ASO FARAILE 27 OKETOPA 2023
FOLASAGA MUA MA PAIA
Lea ua te’a i lagī le fetu ta’imatagi, ma ua tatou faamua mea i Matautusa, i la tatou faasagi ma le faapolo auā lo tatou Tapa’ausili i le lagi. Ua logo faatutuila lenei aofia i le mānavaga pa’ia, ia maua se viiga o le Atua ae tō mai manū auā lenei faamoemoe. E toe faafetaia le Susuga i le Ta’ita’i o le Sauniga, faamalō tapena, faafetai lauga. Foai e le Atua lou lua malosi ma le soifua i la le tino, le mafaufau ae faasili i la le agaga. Faatumu mai lagī le utu auā le fagaina o le lafu mamoe.
E iai le manatu, o lea ua ma’ea ona paepae ulufanua ma lalagi sugalu, i pa’ia ma mamalu o le taeao ma le asō, aemaise o sā lē avea o Punialavaa nei. O le Tupua ma le Malaefono, e Afifio ai Alalatama iā Fuamatu ma Fuamatu, e afifio ai Tuisugaletauā ma Luamanuvae. E puipui malu e le Faigā o Pulemagafa ma le mamalu ia Saleupolu, o le a lē toe āloina faalua le ogasami lea.
O malae foi o loo afio ai le Tofi mamalu o le Itumalo. O le ua fai ma outou fofoga i le maota, e sail iai le tofa ma le uta a Samoa.
TALA O LE GALUEGA
O le auala fou lenei ua ma’ea ona fausia i lona tulaga mautū e aofia ai ma alavai e tafe i ai le vai to’a pe a mamafa timuga. O lenei galuega sa fausia ma mulimulita’i i luga o aiaiga ma faiga faavae o galuega faatino o auala tetele a le tatou Malo.
Sa fa’atauofoina fa’alauaitele e le Malo lenei galuega mo le sailia ai o se kamupani e faatinoina. Ma i le mae’a ai o le iloiloga a le Komiti, ma tuuina mai ai le fautuaga i le Kapeneta mamalu e tuuina atu lenei galuega i le kamupani a le Lucky Construction Ltd i le tau e $1,495,736.00 SAT ina ua faamalieina uma vaega sa tuuina mai i le tauofoga.
O le auala ua mae’a fausia e:-
• 2.0 kilomita le umi sa fausia ae 5m le lautele sa faataina, e aofia ai ma alavai ma paipa kolosi.
• E 3 masina sa faatinoina ai le galuega, amata mai ia Fepuari ma fa’amae’aina ia Me.
Sa faatupeina atoa lenei galuega i lalo o vaega tupe ua faaagaga mo galuega tetele a le tatou Malo.
UPU FAAI’U
Momoli atu le faafetai tele a le Malo i le pulega faamalumalu a Alii ma Faipule o lo tou Afioaga. Faamalo i lo outou onosai i tulaga uma sa faalavelaveina ai lo outou mamalu, i taimi sa faatinoina ai lenei galuega.
E momoli atu foi le faafetai i le mamalu o le atunuu, i lo outou onosaia o nisi o faafitauli sa tula’i mai, a o faagasolo ai lenei galuega tele ua mae’a nei.
Faafetaia foi le Kamupani a le Lucky Construction Ltd mo le faatinoina o le galuega i fua faainisinia e pei ona aiaia.
Faafetaia foi le Pulega o Felauaigai le Lauelelee mo le vaaia lelei o le faatinoina o lenei galuega.
Se itula silimea le seuga a alii i le faamoemoe. Ia mamao ni aolealea i le paia ua sasao nei ma ia aomanū lenei aso i le agalelei o le Atua soifua.
Soifua ma ia manuia.
