Lau Susuga i le Taitai o le Sauniga, Lau Susuga i le Faafeagaiga,
Rev. Nuuausala Siaosi
Afifio Minisita o le Kapeneta, ma Minisita Lagolago
Susu Sui o Malo mai Fafo,
Lau Afioga i le Taitaifono ma Sui mamalu o le Komisi o Galuega a le Malo
Afifio Faauluuluga o Matagaluega ma Faalapotopotoga a le Malo
Tainane le mali’olasi o Alii ma Tamaitai o le Aufaigaluega a le Malo
I le ava tele ou te tula’i atu ai e faafeiloa’i aloaia lo outou paia ma lo outou mamalu i lenei taeao. Malo afua ailao ua maua i le soifua matagofie ona o le tausiga faapeleele a lo tatou Atua.
Malo le usu! Malo le onosa’i! Malo le folau manuia!
O lenei aso, o le aso ua faia e le Atua tatou te olioli ma fiafia iai.
Faafetai i le Susuga i le Faafeagaiga mo le upu faala’ei’au matagofie ma le talosaga molia i lenei taeao.
O se taeao ua tumāti’e ma tumauāluga, aua ua tapena fa’afafine tō’aga e le Silisili Ese le avea o lenei aso ma aso e fa’amanatu ma patipatia ai Auaunaga Lautele a le Malo ma le Aufaigaluega o lo’o faia le tautua. Ua talafeuga ma le feau o le asō; ‘AGAGA TAUTUA’ – aua e leai se vaega o la tatou tautua o lo’o faia mo le Malo ma Samoa, o lilo i fofoga pa’ia o lo tatou Atua.
O le fa’amanatuina o le Aso mo le Aufaigaluega a le Malo, o se fa’amoemoe e tāua tele i le Faigamalō. I le Tulafono Fa’avae o le Malo o Samoa 1960 i lona Vaega lona 7, Palakalafa 83, o lo’o auiliili manino mai ai e faapea; “O le Aufaigaluega a le Malo e faia le auaunaga mo Samoa”; the “Public Service” means the service of Samoa. A fa’afaigofie – O le Aufaigaluega a le Malo, e faia le tautua i o tatou tagatanu’u i so’o se matātā, matāfaioi ma so’o se auaunaga. O tatou, o auauna a le atunu’u; e ta’imua ma ta’iala i le fa’afoeina ma le ofoina o le fesoasoani i tatou tagata, ona o lo tatou vala’auina lea. E tusa ai ma fa’amaumauga a le Ofisa o le Komisi, e sili atu ma le 10,000 tagata faigaluega i auaunaga a le Malo i ona ofisa eseese e lima sefulu ma le tolu (53).
Malo le fa’atoatoa! Malo le fa’apalepale! Malo le fai o le faiva aua Samoa lo tatou atunu’u pele.
Pei ona faia i tausaga uma, e le mafai ona galo ia te i tatou Ali’i ma Tamaita’i ua faiilagi le tuligāsi’a ina ua fa’amanavaina e le Atua a latou feau ma galuega. O le talitonuga, o nei e fau ai taeao, a o taeao e fau ai tala atu a taeao. Ia manatua pea i latou i galuega ma lo latou sao i galuega fa’aauau pea a lo tatou Malo.
O le tausaga nei, ua toe ave le fa’amamafa a le Malo i le Sini Autū – O le Agaga Tautua po’o le Spirit of Service. I le tausaga e 2021, ou te manatua le Fa’au’uga a le Vasega o F’aauluuluga sa auai i le Polokalame Fa’ale-a’oa’oga mo Ofisa Sili o Pulega. Sa ou fa’asoa ai i le fa’auigaina o lenei fasi fuaitau, ua fai ma autū i le asō; “O le Agaga Tautua – Spirit of Service”. A tu’u i lona uiga lautele, o lo’o afifī i lenei tama’i fuaitau, nisi o Aga Tausili e tatau ona silafia, fa’atino ma mulimulita’ia e le aufaigaluega a le Malo; E aofia ai le Fa’amaoni, Fa’aaloalo, Lototele, Tautua lē Fa’aitu’au, Fa’atuatuaina, Fa’amuamua mana’oga o tatou tagata i sona fa’atinoga lelei, vave, tausa’afia ma ia mafai ona e tali atu ma le laufofoga fiafia, ina ia fa’amalieina lē o loo fia maua se fesoasoani, po’o se manino i se mataupu.
