ASO FARAILE 27 OKETOPA 2023
FOLASAGA MUA MA PAIA
Se ua tāili e matagi lelei le sau o le ola, e pei o le fetalaiga i le Malaeolevavau, i le taulaga osi ma le taulaga momoli auā le Atua ma lona finagalo. Se ua logo i tino matagi lelei i le faafofoga atu a le tatou malō aemaise lo tatou nu’u. E toe faaluaina le agaga o le faafetai ma le faamalo i lau Susuga i le Ta’ita’i o le Sauniga, mo le mānavaga pa’ia ma le upu faala’ei’au e tomatauina ai le faamoemoe o lenei aso. Maua pea le soifua laulelei ma le malosi mai le Atua, ma ia faatumu mai lagī le utu auā le tausiga o le lafu mamoe.
E talitonu foi o le a ta’oto ia faamaene o tailoloto pa’ia ma sā o le tatou nuu nei, i le Afifio o Aiga e Lua ma Ma’opu, afifio Sa Peseta ma Usoalii. E puipui malu e Sale’aula ma lau Faatufugaga ma Oe le Pule, o lea foi e ‘u’u mau lava e lo’u lima taumatau, e le mafai ona fa’agaloina.
TALA O LE GALUEGA
O le auala fou lenei ua ma’ea ona fausia i lona tulaga mautū e aofia ai ma alavai e tafe agai i ai le vai to’a pe a mamafa timuga.
O lenei galuega sa mulimulita’ia lona fausiaina i luga o aiaiga ma faiga faavae o galuega faatino o auala tetele a le tatou Malo aemaise tulafono mo auala tetele fa’ava-o-malo, ina ia fa’amautinoaina le sefe ma saogalemu mo femalagaa’iga a le mamalu o le atunu’u.
O lenei galuega sa fa’atau-ofoina fa’alauaitele e le Malo e sailia ai se kamupani agava’a e faatinoina lenei poloketi tāua.
I le maea ai o le iloiloga a le Komiti, sa tuuina mai ai le fautuaga e tuuina atu lenei galuega i le kamupani a le King Construction i le tau e $1,122,149.88 SAT ina ua faamalieina uma vaega sa tuuina mai i le tauofoga.
O le auala ua mae’a fausia e:-
• 3.295 kilomita le umi sa fausia ae 5mita le lautele sa faataina, e aofia ai ma se alasima/kolosi sa fausiaina.
• E 7 masina sa faatinoina ai le galuega, amata mai ia Fepuari tausaga lenei, ma fa’amae’aina ia Setema.
• Sa faatupeina atoa lenei galuega i lalo o vaega tupe ua fa’aagaga mo galuega tetele a le tatou Malo mo le Tausaga Fa’aletupe 2022-2023.
UPU FAAI’U
Momoli atu le faafetai tele a le Malo i le pulega faamalumalu a Alii ma Faipule o lo tou Afioaga. Faamalo i lo outou onosai.
Faafetaia foi le Kamupani a le King Construction, le Afioga ia Sulā Montini, mo le faatinoina o le galuega i fua faainisinia e pei ona aiaia.
Faafetaia foi le Pulega o Felauaigai le Lauelelee, le Afioga i le Taitaifono ma le Komiti Faatonu, fa’apea le Afioga Galuemalemana ma le mamalu ole Pulega mo le vaaia lelei o le faatinoina o lenei galuega. Ua tatou molimauina fa’atasi lona matagofie. FAAFETAI
Fo’i se matou tala, Ia mamao ni aolealea i le paia o lo tatou nu’u nei, nei ma ia aomanū lenei aso i le agalelei o le Atua soifua.
Soifua ma ia manuia.
