– Lau Susuga i le Taitai o le Sauniga, Susuga Vaimoli Kuresa
– Lau Susuga i le Peresetene o le Asosi Volipolo Niu Sila, Susuga Naite Talalelei Gago,
– Lau Susuga i le Peresetene o le Asosi Volipolo Samoa, Susuga Leu Fatu Faamuasili Banse,
– Faauluuluga o Kalapu Volipolo
– Kalapu Volipolo eseese ua aofia potopoto
– Le mamalu ua faatasi mai i lenei taeao e molimauina lenei faamoemoe,
O sa ma faigata o Samoa ua potopoto mai i lenei taeao, o le a tāoto ā faamāene o tai loloto. E le toe tau faamati’eina ou pa’ia e mai le vavau e oo i le faavavau. O pa’ia foi o eleele sa ma fanua tapu o loo tapuvae tasi mai iai le faamoemoe i lenei taeao, o lea ua uma ona saunoa iai le fofoga o le aso. Ae tau lava ina ou faatulou iai.
Ua mae’a foi ona tafili le agavao faa-le-agaga ma faausu lupe o mau i le Tapaau Sili i le Lagi ona o Lana faasoa i le soifua ma le ola e pei ona saunia e le Taitai o le Sauniga. E faaluaina ai le agaga o le faafetai mo upu tima’i ma faamanatu lelei i ‘au o le a tausiniō i lenei aso. Tatalo ina ia maua pea le tumu o le Agaga Paia auā le feagai ai ma le valaauina.
O le a avea le leo faatauvaa o la outou Minisita e fai ma fofoga o lo tatou Malo, faaleo atu ai le agaga o le faafetai i la outou valaaulia faaaloalo e pei ona iai le taeao nei.
Mo le Peresitene ma le laulau a le Asosi, faamālō le faamā’ite i mea lelei, faamālō le tautua, faamalo faamaopopo, faafetai le manatu i le faaolaolaina o le taaloga volipolo aemaise o se lumanai mo tupulaga fai a’e a le atunuu.
Faafetai le tatou Asosi mai Niusila, lea ua maua atu lo outou faamoemoe, e faaauau pea la outou lagolago ma le faigapaaga ma le tatou Asosi i Samoa nei.
Ia aveave’ai ai pea na lagona lelei o le galulue faatasi, ma o le faamoemoega foi lena o lo tatou Malo e faatu se Matagaluega o Taaloga ma Alagaoa mo le Fiafia o Tagata e pei ona iai nei. E le gata i le atinaeina o tomai ma agavaa i taaloga mo le lumanai manuia o tagata, ae o le faaaogaina o Taaloga ma Alagaoa mo le soifua manuia ma fegalegaleaiga lelei.
Faafetai mo i latou uma sa tapenaina tatou autaalo mo Taaloga a le Pasefika i Solomona. O lea na maua i faamaumauga na ausia e alii le Pine Apamemea, ma ua loa tausaga faatoā toe ausia lea e le Volipolo a Samoa lea tulaga. Ma o loo iai pea avanoa i luma atu, e mafai ai ona faaleleia, ae manaomia ai le taumafai ma galuega e tatau ona faatino ma le lė faalogologo tigā.
O le fautuaga a le Minisita mo i latou o le a tausiniō i le asō,
• taalo ia tusa ma le tulafono,
• taalo tausaafia
• taalo o se ‘au, ae le ole taalo mo na o oe lava
• taalo ma faaaoga lelei avanoa ua maua Mo i latou o le a faafoeina tatou taaloga i le asō
• Silasila toto’a i le fa’aaogaina o tulafono
• Fetufaa’i o outou tomai ma agavaa i faatulagaga talafeagai
• Fai ma le faautauta ā outou faaiuga, auā o faaiuga lelei, o le a valaauliaina lagona lelei ma le agaga toafilemu i soo se faamoemoe.
O la matou tatalo ia manuia tele lenei taamilosaga i ona itu uma.
Ma oute fiafia e faailoa atu ua tatala aloaia le Taamilosaga Volipolo 2024.
Soifua ma ia manuia.