O le va’aiga taula’i a le Malo; o le “Tausia lea o le nofo feālofani, le saogalēmū, ma le sa’olotoga mo tagata uma”, e pei ona iai le Fuafuaga mo le Atina’e o Samoa 2021 – 2026. O le va’ai mamao, ia u’una’ia le tamāoaiga e manuia ai tagata uma, e ala lea i le tu’uina atu o avanoa e auai ai Nu’u ma Afio’aga i le soalaupuleina o mataupu e a’afia ai lo latou tamāoaiga, saogalēmū o lo latou lotoifale, si’osi’omaga, aemaise o le tali atu i a’afiaga tuga o suiga o le tau. E le tau toe fa’ailo se tasi o poloketi tele a le tatou Malo e ala i le atina’e o Fono Faavae i itumalo taitasi, ma o le unaia ma le fa’atautaia o nei atina’e e fa’amoemoe tele lea i le aufaigaluega a le Malo. O le mea moni, a le galulue fa’atasi itutino uma o le Malo e atia’e ma faatino le auaunaga, e le mafai ona tino le manulauti a le Malo ua fa’ata’oto i fuafuaga alualu mamao.
Ua le gata i fuafuaga alualu mamao, a o galuega fa’atino i aso uma, aemaise taimi o fa’alavelave fa’afuase’i, e iai fa’amai ma osofaiga fa’alenatura o lo’o tutupu mai pea i si o tatou atunu’u, e fa’amoemoe si o tatou atunu’u i le tulai atu o le Malo ma lana Aufaigaluega mo se fesoasoani.
E le galo i le tatou Malo, talu lona tulai mai ao feagai le atunu’u ma le fa’amai oti o le koviti 19, i lona mata’utia na sasao fa’asolo ai i le lalolagi atoa ma le maliliu ai o le afe ma afe o tagata. Sa tula’i mai le aufaigaluega a le Malo ma ona itutino eseese i le puipuiga o Samoa ma ona tagata, e ala lea i le fa’atinoina o galuega puipuia ma auaunaga lavea’i i le “Agaga Tautua”, i so’u manatu, na fa’asaoina ai Samoa.
O Fuafuaga ma galuega fa’agasolo a Matagaluega ma Fa’alapotopotoga a le Malo o lo’o agai lea i le tuliloaina o sini autu ua fa’amautu mai i le Fuafuaga mo le Atina’e o Samoa 2021 – 2026. (Pathway for the Development of Samoa). O le Va’aiga taula’i a le tatou Komisi o Galuega a le Malo o le tu’uina atu lea o Auaunaga lautele e silisili ona lelei, e aofia ai sini autu e tolu – 1. Siitia tomai ma Agavaa o Faauluuluga, 2. Siitia Fatinoga o Galuega 3. Ma Amioga Taualoa faapea Pulega Lelei. O nei vaega uma o loo galulue faatasi ai le Komisi ma Faauluuluga o Matagaluega taitasi. O loo faagasolo foi i le taimi nei iloiloga faaauau a le Ofisa o le Komisi o Galuega mo le faamautu o matafaioi ma tagata faigaluega moomia mo Matagaluega uma a le Malo.
E le tau faailo le tele foi o luitau o feagai ma le Malo faapea le Atunuu i le itu tau atinae ma auaunaga, e aofia ai le utiuti o i latou e iai tomai ma agavaa i nisi o matata faapitoa. Ua toatele foi nisi o tatou tagata faigaluega, e malaga atu mo avanoa faigaluega i atunuu i fafo i tausaga taitasi. O loo aofia foi i galuega faagasolo a le tatou Komisi o Galuega, le fausia lea o se “Fuafuaga mo Tagata Faigaluega moomia mo le Atinae o le Atunuu” (National Workforce Plan).
O le maitau a le Kapeneta. Ua tele galuega ma suiga lelei ua mafai ona faatino e le Aufaigaluega a le Malo ma ona itutino uma; O le pine faamau lea, o le siitia o tomai ma agavaa o le Aufaigaluega e faatino ai le auaunaga, a o Faauluuluga foi i le u’una’ia o Pulega Lelei ma Manino aua le tautuaina o le mamalu o le atunuu. O le faatinoga, e tatau lava ona ō faatasi ma le amio poo uiga ma aga e faaali. O le Aufaigaluega, e tatau ona tapena i Vaega uma aua o outou e faafeiloā’ia ma faatalanoaina mata’upu a le mamalu o le atunuu e afifio ma susu mai i o tatou Ofisa-faigaluega. E tatau la ona faaali le laufofoga ataata i taimi uma, faaaoga le gagana faaaloalo ma ia iai le va tapuia ma le ava fatafata i taimi uma.
