o se alaga manuia i mea tau seleni e to’omaga i ai le toatele o aiga i Samoa. O le koko o se tasi o fua o fa’aeleeleaga sa tele na fa’aaooga ai alo ma fanau i tausaga ua mavae. Sa tautua ai fo’i aiga, nu’u ma Ekalesia. Ma ou te talitonu fo’i o lea e alala mai i le aofia nisi o le mamalu o le atunu’u sa tupuga mai o latou olaga manuia mai le koko Samoa.
O le fa’atuputupula’ia la ma le lelei o le fa’afoeina o toga-koko ma le fausiaina o avanoa e fa’apisinisi ai le koko, o le a matua fesoasoani tele i le tamaoaiga o Samoa, aua e maua ai avanoa faigaluega o tatou tagata ma lagolagosua ai i atina’e o aiga, nu’u ma le atunu’u.
O le autu o lenei aso fa’alauiloa “Fausia avanoa Fa’apisinisi mai metotia fou ma atina’e o le koko”, o lo’o sosolo lelei ma le va’aiga taula’i lautele o le toe fa’aleleia lea ma le fa’alauteleina o alamanuia e maua mai le koko Samoa.
Ae o so’o se atina’e lava e naunau ia lelei, e i ai fo’i ona fa’afitauli. Sa maitauina lu’itau tetele sa fa’afeagai ma le koko Samoa i taimi ua tuana’i. O na lu’itau e aofia ai le fesuisuia’i o le tau e fa’atau ai le koko i maketi, o a’afiaga o le suiga o le tau, fa’ama’i o le koko ma le fesuisuia’i o mana’oga o tagata fa’atau. O ia lu’itau sa avea ma ala e fa’avaivaia ai le atina’eina o le koko Samoa.
Ae peita’i, ua manatu ma talitonu le tatou Fa’alapotopotoga o Su’esu’ega Fa’asaienisi (SROS), e tele ma sili atu le tamaoaiga e maua mai le koko pe a fa’aoga e gaosia ai nisi oloa e sili atu lona tau, e fa’aoga ai le toma’i, metotia fou ma le fa’atekanolosi. O le aoga o le gaosiaina o oloa fou mai le koko, o le a toe lelei ai le maketi o le koko Samoa ma mautinoa ai lona ola lelei fa’aauau pea.
Ua tatou potopoto fa’atasi mai i le asō ma le manatu e tasi, ina ia tatou maua ni metotia fou mo le atina’eina o le koko, ia tatou maua le galulue fa’atasi ae le gata i lea ia sailiili i auala e feliuaina ai fa’afitauli ma luita’u o le koko, e avea ma avanoa e aupito sili ona aoga ma taua. O lenei fa’amoemoe ua fa’atatau mo e o lo’o galueina ma atina’eina le koko Samoa e o mai fa’atasi, talatalanoa ma fetufa’ai i auala e toe fa’aolaola ma fa’aleleia ai le tamaoa’iga e afua mai i le koko i Samoa.
Ma ou te fa’amalosia’u atu ai ia i tatou uma ua aofia mai e molimauina lenei fa’amoemoe i le asō, ina ia matua sailiili i ni metotia fou, saili ni faiga pa’aga ma ia fa’asoa le toma’i. Aua ne’i tu’ua lenei avanoa e alu, ae ia fa’aoga tatau aua le fa’aleleia o le atina’eina o le koko Samoa.
Ona fa’ata’i ai se fa’amatalaga, ia fa’amanuia tele le Atua i taualumaga o lenei aso ua fa’apitoa mo le maketiina o le koko Samoa.
Soifua ma ia Manuia!
Faafetai.
