Aso Gafua, 11 Novema 2023 – 9.00am
O lea ua so’ofau le mali’o lagi o le taeao na sufi ma fa’autuutu. Ua lalafo fo’i i atululuga ma to’a i tia o ali’i tuamafa filimalae, le aso ua matalupe, ma ua ala laolao. O le aso ‘ula lenei, auā o lea ua fola le ma’ata’anoa ma ‘oa’oa i matagofie le fa’amoemoe sa lupe, o le Asosi o ali’i ma tamaita’i sa a’otauina i le Kolisi o Samoa.
Lau Susuga i le ta’ita’i o le sauniga, fa’afeta’i le tomatau, e ala i la tatou fa’asifoga se’i fa’afetaia le agalelei o le Atua ia Samoa, aemaise o lenei fa’amoemoe. Lau afioga i le Ao Mamalu o le Malo ma le Masiofo, Lau afioga i le Sui o le Fono a Sui Tofia, Le paia o Minisita o le Kapeneta ma Minisita Lagolago. E le vaea le fala o’oto i le paia maualuga o le tafatolu o le Malo tutoatasi o Samoa i le Pulega Faatonu, le Fa’amasinoga, fa’apea le Fono Aoao Faitulafono. Members of the Diplomatic Corps.
Ou te fa’atalofa atu fo’i i lau afioga i le Peresetene ma tulaga tofi mamalu o le Asosi o ali’i ma tama’ita’i tuai o le Kolisi o Samoa, faapea le paia o tupu ma e’e, ua afifio mai i lenei taeao, o e sa a’otauina i le Kolisi. Faafetai tele le pale matagofie.
Ou te taofi, o lea ua malama i ulugalu paia sauo’o o Samoa, e afua mai i le onetai seia paia fili ma puletu’u, o lea lava ua ifo i Matagialalua nei. E faapea foi i le paia o ositaulaga o lo’’o talafaauto i le atunu’u, aua lo latou faiva o le tu’itu’i o le lagi, mo Samoa ma ona tagata.
I le masina o Oketopa o le tausaga nei, sa maua ai le avanoa e fai ai se upu a le tatou Malo i le faamoemoe o le Kolisi o Samoa, i le atoaga o lona 70 tausaga. O lea ua so’oula i le taeao nei, i le fa’amoemoe o le SCOPA.
Ua 70 Tausaga talu ona fa’atuina le Kolisi o Samoa i le atunu’u. O le ulua’i Kolisi Maualuga a le Malo na fa’atuina i le 1953 i le maliega ma Niusila, ma le fa’amoemoe e a’oa’oaina ai alo ma fanau a Samoa, ia Atamamai e Tautua mo Samoa – ma avea ma Ta’ita’i o lona Malo Tutoatasi.
O lenei va’aiga mamao a tua’ā ma ta’ita’i o Samoa – ua tofafā nisi i ti’a sā, na afua i lo latou naunau e tapu’e ma vanivani le a’oa’oina lelei o tupulaga lalovaoa o Samoa, ina ia aua ne’i vale tu’ulima le lumana’i. O lea anava, o lo’o fa’amaugagana i le tagavai a le Kolisi o Samoa; – “Atamai e Tautua mo Samoa”.
O le fuaitau a Samoa, e tautalaaso nei mo taeao, ma e ui ina tele le ulu niu, ae iloga niu o le fīliga. Afai e fesili, o le a se lagisoifua e pine ai le tautua a le Kolisi o Samoa?
A lea e sasao mai ali’i ma tama’it’ai sa ‘aotauina i le Kolisi. O outou faiva lena, e tiu i vasa ma saili i le tai, e seseu i atutia, e eli foi le aliti o le eleele, e saili penina aua Samoa ma lona Malo. O outou faiva lea ua laulau sasa’a. Ua suati ola, se’i tiu ma āfifī le taliuta ma le tapuaiga a si o tatou atunu’u.
