Aso – 07 Mati, 2024
Malae o Aganu’u ma Measina a Samoa
Lau susuga i le taitai o le Sauniga, Susuga Dr Eteuati Tuioti;
Afioga i Minisita o le Kapeneta;
Sui Usufono o le Fono Aoao Faitulafono;
Members of the Diplomatic Corp;
O Fa’auluuluga o Ofisa ma Fa’alapotopoga;
Tausala o le Pasefika ma le Tausala Samoa;
Le Paia o Malō fa’aaloalogia;
Samoa ua potopoto;
Ua lupepe le taumanu’ula, ua matalupe le seuga i lenei taeao, taeao manuia, taeao matagofie i le agalelei o le Atua. Ua tini pa’ō le uto e pei o le faiva i vai. Ua atoa tupe i le fafao, ua taufai pu’ea foi le matila ma le ‘ofeloa i pa’ia faa le Malō, pa’ia fa’a talalelei faapea pa’ia fa’aleaganu’u.
Ua tatou ofaga potopoto i le Malae ua tapuvaetasi i ai le ‘apo’apoina ma le fa’alauiloaina o tatou tu ma aganu’u ma teumalu ai a tatou Measina. O pa’ia lava ia o Sinave ma Ulumoto’otua, e afifio ai Alo o Sina ma le Fuaifale o le Aiga Sa Levalasi. Puipui e le Faletolu ma le Vainalelepa ma Tuisamau.
E manatu o le a ta’alolo paia ma mamalu o Samoa, aua o paia ua atoa, e mai i le vavau e o’o i le faavavau, e leai se tautai matapalapala e fagota sagolegole i ai, aua o Samoa o le i’a e iviivia. Nu’unu’u atu ia faatini o tausala.
Ae o le a fagatonu le malama ma vili tonu le ifi a maina e tusa o le auga ma le fa’amoemoe o lenei aso – o le fa’amanatuina o le Aso Fa’a-va-o-Malo mo tina ma tamaitai o le lalolagi.
Ua tatou le faatasi ma le Afioga i le Tamaitai Palemia i le faamanatuina o lenei aso taua mo tina ma tamaitai o le lalolagi ona o fonotaga o le Fono Aoao Faitulafono o loo faagasolo nei ae o loo momoli mai moomooga alofa.
O lenei aso fa’ailogaina, o se vaitau e patipatia ai le sao tāua o tamaitai i so’o se atinae ma so’o se tafa o le soifuaga, aemaise o le tele o taumafaiga lelei ma matāti’a ua latou ausia.
E lē tau fa’ailo le sao taua o tamaitai i totonu o aiga, nuu, ekalesia, faigamalō ma so’o se fa’alapotopotoga. O tulaga tau i ta’aloga, o a’oa’oga, o matātā eseese e aofia ai le fa’atekonolosi, faainisinia, aemaise o tulaga tau ta’ita’iga ma upu fai o Malō.
E lē gata i lea, ae o se vaitau e fa’aleotele ai le vala’au mo le una’ia o avanoa tutusa mo tagata uma ma se fafagu mo le amana’ia o leo o tamaitai, o le puipuiga o latou aia tatau, fa’atasi ma lo latou saogalemu mai i so’o se itu’aiga sauaga.
O le fa’amanatuina o lenei aso taua, o se fa’amoemoe na afua mai ina ua lagalagā manatu o tama’ita’i i le vaitau o le senituri e 19 i totonu o Amerika, ona o ni faiga fa’ailoga tagata po’o le lē maua o avanoa tutusa i avanoa faigaluega, aemaise le lē fa’atagaina o tama’ita’i ona palota i taimi o faigapalota.
O le tausaga e 1975, na amata fa’amamaluina ai e atunu’u o Malo Aufa’atasi, e aofia ai ma Samoa ma le Pasifika lenei aso i a Mati, se’ia oo mai i lenei tausaga.
O le Aso Fa’a-va-o-Malō mo Tina ma Tama’ita’i o lenei tausaga, 2024, ua fa’a’autuina i le fu’a laualuga – Ia aofia tama’ita’i i so’o se fa’atinoga, aua “E au le ina’ilau a tama’ita’i”.
O se fa’amamafa o lo’o fa’ataua ai galuega fa’atino aua le una’ia o tama’ita’i ma tulimata’i le fa’alauteleina o avanoa e fa’aaogaina ai o latou tomai ma agava’a, o malosi’aga ma taleni eseese mo atina’e o le tamaoaiga ma le manuia lautele. Ia fa’aitiitia pa puipui e latou te saofagā ai i tulaga tau ta’ita’iga, ma maua avanoa e fai sao ai i faiga filifiliga ma fa’aiuga fai a so’o se faalapotopotoga, fale faigaluega, ekalesia, nu’u, aiga, fa’apea le Malo.
O tina ma tamaitai Samoa, o feagaiga tausi o aiga. O tamaitaisa, o saoao ma augafaapae. O Togiola mo o latou aiga ma le atunuu. E faamoemoe iai se toomaga faaola. E faalagolago iai atinae ma le gaosia o oa Samoa i o latou faiva alofilima.
