ASO GAFUA, 18 TESEMA, 2023
O lea ua goga i tafa’ilagi le malamalama, ae utu i atululuga ma laufanua o si o tatou atunu’u le taulaumea. Fa’afetai i le Atua i lona agalelei ma lana pule fa’asoifua, sa auali’itia ai le soifua o le atunu’u i le uta ma le tai, aemaise le tapuā’iga mau i maota ma laoa. Lea ua tau le ai, ma to’a i matagoife le folauga a Samoa i le fa’ai’uga o lenei aso.
Ou te fa’atalofa atu i le fa’afofoga tapua’i a le Afioga i le Ao Mamalu o le Mālō ma lau Masiofo.
Le Afioga i le Sui o le Fono a Sui Tofia ma lou Faletua.
Minisitā o le Kapeneta ma Minisitā Lagolago.
Le Fofoga Fetalai ma Sui Mamalu o le Palemene.
Le Fa’amasino Sili ma le Ali’i ma Tama’ita’i o le Fa’amasinoga.
Le Aufaigaluega Totofi a le Atua i Fata Faitaulaga e fia;
Aemaise le pa’ia mauāluga o Samoa aua Tama ma ‘Āiga, o ‘Āiga ma a latou Tama,Tumua ma Pule, Ituau ma Ālataua, ‘Āiga i le Tai ma le Va’a o Fonotī.
Fa’amālō le folau manuia i lenei aso.
I le mae’a ai o le Fonotaga a le Kapeneta i le vaiaso ua te’a nei, ua manatu ai e fa’ailoa atu mo le silafia e le atunu’u nisi o matā’upu tupito sa soālaupuleina ma fai i ai i’uga aemaise o nisi o matā’upu tāua o lo’o to’ai mai i le laulau a le Kapeneta mo le talanoaina.
E pei ona silafia, o lo’o to’esea pea le afioga i le Ta’ita’i o le Mālō i atunu’u i fafo. Sa mua’i auai atu i le Fonotaga Fa’avāomālō i Peretania ma le Iuni a Mālō o Arapi (Unite Arab Emirates). O lea Fonotaga tāua e talanoaina ai matā’upu tau i Mālō o le taupulega, aemaise le taligāmālō a Samoa i le Fonotaga a Ta’it’ai o Mālō o le Taupulega o le a usuia ma talimālō ai Samoa iā Oketopa i le tausaga fou. Sa ia auai fo’i i Fonotaga Autū o le Fono Tele #28 a le lalolagi i matā’upu tau i suiga o le tau sa usuia i Arapi (COP28).
Peita’i i le mae’a ai o nei Fonotaga sa aga’i mai i Niu Sila mo ana siaki masani ma fa’atino ai ona togafitiga. Ua maua mai le tala i le fa’ai’uga o le vaiaso ua mavae, ua manuia le ta’otoga o lona ‘ā’ao, ma o lo’o mo’omia e ia se taimi e mālōlō ai se’i tapu’e lona malosi ae le’i toe malaga mai i Samoa i se taimi o i luma.
Tatou tatalo pea ina ia fa’afo’isia atoatoa lona malosi e ala i le fa’amālōlōga a lo tatou Ali’i.
O lo’o fa’agasolo pea fa’atinoga uma mo le Polōketi o le Miliona Tālā e pei ona tula’i ma ai le afioga i le Minisitā iā Mulipola Anarosa ‘Ale – Molio’o i lona tau’aveina, ma o le vaiaso na te’a nei na fa’amaonia ai e le Kapeneta le si’itia o vaegātupe mai le $150,000 i le $160,000 e fa’amatu’u mo le fa’atinoina o galuega ma totogi o Aufaigaluega mo Ofisa o Fono Fa’avae.
O nei Ofisa po’o le Aufaigaluega fo’i, o lo’o fa’alagolago i ai le unā’ia o galuega fuafua a Itumālō. E fa’apea fo’i i le fa’atinoina o galuega ma le tuliloaina ma le mata’itūina o fa’atinoga uma o polokalame a Itumālō ta’itasi, ina ia ausia manulautī ma matāti’a ua fa’ata’oto e lo tatou Mālō, mo lenei fa’amoemoe tāua. O lo’o fa’afoe e le Matāgaluega o Tinā ma Tama’ita’i, Atina’e o Nu’u ma Agafeso’ota’i ma le Ofisa Fono Fa’avae lenei galuega, e aofia ma le Vaega e fitoitonu i le tuliloaina o lenei galuega (Project Management Unit).
