14 March 2024
Taeao manuia i lo outou soifua laulelei!
E ofo alofa ma faatalofa atu ile paia ma le mamalu o le tatou aufaifaatoaga tilapia i Upolu nei..
O le aso o le a faapea ona tufatufaina ai tatou taga meaai o tilapia mai le tatou container lona 2 mo le aufaifaatoaga tilapia i Upolu nei ae o loo faamoemoe mo le motu tele i Salafai ile vaiaso fou.
Ole container muamua sa auina mai lea ma tufatufaina ile tausaga talu ia Fepuari 2023 e tusa ma le 350 taga ile mamafa e 25kg sa auina mai mai.
O le container lona 2 lenei o le aofaiga o taga meaai a tilapia e;
– 655 taga – 25kg ile taga e tasi. O lenei taumafaiga ina ia mafai ona siitia tatou atinae tilapia I totonu o Samoa mo le fofoga taumafa aemaise ia ausia tulaga e mafai ona gafataulimaina ai maketi e le gata i totonu o Samoa ae faapea mo le auina atu i fafo.
O le taimi nei ua sili atu ma le 50 fai faatoaga tilapia i totonu o Samoa ma o loo faailoa mai lava le fiafia o tatou tagata e atinae lenei matai’ai.
O lenei taumafaiga ua mafai ona faatupeina mai lalo o le Poloketi a le PIRAS – Pacific Island Rural and Agriculture Stimulus Facility na amata mai ia Setema 2021, I lona aofaiga e USD $35,000 e tusa ma le SAT$92,000. O se taumafaiga faa-itu-lagi nei e tali atu ai i aafiaga o tatou tagata mai le faama’i o le Koviti 19. O loo faatupeina mai lalo o le IFAD (International Fund for Agricultural Department a le malo o Ausetalia.
E momoli atu ai le faafetai tele I le malo o Ausetalia e tauala ile IFAD mo le tatou Poloketi lenei o le PIRAS e tusa ai o lenei fesoasoani mo le tatou Malo aemaise mo tatou aufaifaatoaga Tilapia.
E tatalo atu ai ile tatou Asosi o le Aufaifaatoaga Tilapia (SAFA) ina ia toe faamautu ma faamalosi le unaia o le tatou Asosi e mafai ai ona oo atu i se isi tulaga ia lenei atinae o le tilapia i Samoa.
Manuia tele lenei aso. Manuia foi a outou atinae!
Faafetai.
