ASO TOFI 18 IANUARI 2024, 2:00 PM
Susu lau Susuga i le Taitai o le sauniga,
Afio lau Afioga i le SUI Palemia ma outou Afioga Minisita o le Kapeneta
Afio lau Afioga i le Taitaifono ma le Komiti Faatonu o le Pulega o Uafu ma Taulaga
Afifio a outou Afioga I Faauluulugaa o Matagaluega ma Fa’alapotopotoga a le malo
Afio lau Afioga Sala ma le Faletua ma le Pulega a le Kamupani o le Silva Group
Le Paia ma le Mamalu o le Auvalaaulia, Alii ma Tamaitai,
O le a ou le toe seutafilia le na’a, pe ou te toe tailia tulafaga i Paia sausaugata o lenei aso. O upu e fai i fale tetele, fai mai a a’e malo le filiga tupetoa a tupu o Samoa, ona faapea lea, se ua tatou sootuli, se ua tatou faavaotutui i le maota nei faasuli tupolata.
O paia o le Faleatua i Vaifalesa nei ou te faatulou, auā le afio o Lesa ma Lesa o Faasisina. Afio mai Faliuila ma lou Sa’ota, Te’o. Susu mai aiga e lua, Alalatai oe le Faleatua ma le Atitoa Faiga.
E faatulou foi i paia fa’alemalo, i le tafatolu fefaatauagai o le Faigamalo a Samoa. Faatulou i paia Faaleaganuu, aua e matua le tuu i paia o le Atua, auā le susu o Tama Sa o le Talalelei, ona o le Atua ma lana galuega, Tulou.
Ua malama ai nei ulugalu i le tatou feiloaiga, auā ua maea tu’ulaupua Paia o le Atua, pei ona ositaulaga ai le Susuga i le Faafeagaiga auā se manuia o lenei faamoemoe, aemaise Samoa mo a taeao.
O le agaga o le faafetai ma le me’eme’e ona ua mafai ona tatou tapuvae tasi mai i Satitoa nei, mo le tatalaina aloaia ai, o lenei atinae, ma o se faailoga manino foi lenei, o le faiga paaga faaauau pea a le tatou Malo ma le Vaega o Pisinisi Tumaoti (private sector).
Tasi lenei o ituaiga atina’e o loo nanau I ai le tele o atunuu, ile fia faatinoina. AISEA? Aua e le gata I lona taua e faatino ai le auaunaga ile Malo, ae faapena foi le unaia ai o le Tamaoaiga o si o tatou atunuu.
Ole upu moni,
- amuia lenei itu-lagi ole a maua galuega I lenei atinae
- Amuia foi le tatou Kamupani Vaa ole a iai se nofoaga toso vaa taugofie
- Amuia foi vaa fagota laiti o si o tatou atunuu, ua maua se nofoaga e toe faaleleia ai o outou sa, ina ia unaia pea le tatou atinae o Faigafaiva.
- Oute faaamuia foi I le anoano o vaa-fagota o loo I lalo ile faamalumaluluga a le Malo, ole a le toe agai I Fiti ile mamao & taugata Aua o lea ua iai lava si a tatou nofoaga-tosovaa. Ma ua iai foi inisinia faapitoa mo le faaleleia o soo se ituaiga vaa.
O le ala foi lea na a’e ai se tofa I le Faigamalo talu ai a le HRPP e faatino lenei atina’e. Aepeitai, ua alu alu suaga o le vaatele ae toe satia lona faaogaina ona o mala faalenatura, na aafia ai si o tatou atunuu, ma I’u ai lava ina tia’I le atina’e. Ua sisii foi aao o le tatou Faigamalo I lena vaitau, Ua fefefe, ua fati Ua le toe fia fai mea tosovaa, Ma ua latou feinu-fao ma le toilalo-popo I lenei lava mea e toso ai vaa-u’amea e leai ni ola. Ua galo ia i latou, le tau-alaga a le Tusi Nofoaiga Tupu 15:7 I lana Afioga Paia, “But as for you, be strong and DO NOT give up, for your work will be rewarded”
AMEN.
O lenei nofoaga tosovaa sa fausiaina e le Pulega o Uafu ma Taulaga i le tausaga e 2007, ae na toe fa’aleagaina i le Tsunami ia Setema o le 2009. Na toe fausiaina ma faaleleia i le tausaga e 2010 aepeitai na toe faaleagaina foi i le afa o Eveni i le 2012.
O le 2014 na sainia ai se maliega i le va o le Pulega o Uafu ma Taulaga ma le Faalapotopotoga o Vaa Samoa, mo se lisi e 10 tausaga e tuuina atu ile Faalapotopotoga o Vaa Samoa, e latou te faafoe ai lenei nofoaga tosova’a. Aepeitai o le masina o Me i le 2022, na sisii ai foi lima ole Kamupani Vaa a Samoa ma toe faamatuu atu le lisi i le Pulega o Uafu ma Taulaga. Ua feinu fao foi I latou ma ua matafefefe
E lei moemoenoa le Afioga ile Taitaifono & lana Komiti Faafoe faapea foi le Afioga ile Alii Pule & Pulega o Uafu & Taulaga, ile fetuutuunai pea se auala e toe faatino ai le atinae lenei, ua gaugau aano ai lo tatou Malo. O lea sa talosaga mai ai loa le kamupani o le Silva Group mo se avanoa e latou te lisiina ai ma tuuina atu loa se avanoa e latou te faafoeina ai loa lenei atina’e. O le masina o Me 2023, sa sainia ai loa le maliega tau lisi i le va ole Silva Group Samoa & Pulega o Uafu ma Taulaga, ma faatino ai loa lenei faamoemoe taua, e pei ona iai lenei taeao.
E fai ai a’u ma sui o le Taitai o le Malo ma le Faigamalo e faapea atu ai,
- Lau Afioga Sala ma le Pulega ale Kamupani a le Silva Group, faamalo le loto-atunuu.
- Ua leva foi ma ua afu lelea la outou tautua I le tatou Malo aemaise lo tatou atunuu. Malo finau Faafetai silasila alofa ia Samoa ma lona atina’e.
- Ua uma ona faamanuia atu le Taitai ole sauniga. Ae tau ia ona matou fono-faapipii, Le Atua o manuia to maia lau faamanuiaga I lenei atinae taua aemaise le Kamupani ale Silva Group.
Ile ava male Faaaloalo tele
Ou te faasilasila atu ai Ua tatala aloaia le nofoaga tosovaa i Satitoa nei,
Faafetai & manuia le Aso
