Aso Faraile, 1 Tesema 2023 – 9.00am – Tanoa Tusitala
O le Fā’agatama o le Togiālugāga, e fesili! “E luga, pe lalo?” Ona iai lea o se vaivaīga, ole’ā ou lē ‘Aitianofo, ae ole’ā se’i ou ‘Aitiatū, e faigatā le fogatia, lele ua malumaūnu.
O le asō, ua logo lē nai Ātea, ua logo foi lē nai Āma, ina ua ta’īli le Matagitoga, ua ta’alili fo’i le Si’uāmoūli, ae laolao ai le vasa nai Āsuisui. Aua o lele ua sau le va’a na tiu, tau mai i le va’a na tau, ae olo’o mamāu pea lago o le va’a na faōafolau.
O Sā ma Faigā o Samoa, nu’unu’u atu, e faigata o Oe o le Aomamala, O le Pā e osofia, e lē toe tau fa’afuluina. Le Paia i Tama ma o latou Aiga, Aiga ma le latou Tama. Le usoga ia Tumua ma Pule Itu’au ma le Alataua, Aiga i le Tai ma le To’o o le Fua. Ae ua ao uma na Paia ma Mamalu, i le Paia i le Au Faigaluega Sisina a le Atua, olo’o fa’apuna pa’ulia I Afio’aga ma Alalafaga, Faitatalo ma Nonomanū, aua Samoa ma ana fanau.
Fa’afetai atu i lau Susuga Tafā’ese Spencer Tautu, ua se ligoligo lou fofoga i le nei taeao, aua le manavaga paia, se’i tau teu folau ai lo tatou va tapuia ma le Māta’isau o le Foafoaga Paia. Malo i le matimatiga fa’aleagaga, auā le soifua matata’u i le Atua o le ‘Aufa’au’u aemaise le mamalu o le potopotoga o le nei taeao.
Ua ou manatua vave se tasi o tamaita’i lalelei sa tauvā iai se alii foma’i, ma se alii faiaoga. O aso uma e alu ai le Fomai i le tamaita’i, e alu lava ma le fuārosa, ao le faiaoga, e alu lava ma le ‘apu. Ua fai pea le masani a le nei toalua, ua oo ina taunu’u fa’atasi i le fale o le tamaita’i se tasi o aso. Ona fesili loa lea o le tamaita’i.
O le aumai e le Foma’i o le fuārosa, e iai lona uiga, ae e te sau lava oe le Ali’i Faiaoga ma le ‘Apu! O le ā ea le uiga o nei mea? Ae tali le Alii Faiaoga, “An apple a Day, Keeps the Doctor away” E ‘ese foi le faiga o le ‘ai’ū a le Faiaoga!
Mo le ‘Āufaū’u, o le fea’u tau molimoli faigofie lena mo outou. O lou avea ai ma faiaoga, e lē se galuega e faigofie, e lē o se ave fuārosa, aua e le gata ina e vave ona magumagu, ae vave foi ona tali mai i ai Tanumalala.
O le Faiaoga, e loloto lana tōfā, e mate gatā ona uiga, e lē fa’ata’eta’ealuga lana fa’atino. E sauō’o ana tapenaga, ina ia aofia uma le Soifua Fa’aletino, le Mafaufau, ae sili foi i lā le agaga. Na tagisia lava La’ulu o se va’a ia goto, na momo’o foi le Aitu o Savai’i sei maua ni ona vae, na tautō foi, ona e lavātia amo le fana.
E leitioa ona fai mai le Tusi Paia, “Ia Aoao le Tama e tusa ma ona ala, ‘a oo ina matua, e lē toe te’a ‘ese ai”.
O le fa’atinoga a le Foma’i, ia soifua mālōlōina lelei le tino, ae o le Fa’atufugaga a le Faiaoga, e lē gata ina ia malōlōīna ai le Tino, ae ia sili ona Atamai i le Mafaufau, ma ola Mata’u foi le Atua. E toe fagufagu mai foi le Afioga a le Atua, “O le Mata’u i le Atua, o le amataga lea o le poto!
O le filosofia fa’afaiaoga, “E poto a le tagata ua leva ona soifua” Ioe, Aua nei va’ai maualalo i ē na mua i malae, aua e fesili lava mulimai ia muamai. Oe ina nei e masausau atu si au agiagi, ae vala’au mai se loomatua, po’o se toeaina, “Va’ai le ‘apulupulu o lou poto moto lea e sisina ma tau tafetafe mai ‘ī”.
“Aua nei valetu’ulimaīna lo outou Vala’auina” Ia tā masaga lā outou tā, ia sua le ‘Aulapauta ma le ‘Aulapatai, ma ia suasua foi vaipapa ma vaiālia, ma ia outou tiu foi Fa’amatalā’oa, ia tiu ma āfīfī, i mea e aupito I sili ona aoga mo alo ma fanau a Samoa.
Galue muamua, ae finau mulimuli. O le manuia o alo ma fanau a Samoa, olo’o i ō outou ‘a’ao.
Lau tapuaiga leoleoa Matua, Aiga ma Uo, Taitoalua foi na nai fanau pele; Fa’amalo tatalo. Sa outou Pō le fala ma ula le mulilā, ma fai le faiva o Fe’epō, ae a lea ua tali le asō.
Lau susuga i le Ofisa Sili ma le mamalu i le Pulega, mālō fa’amaite, fa’afetai le lagalaga i mea lelei aua le matimatiīna o le Aufaigaluega ua fa’aōpoopo mai i le tatou tovine. Talosia ua maua atili ai se fa’asiligāmalosi, ae ‘aua ne’i avea ma fa’amata’u ma taufa’afefe ia i latou, ae le’i oo i totonu o le faleaoga.
Manatu ua outou maua le AURO MONI, ina ua māēa fa’amamaina i le ogaumu ‘a’asa e tafueseina ai le otaota a e ta’atia mai le Auro ua fa’amamaina. Fa’amanuia le Atua i le nei Aso ma ona toe taualumaga.
Soifua.
