FAAFETAI
E faaleoina le agaga faafetai mo talosaga e sulaina ai le alofa o le Atua ma talosia ai faiva ma galuega o lenei aso ma le fa’amoemoe. Ia tumau pea I le Alii lona viiga, ia maua pea le tofa paia i lau Susuga aua lou valaauina.
Muamua ona faatulou I lenei taeao I paia faalemalo aua le afio mai o le Minisita o Tupe lau Afioga Lautimuia Uelese Vaai, afifio Afioga i Faipule o le palemene poo Taitaifono o Fono Faavae o Itumalo ua lautogia I lenei aso.
E faatalofa atu foi i paia faaleaganuu, aua le afifio mai o Afioga Sui taitaifono , failautusi ma le komiti mamalu o fono Faavae a Itumalo ua tatou mafuta nei taeao.
O lo’o taoto lua le seuga i le asō, ou te faatalofa atu ai i le Peresetene ma sui mamalu o le Mapuipulotu, faapea Afioga I Tamaitai Sa o le nofoaga I Mapuifagalele ua tatou mafuta ai i lenei taeao ona o sainiga o Feagaiga mo le faamatuuina atu o fesoasoani tau tupe mai le Malo o loo I totonu o le Tala Faatatau o le Tupe 2023/2024.
Ae matua lava le tuu i le Atua ma lana talalelei auā o lea ua tatou fesilafa’i i le mauga o ao ae le o le mauga o liulaumea i le soifua maua ma le lagi e mama.
E faatalofa atu foi i faauluuluga o Matagaluega na lua ma le Ofisa Loia Sili , faapea foi le aufaigaluega a le malo o lo’o taulamua i le tauavameaina o lenei poloketi.
AUGA o le aso
O le auga o aute o lenei taeao o le sainia aloaia lea o Maliliega I paia o Itumalo e 3 , ina ua tini lau o le fa’amoemoe. Ua mavae atuvasa o le miliona muamua ,sa feagai ai ia le mamalu o Fono Faavae i le faatinoina o Atinae o Itumalo. I le maea ai o le iloiloga o Ripoti a Suetusi sa tuuina mai ma faamaonia e le Komiti Faafoe, ua agavaa ma aloaia ai Itumalo nei e 3 mo le saini ina o maliega tau tupe (Funding Agreement) o le Miliona lona lua ma faamatuuina o vaega tupe 1 miliona tala mo Itumalo taitasi i vaega tupe faaletausaga .
O le taeao nei, o le ã sainia aloaia ai maliega tau tupe (Funding Agreement) o Poloketi o Atinae o Itumalo ua lautogia mo le Miliona lona lua(FY 2023-2024) mo Itumalo ;
1. Satupaitea
2. Vaisigano 1
3. Faasaleleaga 1
E momoli atu ai le agaga faafetai ma le faamalo i Afioga Taitaifono, Sui Taitaifono ma le mamalu o Komiti Fono Faavae i lo outou onosai ma le faapalepale. O le upu moni, e tele luitau ma faafitauli sa tatou ui mai ai I le miliona muamua, ae ua tele foi lesona taua ua aoaoina mai ai ma toe matimati ai le upega mo le tatou savaliga o lea amata nei.
O le matou tatalo, sagai ane ai o le tai i Taitaifono ma le Komiti aua le lufilufi lima lelei o nei faamanuiaga ina ia oo uma i tagata taitoatasi o le Itumalo ae aua nei faapito manu ia tasi. Ia aua nei vale tuu lima lenei faamanuiaga, ae ia avea ma faamanuiaga ma vai puna e punafanau mai ai manuia mo le Itumalo. Ia aoga luitau sa feagai ai, e fai ma fetu faatonu folau ma taitai tama I le savaliga.
O le tuualalo ma le fautuaga I Taitaifono ma Fono Faavae ia mulimulitai I taiala ma faiga faavae o le atinae. Faafesootai le Matagaluega pe afai ae moomia se fesoasoani poo se faamaninoga o se mataupu o le atinae.
E ao foi ona nofo silafia e lo outou mamalu le faagaioina o lenei faamoemoe. O le maea ai o le saini ina o maliega I le taeao nei, ona tapena lea e Matagaluega o Tina ma Tamaitai , Atinae o Afioaga ma Agafesootai vaega uma e manomia mo le tuuina atu I le Matagaluega o Tupe mo le faamatuuina o vaega tupe muamua e $160,000 I totonu o tusi tupe a Itumalo mo le faagaioiina o Ofisa Fono Faavae.
