Aso Faraile, 13 Oketopa 2023 – 10.00am
Susu lau susuga ile Taitai o le Sauniga,
Lau Susuga Rev. Seilala Luamanuvae;
Afio lau afioga a le Sui o le Fono a Sui Tofia;
Afio lau Afioga a le Faamasino Sili ma le Faamasinoga a Samoa;
Afio le Fofoga Fetalai ma Sui o le Palemene;
Afifio le auvalaaulia, aemaise o matua, faiaoga, tama ma teine o le laumua,
o le Kolisi o Samoa; ma Samoa ua potopoto.
Ua mautū i lagī le taulaga siitia, ua tōtō foi le ta’amū te’evao i lo tatou va tapu’ia ma le Tapa’au Sili o le Foafoaga. E faafetai atu ai i lau Susuga i le Taitai o le Sauniga mo le manavaga paia mai i le nofoalii o le alofa tunoa, ae a lenei faamoemoe maualuga.
Ae o paia ma mamalu o lenei taeao, ae a le afifio o Tama ma Aiga, o Aiga ma Tama, le usuga a Tumua ma Pule, Ituau ma Alataua, fa’apea le Aiga i le Tai ma le Va’a o Fonoti; o paia foi i le Faleagafulu, ae a Su’a ma le Vaifanua, Sa’ole ma le Launiu-na-saelua; le afifio o Fa’atui ma To’oto’o ma upu i le Manu’atele – lea ua fa’ataumalama ai nei le ana nai Utumoe, ae mata’itū ma silasa’aga e le pa’ia ma le mamalu, o Samoa ua potopoto. Taoto la ia i le fatu aiga tausi a Tumua ma Pule, o le au fue loloa ma to’oto’o au o le atunu’u, ae tatou patipatia fa’atasi le agalelei silisili ese o le Atua, e fai ma a tatou taulaga.
Ua 70 Tausaga talu ona faatuina le Kolisi o Samoa. O le ulua’i Kolisi Maualuga a le Malö na fa’atuina i le 1953 i le maliega ma Niusila, ma le fa’amoemoe e a’oa’oaina ai alo ma fanau a Samoa, ia Atamai e Tautua mo Samoa – ma avea ma Ta’ita’i o lona Malo Tutoatasi.
O lenei va’aiga mamao a tua’ā ma ta’ita’i o Samoa– ua ta’o’oto mai nisi i tia sa, ina ia mautinoa, e a’oa’oina lelei ona tupulaga lalovaoa, o le lumana’i manuia lea o Samoa. O le mafua’aga fo’i lea na fa’amauina ai le ‘anavatau mo le ā’oga, o lo’o tau’aveina e o’o mai i le asō; – “Atamai e Tautua mo Samoa”.
Ua tele nei tausaga, talu ona a’e i fanua ma taunu’u i matagofie lea anavatau. E le toe fa’amatalaina, le tele o le sao o le Kolisi o Samoa, i le atina’e o le atunu’u. O nei sao ua lē gata i upufai o Samoa i le Palemene ma le Kapeneta, aemaise o le tafatolu o le Faigamalo a Samoa, ae o tofiga maualuluga foi i Matāgaluega, Fa’alāpotopotoga ma Pisinisi Tūma’oti. O lo’o fa’aaogaina pea le to’atele na taliu mai ma le Atamai e Tautua, mai Iunivesite eseese i le lalolagi, ma tomai ‘ese’ese ma agava’a fa’apitoa ua fa’amanuiaina ai, i le atina’eina o si o tatou atunu’u. Ua maitauina fo’i, i lenei lava tausaga, e iai nisi o tama ma teine tuai a le Kolisi o Samoa, ua tofia e avea ma Amepasa o lo tatou Malo, e tauaveina le tagavai a Samoa i le lavaloa ma le lotolotoi o Malo tetele; o nisi foi ua fai ma Taiulu o Faalapotopotoga Faaleitulagi ma le Fa’avaomalo; o fa’aauau ai le Atamai e Tautua mo Samoa, ma fa’alauiloa pea le matagofie, filemu ma le manuia, o lo tatou Malo Tuto’atasi.
O nei uma taunu’uga manuia i alo ma fanau a Samoa, na mafua mai ona o i latou sa galulue i le tapu’eina, ‘a’oa’iina, ma le a’oa’oaina o alo ma fanau o le Kolisi o Samoa. E manatu ai o se laolao lelei lenei, e avea ai a’u ma sui o lo tatou Mālō e fa’aleoina
le agaga o le fa’afetai i a’i latou uma o ē sa tofusao i le fa’atautaiga ma le lagolagoina o galuega fai a le Kolisi o Samoa, i tausaga ua alu. O ē sa galulue fa’afaiā’oga ma pulega, ma so’o se tagata faigaluega i so’o se ala na ‘au’auna ai i lenei ā’oga, ua fa’amalo fa’afetai le fai o le faiva. E manatua fo’i ma le fa’afetai, i latou mai isi atunuu e pei o Initia sa galulue e avea ma faiaoga o lenei Kolisi i le tele o tausaga.