O le agaga o le tatou Mālō, ia mapo le fa’atinoina o lenei fa’amoemoe ma ia laugatasia atoa ai Itumālō. Ua i ai Faiga Fa’avae a le Mālō o lo’o ta’ialaina ai lenei Polōketi, ma ua amataina nei le galuega mo le toe iloiloina o lenei Faiga Fa’avae ma Ta’iala, mo le saga unā’ia o le fa’atinoina o galuega uma mo le manuia o Itumālō ma le atunu’u.
I le tulaga iā tatou suāu’u ma penisni mo lenei masina o Tesema, ua pa’ū uma le tau o le lita mo le penisini, tiso ma le karasini, e pei ona mua’i fa’ailoa atu e le Matāgaluega o Tupe i le atunu’u. O lo’o fa’aauau pea ona mata’itūina e lo tatou Mālō tulaga i tau mai lea masina ma lea masina. O se lu’itau tele lenei o lo’o feagai ma le lalolagi i le si’ita’i ai o tau o suāu’u ma penisini ona o tulaga vevesi o i ai nei Sasa’e Tutotonu ma Europa i Sasa’e. Ma o se tasi o manulautī a lo tatou Mālō, e unā’ia malosi’aga fa’anatura e gaosia ai le ‘eletise e pei o le ‘eletise mai le la, ‘eletise e maua mai i le suāvai, ‘eletise mai alagā – matagi, ma isi metotia e gaosi ai le ‘eletise, nai lo le fa’amoemoe tasi i suāu’u ma penisini.
O le vaiaso na te’a nei sa o’o mai ai le solo i lumā maota o le Mālō na fa’atulaga e nisi e fa’atatau i le fa’afitauli o lo’o feagai nei ma Isaraelu ma Palesitina. E fa’ailoa atu ma le fa’aaloalo i le atun’uu, o tulaga fa’avāomālō i matā’upu fa’apenei ua mae’a ona fa’ata’oto, ma o matā’upu e ma’ale’ale itu uma. Aemaise o ni matā’upu e a’afia ai le saogālēmū o le lalolagi atoa o lo’o i lalo o le Fa’alapotopotoga o le Pulega o le Saogālēmū (Security Council) o Mālō Aufa’atasi. O le feagai ai o le tatou Mālō ma tulaga fa’avāomālō i Mālō Aufa’atasi ma le fa’atinoina o ona tiute, o se tulaga e fa’atāua tele ma o lo’o i ai i latou e fitoitonu i ai le fuafuaina o ni fa’ai’uga e fai, e pei o le Matāgaluega o le Va i Fafo, ma Sui o Samoa i atunu’u i fafo, i lalo o le va’ava’aiga a le Palemia, o lo’o mata’itūina matā’upu fa’avāomālō, aemaise vevesiga i va o Mālō o lo’o a’afia ai tagatānu’u e pei o tinā ma tamaiti. E lagolagoina e Samoa le unā’ia pea o le fīlēmū ma le tausia o le nofo fealofani i Mālō uma o le lalolagi e ala i le tausisia o Tulafono, Feagaiga, ma Faigāpa’aga Fa’avāomālō, ina ia tafi’esea vesiga ma taua i le lalolagi.
O le solo a nisi na o’o mai i le vaiaso na te’a nei, e le’i taofia e le Mālō. O le fa’atinoga lea o lo latou aiātatau e tusa ma le fa’asinomaga o le Fa’avae. Sa i ai fo’i le avanoa e o’o mai ai Sui o lenei solo e momoli mai i le Ofisa nei le latou talosaga. Sa i ai fo’i Sui o le Ofisa na o’o atu i le vaega sa i ai i latou a’e le’i tāina le 10:00 i lea taeao e pei o le latou taimi na tu’uina mai. Peita’i, e taunu’u atu ua tu’umuli i latou to’aitiiti sa auai i le solo.
E pei ona silasfia e le pa’ia o le atunu’u, o lo’o fa’aauau pea lenei matāupu e o’o mai i le asō, ma o lo’o fa’agaioi fo’i galuega a le United Nations Security Council e sa’ili fofō i lenei matā’upu. Ma e fa’aauau pea ona auai Samoa e fa’atino ona tiute i Mālō Aufa’atasi, e tusa ma tulafono ma Feagaiga Fa’avāomālō o lo’o limata’ita’ina ai fa’atinoga a Mālō uma o lo’o i le li’o o Mālō Aufa’atasi.