O le fa’atauaina o tina ma tamaitai, o se vaega taua lea i taumafaiga ina ia ausia le miti a le tatou Malo o lo’o i totonu o lana Ta’iala mo le Lumana’i Manuia o Samoa – ina ia maua le nofo lelei ma nofo fealofani, saogalemu ma saoloto tagata uma. E le gata i lea, o le fa’amausaliina o le tatou tautinoga i le Feagaiga Faava o Malo o le Tafiesea o Faiga Faailoga tagata e fa’asaga i tina ma tama’ita’i (poo le CEDAW), na sainia i le tausaga e 1994.
I le vaaiga lautele, e 43.1 pasene o tagata faigaluega i galuega faamauina, o tama’ita’i.
O loo atagia i fa’amaumauga, e matele lava tamaitai i galuega fa’aofisa, ma o loo fa’amauina le maualuga o le fuainumera o tamaitai i le vaega o a’oa’oga, o soifua malōlōina ma galuega tau tupe. E ui i nei fa’amaumauga, o loo fa’amauina foi, o lo’o maualalo le numera o tamaitai i avanoa po’o tulaga tau pulega. O le tausaga e 2021, o loo fa’amauina ai, e tusa o le 43 pasene o avanoa tau pulega Samoa, e umia e tamaitai.
O le vaega o fa’amasinoga, e tusa o le 22 pasene o le faitau aofai o fa’amasino o lo’o faamauina i le tausaga e 2019, o tamaitai.
O le tausaga e 2019, sa fa’amauina ai le 43 o le aofa’i poo le 23.7 pasene o tama’ita’i, o loo fai ma sui o Komiti Faatonu a le Malo. Sa si’itia lea numera i le tausaga e 2021, i le 33 pasene o sui tama’ita’i i totonu o Komiti Fa’atonu. Mai nei lava fa’amaumauga, o le 19 pasene o lo’o fai ma taitaifono o Komiti Faatonu a le Malo, o tama’ita’i .
E tusa ai ma tatou fa’amaumauga i le tausaga e 2020, o le 22 pasene o le aofa’i o matai resitalaina o Samoa, o tina tama’ita’i. O le 44 pasene o matai o lo’o auai i totonu o saofaiga a nu’u i nuu sa suesueina, o tama’ita’i.
I fa’amaumauga a le Ofisa o Fuainumera Faamaumauina (po’o le MICS 2019-2020), e tusa o le 21.6 pasene o tamaitai i le va o le 15-49 tausaga le matutua, o loo faigaluega.
O le tulaga i upufai a le Malō mo Samoa, e 6 sui faipule tamaitai o loo i totonu o le Palemene o Samoa – e 3 Minisita tama’ita’i e aofia ai ma le Afioga i le Palemia.
A fua i fa’amaumauga ua ta’ua i luga, ma fa’atusatusa i le 20 tausaga ua tuana’i, ua tele suiga lelei mo avanoa tutusa mo tinā ma tamaitai i Samoa.
A fua foi i fuafuaga, o tulafono ma faiga fa’avae ma taiala ua fausia ma fa’atino e pei o le Faiga Fa’avae mo Tulaga Tutusa o Ali’i ma Tama’ita’i ma Aia Tatau a Tina ma Tama’ita’i (2021 – 2031), faatasi ma le tele o galuega ua faatino, ua iloga lava taumafaiga.
Peitai, e ui i ia suiga i fuainumera ma galuega ua mae’a faatino, o loo i se tulaga maualalo pea ma lē paleni fuainumera. O loo maualuga lava pasene o alii I tulaga tofi ma tulaga I galuega nai lo tamaitai, ma o se fa’atupu manatu i le fa’aaogaina tatau ma le mulimulitai’a o taiala ma faiga fa’avae ua mae’a tapenaina, pe o lelei ona faatino, ae poo ausia foi vaega mo’omia.
O se lu’i lea mo le tatou atunu’u, poo fa’apefea mai galuega fa’atino mo le amanaia o avanoa tutusa, aemaise o le unaia o avanoa mo tina ma tamaitai.
O le polokalame o le fa’amanatuina o le Aso Faa va o Malo mo Tinā ma Tamaitai o lenei tausaga, ua fa’ataunuuina ai lenei sauniga fa’atasi ma fa’atalatalanoaga mo lenei aso fa’apea aoaoga mo avanoa tutusa, aemaise le polokalame o loo taulamua ai fa’alapotopotoga tumaoti i le aso a taeao, i lalo o le polokalame o le Samoa Gender Partnership
Program.
O le naunautaiga, ia maua ma fa’aaoga avanoa e fa’asoa ai ma malamalama i le tulaga o i ai galuega faatino a lo tatou atunuu mo le unaia o avanoa tutusa, i ona vaega taua, o lesona aogā aemaise o ni auala e faaleleia ai galuega fa’atino.
O le polokalame foi o lenei aso, o le a tōlaulauina ai nisi o
fanau ua mau fa’ailoga i le tauvaga tusiga solo a fanau aoga, i le autu mo le tafiesea o sauaga. Faamalo le taupati, malō le finafinau ia te outou le fanau.
E fa’aaogaina ai lenei avanoa e momoli ai le fa’afetai a le tatou Malo i pa’aga uma o loo fa’aauau pea ona galulue, mo le unaia o avanoa tutusa mo Tinā ma tamaitai. Malo fai o le faiva, malo le faato’ato’a.
Soifua.