E fa’afetaia fo’i ta’ita’i o le Mālō Samoa i lenei 60 Tausaga talu ona tutoatasi, i lo outou sao na faamausaliina ai le lalagoina ma le tapenaina pea o le Kolisi o Samoa, o le Kolisi Maualuga a lo tatou Mālō, e faapunafaua ai le Atamai e Tautua. E manatua ai fo’i ma le loto fa’afetai le sao o nisi o tua’ā ma matua ua fai i lagi le folauga, i le taumafaiga mai o si a tatou ā’oga.
Le paia e, o i latou na taua nei, o lea ua a’e i manū la outou fa’atamasoali’iga, ua 70 Tausaga o lau Kolisi! O le mea moni, e lē mafai ona o tatou ‘ausia lenei la’asaga ua fa’amanatuina nei; pe ‘ana leai le i’umaea na outou fa’atonufolauina ai le sã o le Kolisi o Samoa, i o outou faiva ma tiute eseese ma le fa’aaogaina o taleni ma meaalofa mai le Atua, sa fa’aoloaina ai outou ta’ito’atasi. Tautai a’e! Ua fa’amālō le pale!
Le Laumua ma le Kolisi o Samoa, lau susūga i le tama’ita’i pule, le pulega ma faiā’oga, matou te le selu atu. Ua outou masani i outou faiva ma le vala’auina aua o le toatele foi, na aoaoina iinei, e Atamai e Tautua. E viia le Atua ona o lo outou alolofa, onosa’i ma fa’apalepale, aua e le o toe faigofie, le a’oa’oina o alo ma fanau i nei onapo. O le tumau o le igoa lelei o le aoga i le manuia o alo ma fanau i su’ega, ma ulufale atu ai i isi la’asaga maualuluga o le soifua a’oa’oina; o le tausa’afia ma le ta’uleleia i le saofa’iga a a’oga a Samoa; e afua mai i lo outou fa’amaoni i lo outou vala’auina, e A’oa’o, A’o’ai, Fa’atonu, Fa’apoto – ia saunia nei tupulaga o ni ta’ita’i, e atamamai e tautua Samoa.
Le paia e o matua ma tama ma teine tuai o le Kolisi o Samoa, mālō le fai o le faiva, o lo outou nofo tatalo ma le taputapua’ia o seuga ma fa’atamasoali’iga a le tama’it’ai pule ma le aiga-a-faiā’oga i o latou nafa, ua afua ai lenei aso. Mālō tapua’i, fa’afetai le lagolagosua i so’o se ala e mana’omia ai e le Kolisi la outou fesoasoani. O lo’o sisila le Atua i la outou tautua – atamai mo Samoa.
Alo ma fanau a le Kolisi, ua i’inei i lenei tausaga – ua atoa iai le 70 o le Kolisi o Samoa, ia loto tetele, fa’amalolosi ma onosa’i e fai lo outou faiva, o le su’esu’e, saili ma fa’amaoni. Ia manatua lelei, o a taeao o Samoa, e tapena nei, i le potu a’oga ma lenei laumua, ma isi foi a’oga uma o lo’o i lo tatou atunu’u. Ia fai pea outou ma tama’i ‘olive ua teuteuina mo le la’o’ai, ae o ni u fanafana i lima o toa. Fai pea fo’i ma fūaga o Lalovao, e fa’amoemoe i ai le lumana’i o ‘āiga, nu’u, ekalesia ma si o tatou atunu’u. ‘Aua ne’i galo; o le va’aiga taula’i a le Mālō na afua ai ona fa’avae le ā’oga i le 1953, ia avea outou ma ta’ita’i iloga ma aogā e tautuaina si o tatou atunu’u i so’o se ala i le lumana’i. Ia outou manuia!
Samoa e ua potopoto e molimauina lenei la’asaga tele ua aulia e le Kolisi o Samoa, ia tatou tatalo fa’atasi, ia fa’atūmauina pea le ‘anavatau na fa’atūina ai le Kolisi o Samoa, e “Atamai e Tautua mo Samoa”. Ia agalelei le Atua ma fa’apupula ona fofoga i so’o se tafa o tufitaufaoina ai lo outou soifua galulue, mo Samoa ma ona tagatanu’u.
Ia faamanuia tele le Atua i le atoaga o le 70 Tausaga o le Atamai e Tautua mo Samoa, o le Kolisi o Samoa!
Soifua ma ia manuia