Ae o vaega tupe e $840,000 mo le faatinoina o atinae o Itumalo, e ao ona toe faamanatu atu mo le silafia ia aiaiga mo le faamatuuina o nei vaega tupe.
1. Ia vave tuuina mai I le PMU ia taiala o atinae faaletausaga ma le paketi (Annual Plan & Budget) mo le iloiloga a le Komiti Galulue ma le faamaoniga a le Komiti Faafoe (Masina o Fepuari)
2. Faatino le faatalatalanoaga (One on One Consultation) i le va o le Komiti Galulue ma le Komiti Fono Faavae mo le faamaninoga o Poloketi ua ave ai le faamuamua a le Itumalo. (Masina o Mati)
3. Faamatuuina vaega tupe $420,000 (1st Tranche) (Masina o Mati)
4. Tuuina mai ripoti o le faaogaina o vaega tupe muamua (Acquittals report) (Masina tapulaa – Iuni 24)
5. Faatino le faatalatalanoaga (One on One Consultation) mo le faamaninoga o poloketi o lea faaoga ai vaega tupe mulimuli $420,000 (2nd tranche) June 24
6. Faamatuuina vaega tupe mulimuli $420,000 (2nd tranche)June 24
7. Tuuina mai ripoti o le faaogaina o vaega tupe mulimuli (acquittal report) ma le ripoti a le suetusi (1 milion full audit report)September 24
8. Faamaonia e le Komiti Faafoe ripoti suetusi (audit report), ma agavaa ai Ioa Itumalo mo le Miliona lona 3.
E le o po le silafia i le tulaga o le tuai o le faagasoloina o lenei poloketi, ae o le matou tuualalo, tatou galulue faatasi ma tausoa le tatou galuega. O le faatuatuaga ua tuuina atu ia outou Afioga Taitaifono ma le Komiti Fono Faavae, ae ia maua pea le onosai ma le lototetele. O loo tatou malaga faatasi ma le Atua , e manuia ai faiva ma faamoemoega.
Sainiga o Maliliega – Mapuipulotu & Mapuifagalele
O le taeao nei foi, o le a sainia ai foi feagaiga (MOU) ma Faalapotopotoga o le Mapuipulotu mo le latou tinoitupe e $20,000 ma Maota I Tina ma Tama Matutua i Mapuifagalele ma le latou tinoitupe e $50,000 e tauala atu I le Matagaluega o Tina ma Tamaitai, Atinae o Afioaga ma Agafesootai. O lenei feagaiga , o lea tuuina atu ia fesoasoani tau tupe e fesoasoani i la outou auaunaga mo le tausiga o tama ma tina matutua o le atunuu. O se avanoa faaauro foi e fai ma fofoga o le tatou Malo e faaleoina ai le agaga faafetai I la outou tautua tuavae, tautua le faalogologo tiga aua lava le tausiga o tina ma tama matutua o le tatou atunuu. O se vaega taua o loo ave iai le faataua o le Taiala o le Lumanai manuia o Samoa o tatou tagata. Faamalo i la outou auaunaga e le faigofie, o le ofoina o la outou tautua mo le mamalu o le atunuu e autovaa atu.
Matou te faamalulu atu foi I a outou Pulega ona ua ova le faifaiaga o le matou Matagaluega ma le faagaioiga a tatou Maliliega.
Tautuanã ia galulue faatasi ma le Matagaluega o Tina ma Tamaitai, Atinae o Afioaga ma Agafesootai , mo le tuuina mai ripoti (acquittal report ) mo le faaogaina o nei vaega tupe ae le i maea le tausaga faaletupe. A vave ona tuuina mai tatou ripoti I lona faaaogaina tatau, talitonu e toe maua foi nisi faamanuiaga I le tatou Paketi o loo loma nei.
FAAMATAFI
Ia agalelei le Atua I lenei aso ma faamoemoega , se taimi tuuama le fua ma tatala le filialii, ia agalelei le Atua. Maua le tofa I lau Afioga Minisita aua ou faiva ma le valaauina. Maua foi le tofa I Afioga I Taitaifono ma le Komiti Fono Faavae faapea a tatou Pulega a Mapuipulotu ma Mapuifagalele aua le tiute ma faiva. Maua le malosi ma le onosai i Matagaluega a le malo aua lo outou valaauina
Soifua ma ia Manuia.