Ona o lea; E amata atu ai le aso ona faagasolo se polokalame faalauiloa e taulamua ai le Komisi o Galuega a le Malo i totonu o Matagaluega ma Ofisa uma a le Malo, ua tā’ua o le;
Talofa ma le Laufofoga Fiafia poo le Talofa with a Smile!
O lenei polokalame o loo faavae i luga o Aga Tausili o loo i lalo o le Tulafono o Galuega a le Malo 2004; e aofia ai le Tautua, Faaaloalo ma le Faamaoni. O se polokalame e toe fafagu ma faafoi mai ai le agaga o le tuuina atu o le auaunaga ma le laufofoga fiafia i tagata uma e ulufale i o tatou Ofisa.
O le laufofoga fiafia ma le auaunaga e lē faatuāoia, o le agaga faakerisiano moni lea. O le mea lea, le Aufaigaluega i lenei taeao, tatou faamasani e faatino le tautua matavela, faaali le laufofoga fiafia ma le faaaloalo e tali atu ai i le atunuu. Ua le gata io tatou lava tagata ae faapea soo se tagata e asiasi mai i lo tatou atunuu.
Ua fetaui lelei la tatou faalauiloa o le FAA-TALOFA MA LE LAUFOFOGA FIAFIA ma a tatou tapenaga mo le Fonotaga a Taitai o Malo o le Taupulega 2024 lea tatou te tali malo ai i le tausaga fou. (CHOGM). O loo iai le talitonuga e latalata i le 5,000 tagata e malaga mai mo lenei fonotaga. O le tatalo a ou Ta’ita’i, se’i tautuana lau tu ma le amio. O lou tofi ma lou faasinomaga, o la ta aganuu masani lea, ua iai i totonu le agaga o le tausi i aiga, le tausi i nuu, le tausi i ekalesia, o le fatu lea o le soifuaga o soo se Samoa, o le Tautua. Tatou galulue faatasi ma faaaoga lenei taumafaiga e toe poupou ma faufau ai lo tatou Sā o loo faatautaia e le Atua ina ia maualuga le faatinoga o le agaga tautua ma le laufofoga fiafia.
E avea ai a’u ma sui o le Afioga i le Palemia ma le Kapeneta faapea tagata-nuu uma o Samoa, aemaise le Malo i ona ma’ave eseese, e fa’aleo ma momoli atu la matou faamalo ma le faafetai tele, mo la outou tautua i totonu o soo se Matagaluega poo Faalapotopotoga a le tatou Malo. O le ‘upu e fai i le Ulumū ma Lefaoseu; Ua se’togi le seulagatila, ua faafaō le tuālima, faamalō le fai o le faiva”. O le ‘upu moni e feagai lava le Aufaigaluega ma lu’itau ma faaosoosoga i aso uma. Ae malosi lava le talitonuga – A-tatou Folau ma le Faatuatua i le Atua ma limata’ita’iina lo tatou valaauina i le Tulafono, e ‘au lona Agaga ma i tatou.
Ona faai’u atu ai lea o sa’u upu i lenei taeao. Ia alofagia e le Atua le pā’ia ma le mamalu ua mafai ona tatou faatasi i lenei Sauniga tāua. Ia aualiitia e lona agalelei faiva o lenei vaiaso ua amatalia. Mo Alii ma Tamaitai o le Aufaigaluega a le Malo; Ia tatou lototetele, e le o auāoa fofoga o le lagi i le tautua o loo outou faatino mo Samoa ma le Malo. Ia outou manatua, o outou lava e lima ma vae iai auaunaga a le Malo i ona Itutino uma. Ia otou manatua pea le mau; O le tagata faigaluega a le Malo, o le auauna a le atunuu lautele, ma ia teu fatu i o outou loto le tāua o lou valaauina ma lou filifilia.
E avea foi lenei avanoa e momoli atu ai ma Faamanuiaga mo le aufaigaluega ma a outou fanau ma aiga, i le faamanatuina o le aso Faapitoa, le Aso Sa mo le Fanau o lumanai nei.
E ia te a’u le Agaga Fiafia e faasilasila atu ai – Ua tatala aloa’ia nei le ‘FAAILOGAINA O LE ASO FAAMANATU MO LE AUFAIGALUEGA A LE MALO’ faatasi ai ma le Faalauiloa ma le faamamaluina – O LE TALOFA MA LE LAUFOFOGA FIAFIA.
