E manatu o lea ua pale i galutu’u seegapapa a le tupu e pei o le fetalaiga i le malae o le Tea Malosi . Ua o tatou fesilafai foi i pu’e o manu ae le o mala i le alofa ma le agalelei o le Tapaau Sili i le Lagi. Ae e’e ia i vaatapu ou paia sausaugatā Samoa auā o paia lava mai le vavau seia o’o i le faavavau.
Lau Susūga i le Ta’ita’i o le sauniga ma le pa’ia maualuga o le valaaulia. Mālo le soifua manuia ma le lagi e mamā. O lea ua māe’a ona asa uta mamao ma uta lalata ua uma foi ona paniniu pa’ia o le taeao ma le aso e pei ona saunoa i ai le fofoga o le aso. Ae o le a salatonu ia lau o le fō ma vili tonu le ifi a Māina e tusa ai ma le faamoemoe o lenei aso.
O le faamoemoe ua taunuu, o le la’au lea o le soifua. Faafetai tele mo le taliaina o le vala’au atu a le Matagaluega ina ia tatou auai faatasi auā le faamoemoe sa taupoina.
E lua ni vaega taua e fia faamamafaina i lenei faamoemoe;
I) Muamua o le Faalauiloaina o Auaunaga a le Matagaluega
Ua maea ona faatinoina lenei faalauiloa i Upolu faapea foi i le motu nei i tausaga ua tuanai atu. O le faamoemoe, ia faasopolia Samoa atoa i lenei polokalame auā lava le faalauiloaina o Auaunaga ma Matafaioi a le Matagaluega.
O le sini autu o lenei aso, o le saga unaia ma siitia le silafia ma le malamalama’aga o le atunuu aemaise tagata faatau ma le au faipisinisi i mataupu e aofia ai; fefaatauaiga talafeagai ma faiga faatauvaga, aiā tatau po’o matafaioi a tagata faatau, faioloa ma pisinisi, resitalaina o pisinisi ma meatotino tau le atamai, polokalame fesoasoani mo atina’e o pisinisi ma tupe faafaigaluega, , aia tatau a le tagata faigaluega faapea i latou e pulea galuega, aia tatau mo lou saogalemu ma lou soifua maloloina i fale faigaluega ma auaunaga o galuega mo ē o loo saili galuega.
II) Lona lua o faamoemoega o lenei aso o le Faalauiloaina lea o Aia Tatau a Tagata Faatau
O le asō o loo faamanatuina ai i le lalolagi atoa le Aso Faapitoa mo le Faalauiloaina o Aia Tatau a Tagata Faatau o le Lalolagi (World Consumer Rights Day).
O lenei Aso Faapitoa sa ulua’i faamamaluina mai le tausaga e 1962 e se tasi o Peresetene ta’uta’ua o le malo o Amerika, o John F Kennedy. O le tausaga e 1998 na amata faamamaluina ai i Samoa lenei aso faapitoa ina ua pasiaina le Tulafono o Fefaatauaiga Talafeagai lea ua suia nei i le Tulafono o Faiga Faatauvaga mo Fefaatauaiga ma le Puipuia o Tagata e Fa’aaogaina Oloa ma Auaunaga 2016. O se tasi o sini autu o lenei Tulafono o le puipuia lea o aia tatau a tagata faatau i le atunuu. O le luasefulu ono (26) ai lenei o tausaga talu ona faamamaluina i Samoa lenei aso faapitoa ma ua avea ai lava le aso 15 o Mati o tausaga taitasi ma aso faapitoa mo lenei faamoemoe taua. O se faailoga foi lea o le faatauaina tele o aia tatau a tagata faatau uma. O ia Aia Tatau e 8 e aofia ai:
1. Aia Tatau i oloa ma auaunaga saogalemu
2. Aia Tatau i faamatalaga o oloa ma auaunaga
3. Aia Tatau e filifili ai i oloa lelei ma auaunaga talafeagai ma lou mana’o
4. Aia Tatau faa-le-tulafono
5. Aia Tatau mo le faamalieina o manaoga masani
6. Aia Tatau e toe faaleleia ai se oloa, toe sui se oloa, poo le toe totogi foi o se oloa poo se auaunaga ua lē talafeagai
7. Aia Tatau i se si’osi’omaga mama
8. Aia Tatau ia A’oa’oina
Ua filifili le Matagaluega e faataatia le Sini Autu Faavaomalo mo lenei Tausaga “O auaunaga faatekonolosi faamoemoeina mo Tagata Faatau” ae faatautaia polokalame faalauiloa e saga unaia atili ai le silafia o tagata faatau i a latou matafaioi poo aia tatau.
O se faamanatu taua tele mo tagata faatau, ia fa’aaogaina a latou aia tatau ma le tatau i taimi o fefaatauaiga ma ia fesoasoani tele i le ausia ai o se si’osi’omaga maloloina ma talafeagai i maketi o fefaatauaiga.
E i ai le manatu maualuga o le a fa’aaogaina lenei avanoa tatou te talatalanoa ai, fefa’asoa’i ma soalaupule i mataupu uma o loo mafai ona tuuina atu ai se fesoasoani, fautuaga ma se auaunaga a lenei Matagaluega. E le gata i lea o ni auaunaga e tatau ona faaleleia atili a le Matagaluega.
Ia manūteleina lenei aso i le alofa o le Atua, ma ou te faamalosi ‘au atu ina ia fa’aaoga lenei avanoa lelei ma le tāua tatou te fefaasoaa’i ai ma fetufaa’i ai. Ia tatala le tofā ma le faautautaga sasa’a i finagalo o le tatou mafutaga ina ia tofu le gogo ma si ana i’a auā lava le sini autu o lenei aso. Ia agalelei mai le Alii ma tulituliloaina pea i tatou i lona alofa tunoa ma lona filemu ma taitaiina atu i tatou uma i le faaiuga o lenei faamoemoe.
UA TATALA ALOAIA LE TATOU FAAMOEMOE I LE ASŌ.
SOIFUA MA IA MANUIA.
