Gagaemauga 1
I le susu I lau Susuga Taitai o le Sauniga , faapea foi le aufaigaluega Paia a le Atua o le Itumalo ua tatou mafuta lenei aso. Ia agalelei le Atua , foai le mau e tele ma le tofa paia, aua le tauasuina o le ipu vai o le ola i totonu o le Itumalo
E faatalofa atu foi I le paia maualuga o lenei aso, I Paia faalemalo aua le afio o le Sui Palemia, o le Taitaifono o le Fono Faavae o Gagaemauga 1 , lau Afioga I le Minisita Tuala Tevaga Ponifasio.
E faatulou foi I Paia Faaleaganuu aua le Afio mai o Lauano, Afifio mai le To’afia o alii. Afio mai le Suafa o Ae, alalata’I lau fetalaiga Mauili o le tulafale ali’i ma le nofo a ituaiga I le Faleã’ana. O paia ma mamalu na o loo sapi ai le tatou Afioga nei o Patamea.
E faatulou foi I paia o le Itumalo, aua le Afifio o aiga Sã Tuala, Afio aiga Sã Peseta, Afifio Tapaau ma Aiga. Alalatai oe o le Matua, ma tootoo o Vaituutuu.
E tulai ai ma le ava ma le fa’aaloalo tele, e fai ma sui o le Malo aua le Afio le Tamaitai Palemia o Samoa, Afifio Afioga I Minisita o le Kapeneta ma le Faigamalo e faaleo le agaga fa’afetai aua lenei aso taua. Ua tatou molimauina o le tatalaina o le Vai Tumaoti o le Afioga nei , aua le suavai mama mo le fofoga taumafa o le Afioga.
Ua sausau fialele ai nei le manu sa moe afusia, aua o lea ua tini tauao le faamoemoe ma le moe mitiga sa fau ao fau po. O upu a le Tusi, o le faamoemoe ua taunuu o le laau lea o le Ola. Lea foi ua togi pa tau le ave ma ua sili foe o le faatautaiga sa alo iai le afioaga ma lenei atinae matagofie. Ua mafai ona tino mai lenei faamoemoe, ona o le fesoasoani ma le faatupeina e le tatou Poloketi Miliona mo atinae o Itumalo.
E leo toe po le silafia a le Itumalo i lenei poloketi taua a le tatou Malo o lo’o faagasolo nei. O le tuuina atu le o le 1 miliona tala i le tausaga, e faaleleia atili ai atinae I totou o Itumalo taitasi ina ia siitia le tamaoaiga ma ia gafataulimaina le soifua manuia ma le ola lelei I totonu o Itumalo, Nuu, Ekalesia ma aiga taitasi. O lo’o galulue soosoo tauau ai le Matagaluega o Tina ma Tamaitai, Atinae o Afioaga ma Agafesootai ma le Pule mamalu a Alii ma Faipule o Itumalo ma le Komti Fono Faavae. O lenei ua tatou molimauina le matagofie o lenei atinae ua tatalaina I le asō. E momoli atu ai le agaga faafetai tele I le mamalu o le Afioaga i lo outou le faalogologo tiga i le sautia ma le laina, ma le galulue faatasi ua tino mai ai lenei galuega matagofie. E faafetaia foi Ie Afioga I le Faipule poo le tama o le Itumalo, i lou saili malo ma lou galue soosoo tauau ma le mamalu o le Afioaga ma le Itumalo ua atoa ai tino Vaatausili I lenei aso. E le faagaloina foi le faafetai I le aufigaluega totofi a le Atua o loo faafale le malu I lenei itumalo I la outou taulaga tatalo I aso uma sa talosia ai lenei galuega ua faataunuuina ma le manuia. E moni ai le upu a le Tusi, a le Atinae e Ieova lenei galuega , e galulue fua I latou o e Atiae.
Sagai ane ai o le tai, ia avea foi lenei atinae a le Afioga e fai ma faamanuiaga mo aiga uma, avea foi ma puna vai e ola pea aua le tupulaga lalovaoa.
Ua maea le Miliona muamua, ae o loo faasolo mai le isi Miliona lona lua. O le matou tatalo, ia aveaveai ai pea la outou faasoa lima lelei ina ia tali manaoga o le Itumalo I atinae eseese.
Ia faamanuia tele le Atua I lenei atinae taua , ia fai ma Toala Fanau ma punavai e puna mai ai manuia ina ia tafe atu I aiga, ekalesia ,nuu ma le Itumalo Gagaemauga 1 ina ia utu faalumaga ai ma manuia ai tagata uma.
Manuia tele lau Susuga taitai o le Sauniga, Afioga Sui Palemia, faapea foi le mamalu maualuga o le afioaga ma le Itumalo.
Ma o lea, ua tatala aloaia ai le Atinae o le Vai Tumaoti o Patamea
Soifua ma ia Manuia