O lo’o fa’aauau ona auina atu gasegase e fa’atino togafitiga i Niu Sila e le’o mafai ona fa’atinoina i Samoa nei. O le fa’ai’uga o le vaiaso na te’a nei, e 11 gasegase na fa’amaonia e le Kapeneta mo le auina atu i Niu Sila mo togafitiga. E pei ona i ai le naunauta’iga o le Mālō, ia maua lava avanoa e mafai ai ona fa’atino lava i Samoa nei togafitiga i le lumana’i. O fuafuaga mamao ia a le Mālō ua fa’ata’oto mo le lumana’i.
O le vaiaso fo’i ua mavae, na fa’amaonia ai e le Kapeneta le tofiaina o Tumanuvao Evile Falefatu e avea ma Fa’atonu Sili Aoao o le Pulega o Malae Va’alele. O le Susuga iā Tumanuvao ua silia ma le 10 tausaga o galue o se Sui Fa’atonu Sili Aoao i le Pulega o Malae Va’alele, ma ua maua lona tomai ma le poto masani e fa’atino ai tiute ma tofiga o le Fa’atonu Sili Aoao. Ua sui tulaga Tumanuvao i le Susuga iā Silimana’i Ueta Solomona, ua fa’amavae ma ua se’e atu e avea ma Pule Sili o le Fa’alapotopotoga mo le Puipuiga o Va’alele i le Pasefika.
Ua tu’uina atu nei e le Kapeneta le matā’upu tau teuteuga o le Tulafono o Fanua ma Suafa e tapena ai suiga ma teuteuga o lea Tulafono i le Ofisa o le Loia Sili latou te galulue fa’atasi ai ma le Matāgaluega o Fa’amasinoga ma Matā’upu Tau Fa’amasinoga ina ua mae’a talanoaina teuteuga tatau o le a fuafuaina ae le’i tu’uina atu i luma o le Fono Aoao Faitulafono a Samoa.
O le a amata fo’i ona talanoaina matā’upu tau le Tulafono o Faigā Palota e le Pulega Fa’atonu. E pei ona silafia, o se tasi lenei o Tulafono tāua e ao ona silasila toto’a i ai lo tatou Mālō ina ia saogālēmū le fa’atinoga o le faigā filifiliga a le atunu’u. O nisi Tulafono tāua o lo’o aga’i fo’i i ai lo tatou Mālō i ona tapenaga ma teuteuga, o le Tulafono o A’upega fa’apenā fo’i le Tulafono e fa’atatau i ‘āiga ma puipuiga o ‘āiga ma fanau. (Family Law).
Samoa e, o lea ua o tatou i ai i vaitau faigatā o le tausaga. E feagai ai tatou ma timuga mamafa ma matagi malolosi. O lea fo’i ua fa’ailoa mai e le Matāgaluega o le Soifua Mālōlōina le toe si’itia o le numera o i latou ua pesia i le Koviti – 19. O le tatalo a le tatou Mālō, fa’amolemole ia utagia puipuiga fa’alesoifua mālōlōina o lo’o fautuaina e le Soifua Mālōlōina. E lelei ona fai lau tali fofoga pe a aga’i mai i nofoaga faitele ma vaega e tumutumu ai tagata. Afai fo’i e fa’ata’otolia i le fulū ma āuga fa’apenā, o le fautuaga masani, mālōlō i le ‘āiga ma va’ai se foma’i mo se fesoasoani. O le anava masani lava a le Soifua Mālōlōina, e lelei le puipuia nai lo le tau togafitia.
Ia manuia tele le pa’ia o le atunu’u i le aga’i atu i galuega fai o lenei vaiaso. Tatou tatalo pea ma fa’atuatua i le Atua, ua na’o Ia na te lago malūina le folauga a Samoa.
Ia tatou tatalo fo’i mo togafitiga o lo’o feagai ai ma le afioga i le Palemia, se aso tatou toe feiloa’i ma le manuia i le alofa ma le agalelei o lo tatou Atua.
Ia manuia le fono tatalo o le fa’ai’uga o lenei tausaga i le vaveao a taeao. Ia manuia fo’i le usugāfono a le Palemene i le aso a taeao. Manuia lau tapuā’iga Samoa.
Soifua ma ia manuia.