E le selu atu lo tatou Malo i le sao o le SCOPA i so’o se tofiga ma so’o se auaunaga i lo tatou Malo, i le vaega tumaoti ma pisinisi, aemaise o e ua fa’au’uina e tala’i le finagalo o le Atua, e ala i le galuega fa’afaife’au, o fa’atufugaga eseese o le poto salalau, o matuaifaiva o tulaga tau gagana ma saienisi, tala’aga ma su’esu’ega loloto o le talafa’asolopito, ta’aloga ma fatuga, aemaise o le atamai o ali’i fa’atausi aiga o lo’o fesili i ai le tofã ma le moe i faigãnu’u i afioaga ma alalafaga. O lo’o fa’apea fo’i ona avea ma lupefa’alele a Samoa i fa’aalagamaea i lenei itulagi ma le lalolagi, e ala i tofiga taualoa o fa’alapotopotoga i le Pasefika ma le lalolagi.
O lo’o saoaluma ma umia tofiga maualuluga o le tatou Malo, e nisi o tamali’i ma tama’it’ai sa a’oa’oina i le Kolisi o Samoa. Lea e afio mai le Ao Mamalo o le Malo ma le afioga i le Sui o le Fono a Sui Tofia, fa’apea foi Minisita o le Kapeneta, Fa’amasino ma Sui Mamalu o le Palemene, aemaise Fa’auluuluga o Matagaluega
ma Fa’alapotopotoga a le Malo. E mafai ai ona tatou fa’apea, ua taunuu i manū, ma ua tau le ai o le fa’amoemoe o nai o tatou tuaā, na mafua ai ona fa’atuina le Kolisi o Samoa i le 1953. Ma, e le o gālala i ulutaufa, pe lāina i le ala o le fau, taunu’uga o lo latou vilivilita’i ma pulunaunau, e fanau mai i le Kolisi o Samoa ni ta’ita’i o le atunu’u i le lumana’i. E iai le taeao nei ma le fa’amoemoe.
E avea ai a’u nei, e fai ma Sui o le afioga i le Tama’ita’i Palemia, o lo’o to’esea mo fonotaga fa’avao o malo e fa’aleoina le agaga fa’afetai o le tatou Malo i le sao o ali’i ma tama’ita’i tuai o le Kolisi o Samoa, i la latou faiga taulaga mo si o tatou atunu’u. Fa’afetai le tautua atunu’u, fa’afetai le tautua matavela, fa’amalo le soa fa’atamali’i. Ua susuu’u le maota tele o Samoa, ma fola i le ma’ata’anoa lona paepae lei, i la outou tautua ma le osigā taulaga.
O upu masani o fa’atufugaga o maota, o poutū, e tua i ai pou lalo. Ou te taofi o le Asosi a le SCOPA e tua i ai le Kolisi o Samoa mo nei ma le lumana’i. O ia na te fa’aleleia ma saga u’unaia le loto a’oga ‘ia atamai e tautua mo Samoa’. O le maopopoga o ali’i ma tama’ita’i tuai o le Kolisi, o le saga fa’amautuina atili fo’i lea o le tagavai a le Kolisi i le aga’i atu i le lumana’i. E manatua fo’i le sao o le SCOPA i le fa’afoeina o le Kolisi, e pei ona iai nei, ma galulue fa’atasi ai ma le Malo.
O le tatalo a le tatou Malo, ia manuia le Kolisi o Samoa, ma ia saga u’unaia le agaga tautua mo si o tatou atunu’u. Ia fa’ateleina le tomai ma le agava’a o tamafanau a Samoa e a’oa’oina i le Kolisi, aua Samoa ma lona Malo.
Ia agalelei le Atua i lau afioga i le Peresetene ma tulaga tofi mamalu o le Asosi a ali’i ma tama’ita’i tuai o le Kolisi. Aemaise le paia ma ma’ave eseese o le Asosi, ia i ai pea le ta’ita’iga mamana a le Atua i o outou faiva alofi ‘a’ao, mo nei ma ē luā.
Ia saga fa’alototeleina foi le Pule ma faia’oga o lo’o a’otauina fanau a le atunu’u o lo’o utuvai i le Kolisi o Samoa. Ia utu mai i le Atua le poto ma le fa’aaliga e a’oa’oina ai fanau o Samoa ina ia ‘atamamai e tautua mo Samoa.
Ia fa’amanuia tele le Atua i le faamoemoe o le SCOPA mo le atoaga o le 70 tausaga o le Kolisi o Samoa.
Soifua ma ia manuia.
